ក្រុមហ៊ុន LG Display បាននិយាយនៅថ្ងៃនេះថា បើទោះបីកិច្ចព្រមព្រៀងនៃការផ្គត់ផ្គត់ទៅលើអេក្រង់ OLED សម្រាប់ទូរស័ព្ទ iPhone X របស់ក្រុមហ៊ុន Apple នៅមិនទាន់មានការចាប់ផ្តើមក៏ដោយ ការឆ្លើយតបទៅនឹងការរំពឹងរបស់ឧស្សាហកម្មនេះ គឺនៅតែអាចបន្តធ្វើទៅបានដដែល។ ក្រុមហ៊ុន LG Display បានបញ្ជាក់នៅក្នុងឯកសាររបស់ខ្លួននៅរសៀលថ្ងៃពុធនេះថា “ទាក់ទងទៅនឹងកិច្ចព្រមព្រៀងនៃការផ្គត់ផ្គង់អេក្រង់ OLED សម្រាប់ទូរស័ព្ទ iPhone X របស់ក្រុមហ៊ុន Apple មិនទាន់មានអ្វីដែលត្រូវកំណត់នៅឡើយទេ។ នៅពេលដែលអ្វីៗ ត្រូវបញ្ជាក់យ៉ាងលម្អិតនោះ យើងនឹងធ្វើការប្រកាសអំពីរឿងនេះនៅក្នុងពេលត្រឹម 1 ខែ។
សេចក្តីថ្លែងមួយការណ៍នេះ គឺធ្វើឡើងតាមការស្នើរសុំរបស់ Korea Exchange ដើម្បីបញ្ជាក់អំពីការរំពឹងទុករបស់ឧស្សាហកម្មនេះ។ ប្រព័ន្ធផ្សព្វផ្សាយមួយក្នុងស្រុកមួយចំនួន បានរាយការណ៍ថា ក្រុមហ៊ុន LG Display បានចុះកិច្ចព្រមព្រៀងទៅលើការផ្គត់ផ្គង់អេក្រង់ OLED ជាមួយនឹងក្រុមហ៊ុន Apple សម្រាប់ iPhone X ហើយឥឡូវនេះ ក្រុមហ៊ុននេះ កំពុតែចាប់ផ្តើមការផលិតនូវសមាសភាគសម្រាប់ iPhone X នៅក្នុងរោងចក្រ Paju E6។ បន្ទាប់ពីការរៀបចំបញ្ចប់នោះ ការផលិតនឹងចាប់ផ្តើមពីខែមិថុនា ដើម្បីផ្គត់ផ្គង់អេក្រង់ OLED ចំនួន 60 លានសន្លឹក។
គួរបញ្ជាក់ថា ក្រុមហ៊ុន Apple បានលក់ចេញស្មាតហ្វូនរបស់ខ្លួនប្រមាណជា 200 លានគ្រឿងជារៀងរាល់ឆ្នាំ ហើយបច្ចុប្បន្ននេះ ក្រុមហ៊ុន Samsung Display គឺជាអ្នកផ្គត់ផ្គង់តែមួយគត់ ដែលចុះកិច្ចព្រមព្រៀងក្នុងការផ្គត់ផ្គង់អេក្រង់ iPhone X ចំនួន 67 លានគ្រឿង។ ក្រុមហ៊ុន LG Display ក៏ជាដៃគូដ៏រឹងមាំរបស់ក្រុមហ៊ុនបច្ចេកវិទ្យា Apple អស់រយៈពេលជាង 10 ឆ្នាំមកហើយ ជាមួយនឹងការផ្គត់ផ្គង់អេក្រង់ LCD សម្រាប់ក្រុមហ៊ុន Apple ខណៈពេលដែលក្រុមហ៊ុន Samsung Electronics ផ្គត់ផ្គង់អេក្រង់ OLED សម្រាប់ iPhone X ជាលើកដំបូងបំផុត។ ភាពជាដៃគូរបស់ក្រុមហ៊ុន Apple គឺជាកត្តាសំខាន់សម្រាប់ក្រុមហ៊ុន LG Display ដែលថ្មីៗនេះ បង្កើននូវការវិនិយោគសម្រាប់បន្ទះអេក្រង់ OLED សម្រាប់ស្មាតហ្វូន។
កាលពីខែមុននេះ ក្រុមហ៊ុន LG បានប្រកាសអំពីការវិនិយោគទឹកប្រាក់ 13.7 ពាន់លានដុល្លារអាមេរិកសម្រាប់អេក្រង់ OLED នៅលើទូរទស្សន៍ និងស្មាតហ្វូននៅក្នុងរយៈពេល 3 ឆ្នាំខាងមុខនេះ។ ក្រុមហ៊ុនបច្ចេកវិទ្យា LG Display ត្រូវបានគេរំពឹងថា នឹងបង្កើនការលក់របស់ខ្លួនទ្វេរដងតាមរយៈការផ្គត់ផ្គង់អេក្រង់ OLED សម្រាប់ទូរទស្សន៍ និងស្មាតហ្វូននៅឆ្នាំក្រោយ នេះបើ យោងតាមការបញ្ជាក់របស់លោក Kim Sang-don ប្រធានផ្នែកហិរញ្ញវត្ថុ។ យោងតាម IHS Markit ដែលជាក្រុមហ៊ុន Research បានបញ្ជាក់ថា ទីផ្សារសកលនៃអេក្រង់ OLED សម្រាប់ស្មាត ហ្វូន មានការកើនឡើងប្រចាំឆ្នាំជាមធ្យម 23.5% ក្នុងរយៈពេល 5 ឆ្នាំចុងក្រោយនេះ។ កំណើនទីផ្សារនេះ ត្រូវបានគេ រំពឹងថា នឹងកើនឡើងទ្វេរដងនៅឆ្នាំក្រោយគឺ 28.4 ពាន់លានដុល្លារអាមេរិក៕