កាលម្សិលមិញនេះ យោងតាមគេហទំព័រ digitimes.com បានផ្សាយថា ក្រុមហ៊ុនបច្ចេកវិទ្យាយក្ស Samsung Electronics និងក្រុមហ៊ុន LG Electronics នឹងបានធ្វើការផ្លាស់ប្តូរទៅលើយុទ្ធសាស្រ្តនៃគោលការណ៍ថ្មីមួយ នៅក្នុងការបញ្ចេញនូវស្មាតហ្វូនស៊េរីថ្មីជាច្រើនរបស់ខ្លួននៅក្នុងឆ្នាំ 2018 នេះ ដែលខុសពីគោលការណ៍ពីមុន ដែលផ្តោតទៅលើស្មាតហ្វូនប្រណិតជាច្រើនស៊េរី ដើម្បីធ្វើការប្រកួតប្រជែងជាមួយនឹងស្មាតហ្វូនម៉ូដែលផ្សេងទៀត។ គោលការណ៍នេះ នឹងអាចធ្វើការបង្កើនទៅលើប្រាក់ចំណូលរបស់ស្មាតហ្វូនរបស់ក្រុមហ៊ុនផងដែរ នេះបើតាមការបញ្ជាក់ចេញពីប្រភពនៅខាងក្នុងឧស្សាហកម្មនេះ។
នៅក្នុងឆមាសទី 1 នៅក្នុងឆ្នាំ 2018 នេះ ក្រុមហ៊ុន Samsung និងក្រុមហ៊ុន LG បានធ្វើការបង្ហាញស្មាតហ្វូនចំនួន 9 និង 8 ម៉ូដែលស៊េរីថ្មីរួចមកហើយ បើប្រៀបធៀបជាមួយនឹងមម៉ូដែលចំនួន 11 ដែលបានបង្ហាញដោយក្រុមហ៊ុនចែកចាយទាំងពីរនេះនៅក្នុងឆ្នាំ 2016 និងឆ្នាំ 2017 នោះ។ បន្ថែមពីនេះទៀតនោះ ក្រុមហ៊ុនផលិតស្មាតហ្វូនទាំងពីរនេះ ក៏បានបង្ហាញនូវម៉ូដែលជាច្រើនស៊េរីថ្មីនៅក្នុងទីផ្សារក្រៅប្រទេសជាច្រើនថែមទៀតនៅក្នុងឆ្នាំ 2018 នេះ។
សម្រាប់គោលការណ៍ថ្មីនេះមានការផ្លាស់ប្តូរដោយសរតែក្រុមហ៊ុនទាំងពីរនេះមើលឃើញថា ទីផ្សារស្មាតហ្វូនកំពុងតែមានការធ្លាក់ចុះ ហើយចំនួននៃការនាំចេញស្មាតហ្វូនសរុបរបស់ពិភពលោកគឺមានការធ្លាក់ចុះ 3% នៅក្នុងត្រីមាសទី 1 ឆ្នាំ 2018 នេះផងដែរ នេះបើតាមការបញ្ជាក់របស់ប្រភពជាច្រើនដកស្រង់ចេញពីទិន្នន័យរបស់ក្រុមហ៊ុនស្រាវជ្រាវទីផ្សារនោះ។
ទិន្នន័យចេញពី Strategy Analytics បានបង្ហាញថា ចំនែកទីផ្សាររបស់ក្រុមហ៊ុនបច្ចេកវិទ្យា Samsung គឺមានការធ្លាក់ចុះចំនួន 22.6% នៅក្នុងត្រីមាសទី 1 ឆ្នាំ 2018 នេះចេញពី 22.7% កាលពីឆ្នាំមុន ខណៈពេលដែលក្រុមហ៊ុន LG មានការធ្លាក់ចុះ 3.3% នៅក្នុងត្រីមាសនេះ។ នៅក្នុងរយៈពេលដូចគ្នានេះ ចំណែកទីផ្សាររបស់ក្រុមហ៊ុន Apple មានការកើនឡើង 15.1% ចេញពី 14.4% ហើយក្រុមហ៊ុន Huawei មានការកើនឡើង 2% ទៅកាន់ 11.4% និងក្រុមហ៊ុន Xiaomi មានការកើនឡើងទ្វេដង 8.2% ។
ទោះជាយ៉ាងណាក៏ដោយ ក្រុមហ៊ុន Huawei, Xiaomi នឹងក្រុមហ៊ុនម៉ាកយីហោរបស់ចិនជាច្រើនទៀត បានបញ្ចេញនូវស្មាតហ្វូនជាច្រើនម៉ូដែលរបស់ខ្លួនដែលមានសមត្ថភាពខ្លាំងក្លា និងតម្លៃក៏កាន់តែថ្លៃជាងមុនផងដែ រនៅក្នុងទីផ្សារនៃអាស៊ី និងអ៊ឺរ៉ុប នេះបើតាមប្រភពនេះបានលើកឡើងនោះ។ ក្រុមហ៊ុន Huawei ត្រូវបានគេរាយការណ៍ថា នាំចេញស្មាតហ្វូនច្រើនជាង 6 លានគ្រឿងរបស់ស្មាតហ្វូន P20 ចាប់តាំងពីស្មាតហ្វូននេះប្រកាសបង្ហាញខ្លួននៅក្នុងខែមិថុនានោះ ហើយវាមានការកើនឡើងដល់ទៅ 81% បើធៀបទៅនឹងស្មាតហ្វូន P10 ដែលលក់នៅក្នុងរយៈពេលដូចគ្នានោះ៕