ថ្មីៗនេះ ក្រុមហ៊ុន Sony បានបញ្ជាក់ថា ខ្លួននឹងបង្ហាញវត្តមាននៅក្នុងព្រឹត្តិការណ៍តាំងពិពរណ៍ IFA 2018 នៅក្នុងទីក្រុងប៊ែកឡាំង ប្រទេសអាល្លឺម៉ង់នៅថ្ងៃទី 30 ខែសីហានេះ។ ក្នុងនោះមានការលើកឡើងថា ក្រុមហ៊ុននេះ ប្រហែលជាប្រកាសចេញនូវស្មាតហ្វូន Xperia XZ3, Xperia XZ3 Compact និង Xperia XZ3 Premium (ឬស្មាតហ្វូន Xperia XZ2 Pro)។ កាលពីខែមុននេះ មានពាក្យចចាមអារ៉ាមដែលបញ្ជាក់អំពីលក្ខណៈសម្បត្តិរបស់ស្មាតហ្វូន Xperia XZ3 និង XZ3 Premium។
អ្វីដែលកាន់តែអស្ចារ្យបំផុត ក្រុមហ៊ុន MobileFun លក់រាយនៅក្នុងចក្រភពអង់គ្លេស ក៏ចាប់ផ្តើមចុះបញ្ជីស្មាតហ្វូន Xperia XZ3 សម្រាប់ធ្វើការកម្មង់ទិញមុនមុនថ្ងៃ បង្ហាញខ្លួនជាផ្លូវការ។ នៅក្នុងបញ្ជីនេះ ក៏បង្ហាញនូវរូបភាពផ្លូវការជាមួយនឹងលក្ខណៈសម្បត្តិនិងតម្លៃរបស់វាផងដែរ។តាមការបញ្ជាក់អំពីលក្ខណៈសម្បត្តិរបស់ស្មាតហ្វូន Xperia XZ3 នៅលើវេបសាយលក់រាយនេះ វានឹងមានអេក្រង់ទំហំ 5.7 អ៊ីង ដែលមានកម្រិតភាពច្បាស់ Full HD+ resolution 2160x1080 pixels។ ស្មាតហ្វូននេះមានកម្រិត 18:9 aspect ratio screen ដូចគ្នាទៅនឹងស្មាតហ្វូន Xperia XZ2 ។ ស្មាតហ្វូននេះ ប្រើប្រាស់នូវបន្ទះឈីប Snapdragon 845 SoC នៅលើស្មាតហ្វូន Xperia XZ3 ដែលមានរ៉េមទំហំ 6GB ផងដែរ។ វាមានម៉េមូរីក្នុងម៉ាស៊ីនទំហំ 64GB ។ ស្មាតហ្វូននេះ ក៏ប្រើប្រាស់នូវរន្ធដោត microSD និងថាមពលថ្ម 3,240mAh ។
បើនិយាយអំពីការថតរូបវិញនោះ ស្មាតហ្វូនស៊េរីថ្មី Xperia XZ3 ប្រើប្រាស់នូវប្រព័ន្ធកាមេរ៉ាភ្លោះទំហំ 19MP+12MP និងកាមេរ៉ាខាងមុខទំហំ 13MP។ ព័ត៌មានបែកធ្លាយកាលពីពេលមុននេះ បានបញ្ជាក់ថា ស្មាតហ្វូន XZ3 នឹងប្រើប្រាស់នូវប្រព័ន្ធកាមេរ៉ាភ្លោះដូចគ្នា និងកាមេរ៉ាខាងមុខដូចស្មាតហ្វូន Xperia XZ2 Premium ដែរ។ សម្រាប់ស្មាតហ្វូននេះ ប្រើប្រាស់នូវប្រព័ន្ធប្រតិបត្តិការ Android 8.1 Oreo ។ វេបសាយ Mobile Fun បានបញ្ជាក់ទៀតថា ស្មាតហ្វូន XZ3 មានកម្រាស់ 10.1mm ហើយវាមានទម្ងន់ 198 grams ។
នៅក្នុងបញ្ជីនេះ ក៏មានរូបភាពរបស់ស្មាតហ្វូន Xperia XZ2 Premium ផងដែរ។ ពេលនេះ ស្មាតហ្វូន 64GB Xperia XZ3 អាចធ្វើការកម្មង់ទិញ បានជាមួយនឹងតម្លៃ 749 pounds ($981)។ ស្មាតហ្វូននេះ មានពណ៌ខ្មៅតែប៉ុណ្ណោះ។ អតិថិជនអាចធ្វើការទិញស្មាតហ្វូននេះ បាននៅលើវេបសាយនេះ។ TechRadar ធ្វើការបង្ហាញស្មាតហ្វូន Xperia XZ3 ដំបូងបំផុតនៅលើបញ្ជីរបស់ខ្លួន។ អ្នកនាំពាក្យរបស់វេបសាយ Mobile Fun បានបញ្ជាក់ថា ព័ត៌មានរបស់ស្មាតហ្វូននេះ គឺទទួលបានពីសង្វាក់ផ្គត់ផ្គង់របស់ខ្លួន។ សម្រាប់តម្លៃរបស់ស្មាតហ្វូននេះគឺដូចគ្នាទៅនឹងតម្លៃនៅក្នុងចក្រភពអង់គ្លេសផងដែរ៕