ថ្មីៗនេះមានការបែកធ្លាយព័ទមានមួយដែលត្រូវបានគេជឿជាក់ថា ក្រុមហ៊ុន Apple កំពុងតែរៀបចំនូវទូរស័ព្ទ iPhones ស៊េរីថ្មីជាច្រើនម៉ូដែល ជាមួយនឹងការពង្រឹងទៅលើប្រព័ន្ធអង់តែនថ្មីដើម្បីបង្កើតនូវល្បឿននៃការបញ្ជូនតាមរយៈ Ultra-fast LTE ។ ព័ត៌មានថ្មីនេះ គឺត្រូវបានគេទម្លាយចេញប៉ុន្មានថ្ងៃបន្ទាប់ពីរបាយការណ៍មួយបញ្ជាក់ថា iOS ជំនាន់បន្ទាប់របស់ក្រុមហ៊ុន Apple នឹងភ្ជាប់ជាមួយនឹងបន្ទះឈីប Intel XMM 7560 និង Qualcomm Snapdragon X20 processors ។
កាលពីថ្ងៃអង្គារ៍នេះ អ្នកវិភាគដ៏ល្បីឈ្មោះរបស់ក្រុមហ៊ុន KGI Securities លោក Ming-Chi Kuo បានបង្ហាញនៅក្នុងកំណត់ហេតុនៃការស្រាវជ្រាវមួយអំពីការព្យាការណ៍ទៅលើទូរស័ព្ទ iPhone នាពេលខាងមុខនេះ។ តាមការបញ្ជាក់របស់លោក Kuo អោយដឹងថា ក្រុមហ៊ុន Apple នឹងប្រើប្រាស់យ៉ាងហោចណាស់នូវអង់តែន liquid crystal polymer (LCP) សម្រាប់ទូរស័ព្ទ iPhones នាពេលខាងមុខនេះ។ បច្ចេកវិទ្យានេះ គឺមានលក្ខណៈស្រដៀងគ្នាទៅនឹងអ្វីដែលប្រើប្រាស់នៅលើទូរស័ព្ទ iPhone X នោះ លោក Kuo បាននិយាយទៀតថា បច្ចេញវិទ្យានេះ នឹងមានការពង្រឹងជាច្រើនទៀតទៅលើការរចនាអង់តែនដែលអាចទ្រទ្រង់នូវស្តង់ដារ 4x4 MIMO បានផងដែរ នេះបើតាមការបញ្ជាករបស់ macRumors ។
នៅក្នុងកំណត់ហេតុរបស់លោក Kuo បានបញ្ជាក់ថា “ការ Upgrade ទៅលើការរចនានៃអង់តែនថ្មី គឺជាកត្តាមួយសំខាន់សម្រាប់ការបង្កើនល្បឿនរបស់ LTE នៅក្នុងម៉ូដែល 2H18F iPhone។ LCP គឺខ្ពស់ជាង PI សម្រាប់កម្រិតហ្រ្វេកង់ខ្ពស់ ការដំណើរការកម្រិតខ្ពស់ និងការធន់ទៅនឹងសំណើម។ លោកបានទស្សន៍ទាយថា 2H18F iPhone នឹងប្រើប្រាស់នូវអង់តែន LCP LTE ចំនួនពីរដូចគ្នាទៅនឹង iPhone X ប៉ុន្តែវាក៏ត្រូវប្រើប្រាស់នូវលក្ខណៈសម្បត្តិកម្រិតខ្ពស់ផងដែរដើម្បីទ្រទ្រង់នូវស្តង់ដារ 4x4 MIMO។ នៅក្នុងពេលបច្ចុប្បន្ននេះ គឺមានតែ ទូរស័ព្ទ iPhone X ប៉ុណ្ណោះ ដែលប្រើប្រាស់នូវ LCP FCPBs ចំនួនពីរនោះ។ សម្រាប់ iPhone 8 ប្រើប្រាស់តែ LCD module ហើយ iPhone 8 Plus ក៏ដូចគ្នាដែរ។ សម្រាប់ជំនាន់បន្ទាប់របស់ទូរស័ព្ទ iPhone ដែលគ្រោងនឹងបង្ហាញខ្លួននៅឆ្នាំ 2018 នេះ ក៏នឹងមានអង់តែន LCP LTE យ៉ាងហោចណាស់ចំនួន 2 ផងដែរ ។
ពេលនេះ ក្រុមហ៊ុន Apple មានគម្រោងនៅក្នុងការប្រើប្រាស់នុវ LCP ចំនួន 2 នៅលើទូរស័ព្ទ iPhone ស៊េរីថ្មីនោះ ក្រុមហ៊ុនផលិតស្មាតហ្វូនជាច្រើនដែលជាគូប្រកួតប្រជែង ក៏កំពុងតែមានគម្រោងក្នុងការប្រើប្រាស់នូវការផ្លាស់ប្តូរទៅកាន់ប្រព័ន្ធ 5G ផងដែរ។កាលពីដើមខែកន្លងទៅនេះ លោក Kuo បាននិយាយថា Apple នឹងបញ្ចេញនូវទូរស័ព្ទ iPhone ស៊េរីថ្មីចំនួន 3 ម៉ូដែលនៅឆ្នាំ 2018 ខាងមុខនេះ ដោយក្រុមហ៊ុន នឹងធ្វើការអាប់ឌែតទៅលើ iPhone X ជាមួយនឹងការប្រើប្រាស់អេក្រង់ OLED ទំហំ 6.5 អ៊ីង និង iPhone X ដែលមានអេក្រង់ 5.8 អ៊ីង។ នៅក្នុងនោះ ក្រុមហ៊ុន Apple ក៏ទំនងជាធ្វើការនៅលើ iPhone អេក្រង់ 6.1 អ៊ីង LCD ផងដែរ ដែលមានការរចនាអេក្រង់ Edge-to-edge និងការទ្រទ្រង់នូវបច្ចេកវិទ្យា Face ID ថែមទៀតផង៕