Honor V10 គឺជាស្មាតហ្វូនស៊េរីថ្មី ដែលទើបតែបង្ហាញខ្លួននៅក្នុងប្រទេសចិនកាលពីខែមុននេះ ឥឡូវនេះ បានដាក់លក់ជាផ្លូវការហើយនៅក្នុងប្រទេសចិនហើយ។ យោងតាមការបញ្ជាក់របស់ក្រុមហ៊ុន ស្មាតហ្វូននេះ លក់ដាច់អស់រលីងតែម្តងនៅក្នុងរយៈពេលប៉ុន្មាននាទីសម្រាប់ការលក់លើកដំបូងរបស់ខ្លួន។ ស្មាតហ្វូន Honor V10 ទទួលបានការចាប់អារម្មណ៍យ៉ាងខ្លាំងនៅលើអនឡាញតាមរយៈក្រុមហ៊ុនលក់រាយ JD.com។ ក្រុមហ៊ុនលក់រាយមួយនេះ បានទម្លាយថា ក្រុមហ៊ុន ទទួលបាននូវការចាប់អារម្មណ៍ទៅលើស្មាតហ្វូននេះចំនួន 570,000 នាក់ដែលចង់ទិញទូរស័ព្ទស៊េរីថ្មីនេះ។
ក្រុមហ៊ុន Huawei គ្រោងនឹងដាក់លក់ស្មាតហ្វូន Honor V10 សារជាថ្មីម្តងទៀតនៅសប្តាហ៍ក្រោយនេះគឺនៅថ្ងៃទី 12 ខែធ្នូ។ ក្រុមហ៊ុន ក៏បានប្រកាសផងដែរថា អ្នកមានសំណាង 5 នាក់ ដែលទិញស្មាតហ្វូន Honor V10 នឹងទទួលបាននាឡិកាឆ្លាតវៃ Huawei Honor Band A2 ផងដែរ។ ដើម្បីចូលរួមផ្សងសំណាងនេះ អ្នកទិញស្មាតហ្វូននេះ ទាំងអស់ត្រូវធ្វើការ Screenshots នូវការកម្មង់ទិញរបស់ពួកគេ។ ស្មាតហ្វូនស៊េរីថ្មី នឹងមានអេក្រង់ទំហំ 5.99 អ៊ីញកម្រិតភាពច្បាស់ FHD+ display ជាមួយនឹងកម្រិត 2160x1080 ភិចសែល និងកម្រិត 18:9 Aspect Ratio ។ ស្មាតហ្វូននេះ មានតួខ្លួនស្រោបដោយលោហៈធាតុ និងការរចនារូបរាងស្តើងជាមួយនឹងកម្រាស់ត្រឹមតែ 6.97mm តែប៉ុណ្ណោះ។
Honor V10 បំពាក់នូវបន្ទះឈីបស៊េរីថ្មី Kirin 970 chipset ដែលភ្ជាប់ជាមួយនឹងមុខងារ Neural Processing Unit (NPU) ដែលមានសមត្ថភាពអាចមើល ស្តាប់ រៀន ស្គាល់ គណនា និងការសម្រេចចិត្តថែមទៀត។ ស្មាតហ្វូននេះមាន 3 ជម្រើសគឺ 4GB/64GB និង 6GB/64GB និង 6GB/128GB។ សម្រាប់កាមេរ៉ាភ្លោះរបស់ស្មាតហ្វូននេះគឺ 20MP+16MP ខណៈពេលដែលកាមេរ៉ាខាងមុខទំហំ 13MP ភ្ជាប់ជាមួយនឹងមុខងារ AI ផងដែរ។ ស្មាតហ្វូននេះដំណើរការប្រព័ន្ធប្រតិបត្តិការ Android 8.0 Oreo ជាមួយនឹង EMUI 8.0 ផងដែរ។
ស្មាតហ្វូននេះដំណើរការថាមពលថ្ម 3,750mAh ដែលទ្រទ្រង់នូវកម្លាំងថាមពល 5V/4.5A super-fast charge ។ ពិសេសជាងនេះ ទៀតនោះ ស្មាតហ្វូននេះ ប្រើប្រាស់នូវ Connectivity ដូចជា 4G VoLTE, Wi-Fi, Bluetooth និង GPS។ នៅផ្នែកខាងមុខរបស់ស្មាតហ្វូននេះប្រើប្រាស់ Home Button បំពាក់នូវមុខងារស្កែនក្រយ៉ៅដៃផងដែរ។ ស្មាតហ្វូន Honor V10 មាន 4 ពណ៌សម្រាប់ធ្វើការជ្រើសរើសគឺ ពណ៌ខ្មៅ Magic Black, ពណ៌ខៀវ Aurora Blue, ពណ៌មាស Beach Gold និងពណ៌ក្រហម Charm Red។ សម្រាប់ទំហំ 4GB/64GB លក់នៅក្នុងតម្លៃ 2699 យ័ន (ប្រហែលជា $409) ហើយសម្រាប់ទំហំ 6GB/64GB លក់នៅក្នុងតម្លៃ 2,999 យ័ន (ប្រហែល $454) ខណៈពេលដែលទំហំ 6GB/128GB លក់នៅក្នុងតម្លៃ 3,499 យ័ន (ប្រហែលជា $530)៕
