យោងតាមរបាយការណ៍ស្ទាបស្ទង់មតិដែលបានរៀបចំធ្វើឡើងដោយ Barclay បានបង្ហាញថា1/3 នៃអ្នកប្រើប្រាស់មានបំណងចង់ទិញទូរស័ព្ទ iPhone X។ នេះជាដំណឹងល្អសម្រាប់ក្រុមហ៊ុន Apple ដែលទទួលបានការគាំទ្រពីអ្នកប្រើប្រាស់ទៅលើទូរស័ព្ទ iPhone ជំនាន់ថ្មីចុងក្រោយមួយនេះ។ នៅក្នុងចំនោមប្រជាជនរាប់ពាន់អ្នកដែលភាគច្រើនជាអ្នករស់នៅប្រទេសលោកខាងលិច បូករួមទាំងប្រជាជននៅក្នុងប្រទេសចិនដែលជាទីផ្សារគោលដៅដ៏ធំបំផុតរបស់ Apple ផងដែរនោះបានបង្ហាញថាប្រហែល 62% មានបំណងចង់ទិញទូរស័ព្ទថ្មីនៅឆ្នាំក្រោយនេះ ហើយប្រហែល 54% នៃអ្នកទាំងអស់នោះពួកគេចង់ផ្លាស់ប្តូរម៉ាកទូរស័ព្ទដោយមានបំណងចង់ប្រើ iPhone វិញ។
ជាងនេះទៅទៀត បៅក្នុងការស្ទាបស្ទង់មតិនេះបានរកឃើញថាមានអ្នកប្រើប្រាស់ប្រហែល 23% ចង់ធ្វើការផ្លាស់ប្តូរពីប្រព័ន្ធប្រតិបត្តិការទូរស័ព្ទ ផ្សេងមកប្រើ iPhone ជំនូសវិញ ខណៈនៅទីផ្សារប្រទេសចិនបានបង្ហាញថាអ្នកប្រើប្រាស់មានបំណងចង់ប្រើ iPhone មានចំនួនខ្ពស់រហូតដល់ទៅ 37% ឯណោះ។ ដោយសារតែបច្ចុប្បន្ន Apple គឺជាក្រុមហ៊ុនប្រទេសលោកខាងលិចតែមួយគត់ដែលបានឈរជើងក្នុងទីផ្សារប្រទេសចិនហើយកំពុងឈរនៅលេខរៀងទី 5 ក្នុងចំនោមក្រុមហ៊ុនប្រគូតប្រជែងធំៗរបស់ចិន។
សញ្ញានេះបានបង្ហាញពីការផ្លាស់ប្តូរដ៏ធំធេងបំផុតដែលវានឹងជួយបង្កើនប្រាក់ចំណូលក្នុងថ្ងៃអនាគតសម្រាប់ក្រុមហ៊ុន Cupertino របស់អាមេរិកមួយនេះ ហើយគេបានធ្វើការប៉ាន់ប្រមាណថាចំណាប់អារម្មណ៍របស់អ្នកប្រើប្រាស់ដែលចង់ផ្លាស់ប្តូរមកប្រើទូរស័ព្ទ iPhone គឺពួកគេបានផ្តោតសំខាន់ទៅលើទូរស័ព្ទ iPhone X ជាជាង iPhone ម៉ូដែលផ្សេង។ ក្រុមហ៊ុន Apple ត្រូវបានក្រុមអ្នកវិភាគព្យាករណ៍ថានឹងបានជាប់កំណត់ត្រានៃការលក់ទូរស័ព្ទស្មាតហ្វូនដែលមានតម្លៃថ្លៃបានច្រើនជាងគេបំផុតនៅត្រីមាសចុងក្រោយនៃឆ្នាំនេះហើយស្មាតហ្វូនដែល បានបំបែកកំណត់ត្រាលក់ក្នុងតម្លៃខ្ពស់នេះគឺទូរស័ព្ទ iPhone X ដែលជា iPhone ទទួលបានការគាំទ្រខ្លាំងក្លាបំផុតមិនធ្លាប់មានក្នុងប្រវត្តិ សាស្រ្ត Apple ក្នុងរយះពេលជាង 10 ឆ្នាំមកនេះ៕
