Samsung Galaxy S9 នឹងប្រកាសបង្ហាញខ្លួននៅក្នុងឆមាសទី 1 នៃឆ្នាំ 2018 ប៉ុន្តែថ្ងៃនេះ មានលេចលឺពាក្យចចាមអារ៉ាមមួយចំនួនបានបញ្ជាក់ថា ស្មាតហ្វូនស៊េរីថ្មីនេះ ទំនងប្រហែលជាមិនបង្ហាញខ្លួនលឿងជាងកាលបរិច្ឆេទធម្មតារបស់ខ្លួននោះទេ។ យោងតាមសារព័ត៌មាន The Korea Herald ថ្មីៗនេះ បានបញ្ជាក់ថា ស្មាតហ្វូនស៊េរីថ្មីរបស់ក្រុមហ៊ុន Samsung ទំនងជាមិនបង្ហាញខ្លួននៅក្នុងព្រឹត្តិការណ៍ Consumer Electronics Show នៅក្នុងខែមករានោះទេ។ អ្នកឃ្លាំមើលឧស្សាហកម្មនេះ បានបញ្ជាក់ថា ក្រុមហ៊ុនបច្ចេកវិទ្យាយក្សរបស់ប្រទេសកូរ៉េខាងត្បូងនេះ ទំនងប្រហែលជាចង់បង្ហាញនូវស្មាតហ្វូន Galaxy S9 នៅក្នុងព្រឹត្តិការណ៍ CES ដើម្បីធ្វើការប្រកួតប្រជែងជាមួយនឹងទូរស័ព្ទ iPhone X ប៉ុន្តែឆ្លើយតបទៅនឹងរបាយការណ៍នេះ នោះ ក្រុមហ៊ុន Samsung មិនមានគម្រោងបែបនេះនោះទេ។
សំរាប់ឆ្នាំនេះ មិនមែនជាលើកទីមួយនោះទេសម្រាប់ក្រុមហ៊ុន Samsung ដែលបានបញ្ចេញស្មាតហ្វូនរបស់ខ្លួនខុសកាលបរិច្ឆេទនោះ ដើម្បីធ្វើការប្រកួតប្រជែងជាមួយនឹងទូរស័ព្ទ iPhone របស់ក្រុមហ៊ុន Apple។ របាយការណ៍ជាច្រើន បានបង្ហាញថា Appleបាន បានធ្វើការផ្លាស់ប្តូរនូវការរចនារូបរាងអេក្រង់ពេញលេញ អ្នកវិភាគទីផ្សារមើលឃើញថា ក្រុមហ៊ុនបច្ចេកវិទ្យា Apple ពិតជាអាចយកឈ្នះក្រុមហ៊ុនបច្ចេកវិទ្យា Samsung បាននៅក្នុងចំណែកទីផ្សារស្មាតហ្វូនពិភពលោកនៅក្នុងត្រីមាសទី 4 ឆ្នាំ 2017 នេះ។ ហេតុដូច្នេះ ក្រុមហ៊ុន Samsung ទំនងជាអនុវត្តន៍ផែនការថ្មី តាមតយ:កាលបរិច្ឆេទរបស់ខ្លួនសំរាប់ការប្រកាសស្មាតហ្វូន Galaxy S-Series ។ មានន័យថា ស្មាតហ្វូនស៊េរីថ្មីនេះ នឹងបង្ហាញខ្លួននៅក្នុងខែកុម្ភៈក្នុងព្រឹត្តិការណ៍ Mobile World Congress នៅក្នុងប្រទេសអេស្ប៉ាញ ឬប្រហែលជា 1 ខែទៀតនៅក្នុងខែមីនាក្នុងព្រឹត្តិការណ៍មួយទៀត។
ស្មាតហ្វូនស៊េរីថ្មី Samsung Galaxy S9 ត្រូវបានគេរំពឹងថានឹងមានអេក្រង់ពេញលេញ Infinity Display ដែលមានកម្រិត Ratio ធំជាងស្មាតហ្វូន Galaxy S8 នេះបើយោងតាមរបាយការណ៍ថ្មីៗនេះ។ ក្រុមហ៊ុន OEM ចាប់ផ្តើមការផលិតទ្រង់ទ្រាយធំសម្រាប់បន្ទះឈីប Exynos 9 chipset នៅក្នុងតំបន់មួយចំនួនផងដែរ។ រោងចក្ររបស់ក្រុមហ៊ុន Samsung ក៏ធ្វើការផលិតទៅលើបន្ទះឈីប 10nm LPP (Low Power Plus) ហើយវាមានល្បឿនដំណើរការខ្ពស់ជាងមុនដល់ទៅ 15% បើធៀបជាមួយនឹងបន្ទះឈីប 10nm LPE (Low Power Early) ។ ក្រុមហ៊ុនបច្ចេកវិទ្យា Samsung ប្រហែលជាធ្វើការផ្លាស់ប្តូរទីតាំងនៃប្រព័ន្ធស្កេនក្រយ៉ៅដៃថ្មីសម្រាប់ស្មាតហ្វូន Galaxy S9 ផងដែរ ហើយថ្មីៗនេះក្រុមហ៊ុនបច្ចេកវិទ្យា Samsung ក៏ទើបតែធ្វើការចុះកុងត្រាជាមួយនឹងអ្នកផ្គត់ផ្គង់ថ្មីរបស់តៃវ៉ាន់ផងដែរ៕
