បើទោះបីជាការលក់ទូរស័ព្ទ iPhone X កំពុងតែមានការធ្លាក់ចុះដោយសារតែក្រុមហ៊ុន Apple បានត្រៀមខ្លួននឹងប្រកាសបង្ហាញស្មាតហ្វូនស៊េរីថ្មីនៅខែកញ្ញាខាងមុខនេះក៏ដោយ ប្រភពជាច្រើនរបស់ DigiTimes បានរាយការណ៍ថា ក្រុមហ៊ុនផ្គត់ផ្គង់សមាសភាគជាច្រើនរបស់ក្រុមហ៊ុន Apple គឺបានស្តុកទុកនូវសមាសភាគជាច្រើនរបស់ iPhone X។ កាលពីត្រីមាសទី 1 នៅក្នុងឆ្នាំ 2018 កន្លងទៅនេះ iPhone X គឺលក់ដាច់ខ្លាំងបំផុត ឥលូវនេះ ក្រុមហ៊ុន Apple មានការរំពឹងខ្ពស់ជាងមុនទៀត បើធៀបជាមួយនឹងស្ថានភាពបច្ចុប្បន្ននេះ។
នៅក្នុងត្រីមាសទី 1 និងត្រីមាសទី 2 នៅក្នុងឆ្នាំ 2018 នេះ ការលក់ iPhone គឺមានចំនួន 77.3 និង 52.2 លានគ្រឿងស្របពេលដែលការលក់នេះ ធ្វើឱ្យក្រុមហ៊ុន Apple រកប្រាក់ចំណូលបានច្រើនមែន ក៏ដោយសារតែ iPhone X គឺមានតម្លៃថ្លៃ ហើយក្រុមហ៊ុនជាច្រើន បានបញ្ជាក់ថា ពួកគេនៅសល់សមាសភាគដល់ទៅ 3 ដង បើធៀបទៅនឹងចំនួនដែលពួកគេបានដឹកជញ្ជូនរួចរាល់ហើយនោះ។ អ្វីដែលគួរបារម្ភនោះ គឺនៅសល់តែប៉ុន្មានខែទៀតប៉ុណ្ណោះ ដែលនៅម៉ូដែលថ្មីនឹងបង្ហាញខ្លួនជាផ្លូវការនៅលើទីផ្សារហើយ។
ក្រុមហ៊ុន Apple នៅតែទាមទារអោយអ្នកផ្គត់ផ្គង់ជាច្រើន រក្សានូវសមាសភាគដែលខ្លួនមាន ដើម្បីជៀសវាងការពន្យារពេលទៅលើការដឹកជញ្ជូន ប៉ុន្តែតម្រូវការទាប ក៏បានធ្វើឱ្យក្រុមហ៊ុនផ្គត់ផ្គង់ទាំងនេះ រក្សានូវសមាសភាគយ៉ាងច្រើនលើសលប់នោះដែរ។ ប៉ុន្តែ អ្នកតាមដាននានា បាននិយាយថា នេះមិនមែនជារឿងដែលគួរឱ្យភ្ញាក់ផ្អើលនោះទេ នៅក្នុងឆ្នាំ 2018 នេះ គឺមានការធ្លាក់ចុះទៅលើការលក់ស្មាតហ្វូននៅលើពិភពលោកផងដែរ បើធៀបទៅនឹងឆ្នាំ 2017។ ក្រុមហ៊ុនផលិតជាច្រើនសង្ឃឹមថា ពួកគេនឹងប្រើប្រាស់នូវសមាសភាគដែលគេផលិតនេះ នឹងអាចប្រើប្រាស់នៅលើ iPhones ម៉ូដែលថ្មីៗ ខាងមុខនេះផងដែរ៕