រូបភាព Renders ជាច្រើនរបស់ស្មាតហ្វូនស៊េរីថ្មី Galaxy S9 ត្រូវបានបែកធ្លាយនៅលើអនឡាញនៅថ្ងៃនេះតាមរយៈការបញ្ចេញរបស់ក្រុមហ៊ុនផលិតស្រោមការពារស្មាតហ្វូនដ៏ល្បីល្បាញ Ghostek ហើយព័ត៌មាននេះ គឺមានប្រភពចេញពីក្រុមហ៊ុនសង្វាក់ផ្គត់ផ្គង់សមាសភាគរបស់ក្រុមហ៊ុន Samsung។ ផ្នែករបស់ស្មាតហ្វូននេះ គឺបង្ហាញអំពីការរចនារូបរាងចុងក្រោយហើយ ស្របពេលដែលផ្ទៃខាងមុខរបស់ស្មាតហ្វូននេះ មានស៊ុមព័ទ្ធអេក្រង់ស្តើង នេះ បើតាមការបញ្ជាក់របស់ BGR ។ រូបភាពទាំងនេះ បានបង្ហាញអំពីវត្តមានរបស់ស្មាតហ្វូន Galaxy S9 និង Galaxy S9 Plus ដែលមានភាពខុសគ្នាតែទំហំអេក្រង់តែប៉ុណ្ណោះ។
ទាក់ទងនឹងរូបភាព Renders នេះ ត្រូវបានគេរាយការណ៍នៅក្នុងពេលថ្មីៗនេះថា ផ្នែកខាងក្រោយរបស់ស្មាតហ្វូន Galaxy S9 នឹងមានការផ្លាស់ប្តូរច្រើនណាស់ បើធៀបជាមួយនឹងស្មាតហ្វូនត្រកូល Galaxy S8។ សម្រាប់ប្រព័ន្ធកាមេរ៉ាភ្លោះរបស់ស្មាតហ្វូនជំនាន់ថ្មីនេះ នឹងមានរូបរាងបញ្ឈរហើយវាមានភ្លើង Dual-LED Flash ប្រព័ន្ធវាស់ចង្វាក់បេះដូងជាមួយនឹងផ្នែកខាងក្រោម គឺជាប្រព័ន្ធស្កេនក្រយ៉ៅដៃថែមទៀតផង។ ទំហំនៃប្រព័ន្ធស្កេនក្រយ៉ៅដៃនឹងមានទំហំធំជាងប្រព័ន្ធស្កេនក្រយ៉ៅដៃនៅលើស្មាតហ្វូនត្រកូល Galaxy S8។
សម្រាប់ប៊ូតុងជំនួយការឆ្លាតវៃ Bixby ក៏ជាផ្នែកមួយដ៏សំខាន់នៅលើស្មាតហ្វូនស៊េរីថ្មីនេះផងដែរ ប៉ុន្តែក្រុមហ៊ុន Samsung ប្រហែលជាដាក់ប៊ូតុងនេះនៅចន្លោះ Key និងប៊ូតុងថយសំឡេង។ ស្មាតហ្វូននេះ មានអេក្រង់ Infinity Display ជាមួយនឹងគែមកោងនិងស៊ុមព័ទ្ធអេក្រង់ស្តើងថែមទៀតផង។ ស្មាតហ្វូននេះ ប្រើប្រាស់នូវរន្ធដោត USB Type-C និងរន្ធដោតកាសស្តាប់ 3.5mm audio jack ។ យោងតាមរបាយការណ៍នៅក្នុងពេលថ្មីៗនេះ ស្មាតហ្វូន Galaxy S9 នឹងបំពាក់នូវអេក្រង់ទំហំ 5.8 អ៊ីញខណៈពេលដែលស្មាតហ្វូន Galaxy S9 Plus នឹងបំពាក់នូវអេក្រង់ទំហំ 6.2 អ៊ីង។ ស្មាតហ្វូនទាំងពីរនេះ នឹងបង្ហាញខ្លួននៅដើមឆ្នាំ 2018 ហើយវានឹងបង្ហាញខ្លួននៅក្នុងព្រឹត្តិការណ៍ MWC ខាងមុខនេះ៕
