រូបភាព Renders ថ្មីជាច្រើនរបស់ទូរស័ព្ទ LG G6 ត្រូវបានបង្ហាញបែកធ្លាយតាមរយៈការបង្ហោះរបស់ @OnLeaks ។ រូបភាពទាំងនេះ ផ្អែកទៅលើរូបភាព CAD ហើយវាមានលក្ខណៈខុសប្លែកពីអ្វីដែលយើងបានឃើញកាលពីម្សិលមិញនេះ។ ដោយផ្អែកទៅលើរូបភាពទាំងនេះ វាបង្ហាញថាក្រុមហ៊ុន LG បានធ្វើការរចនារូបរាងប្លែកទាក់ទាញ និងទាន់សម័យបំផុតដែលប្លែកពីម៉ូដែលមុនៗសម្រាប់ឆ្នាំក្រោយនេះ។
ទូរស័ព្ទ LG G6 នឹងបំពាក់នូវអេក្រង់ទំហំ 5.3 អ៊ីងជាមួយនឹងកម្រិតភាពច្បាស់ 1440 x 2560 ភិចសែល ហើយអេក្រង់នេះសំប៉ែតរាបស្មើរតែម្តង។ វាបំពាក់នូវបន្ទះឈីប Snapdragon 835 សម្រាប់ពង្រឹងទៅលើល្បឿនដំណើរការនៃទូរស័ព្ទនេះ ហើយវាថែមទាំងមានកាមេរ៉ាភ្លោះនៅផ្នែកខាងក្រោយដែលលោកអ្នកអាចធ្វើការថតរូបដោយប្រើប្រាស់នូវ Bokeh Effect នៅលើរូបភាពរបស់ពួកគេថែមទៀត។ វាក៏មានភ្លើង Flash ភ្លោះនៅផ្នែកខាងក្រោយផងដែរ។
រូបភាព Renders ទាំងនេះ គឺបានបង្ហាញពីបច្ចេកវិទ្យាស្កែនក្រយ៉ៅដៃស្ថិតនៅផ្នែកខាងក្រោយ ហើយវាត្រូវបានគេរាយការណ៍ថា វាប្រើប្រាស់នូវប៊ូតុង Power ពីរថែមទៀត។ រន្ធផត USB Type-C ត្រូវបានរកឃើញនូវផ្នែកខាងក្រោយនៃទូរស័ព្ទនេះ ហើយវានៅតែប្រើប្រាស់នៅរន្ធដោតខ្សែកាស 3.5mm Earphone Jack នៅផ្នែកខាងលើថែមទៀត។ ទីបំផុត ក្រុមហ៊ុន LG មិនបានធ្វើតាមក្រុមហ៊ុន Motorola ក្រុមហ៊ុនApple និងក្រុមហ៊ុនផ្សេងទៀតនោះទេ ក្នុងការដកចេញនូររន្ធនេះ។
ថ្មីៗនេះ ក្រុមហ៊ុន LG កំពុងតែព្យាយាមក្នុងការបញ្ចេញនូវទូរស័ព្ទស៊េរីថ្មីឱ្យបានមុនក្រុមហ៊ុន Samsung នៅឆ្នាំក្រោយនេះ ហើយក្រុមហ៊ុនកូេរ៉មួយនេះ ប្រហែលជានឹងប្រកាសចេញនូវទូរស័ព្ទស៊េរីថ្មីចុងក្រោយរបស់ខ្លួន ដែលនឹងធ្វើឡើងនៅដើមខែមីនាមុនពេលវត្តមានរបស់ Samsung Galaxy S8 ត្រូវបានប្រកាសដាក់លក់នៅពេលជាមួយគ្នាដែរ៕