ក្រុមហ៊ុន HMD Global បានកំណត់យកនូវថ្ងៃទី 21 ខែសីហាខាងមុខនេះ សម្រាប់ការរៀបចំនូវព្រឹត្តិការណ៍មួយរបស់ខ្លួននៅក្នុងប្រទេសឥណ្ឌា ស្របពេលដែលក្រុមហ៊ុនបច្ចេកវិទ្យាជាច្រើននៅមិនទាន់ទម្លាយនូវផលិតផលអ្វីដែលមានគម្រោងនឹងបង្ហាញនោះ។ ក្រុមហ៊ុននេះ ទំនងជាបង្ហាញនូវស្មាតហ្វូន Nokia 6.1 Plus នៅក្នុងប្រទេសឥណ្ឌា ដែលនេះ គឺជាម៉ូដែលសម្រាប់ដាក់លក់នៅលើពិភពលោករបស់ស្មាតហ្វូន Nokia X6 ។
គួរបញ្ជាក់ថា ស្មាតហ្វូននេះ បានបង្ហាញខ្លួននៅក្នុងតៃវ៉ាន់ និងហុងកុងកាលពីខែមុននេះ ហើយវាមានតម្លៃ HK$ 2,288 ដែលប្រហែលជា $290។ មានការរំពឹងថាស្មាតហ្វូននេះ នឹងមានតម្លៃថោកជាងសម្រាប់ការដាក់លក់នៅក្នុងប្រទេសឥណ្ឌា ដែលអាចធ្វើការប្រកួតប្រជែងជាមួយនឹងស្មាតហ្វូន Xiaomi Redmi Note 5 Pro និងស្មាតហ្វូន Asus Zenfone Max Pro M ។ នៅក្នុងប្រទេសឥណ្ឌា ស្មាតហ្វូននេះនឹងមានពីរពណ៌សម្រាប់ធ្វើការជ្រើសរើសគឺពណ៌ខៀវ និងពណ៌ស។
កន្លងមក ក្រុមហ៊ុន HMD Global ក៏បានបង្ហោះអំពីព្រឹត្តិការណ៍សម្រាប់ធ្វើការបង្ហាញនូវផលិតថ្មីរបស់ខ្លួននៅក្នុងប្រទេសឥណ្ឌាតាមរយៈបណ្តាញសង្គម Twitter ។ នៅក្នុងព្រឹត្តិការណ៍នៅថ្ងៃទី 21 ខែសីហាខាងមុខនេះ ក្រុមហ៊ុននេះ ក៏ប្រហែលជាបង្ហាញនូវស្មាតហ្វូនជាច្រើនទៀតដូចជា Nokia 5.1 ឬ Nokia 2.1។ សូមបញ្ជាក់ថា ស្មាតហ្វូន Nokia 6.1 Plus ប្រើប្រាស់នូវអេក្រង់ទំហំ 5.8-inch Full-HD+ display ជាមួយនឹងកម្រិតភាពច្បាស់ 2280x1080 pixels អេក្រង់កម្រិត 19:9 aspect ratio និងកញ្ចក់ការពារ 2.5D Corning Gorilla Glass 3 ផងដែរ។ ស្មាតហ្វូននេះប្រើប្រាស់នូវបន្ទះឈីប Qualcomm Snapdragon 636 processor រ៉េមទំហំ 4GB និងម៉េមូរីក្នុងម៉ាស៊ីនទំហំ 64GB។
ស្មាតហ្វូននេះក៏មានរន្ធដោត microSD Card ដែលអ្នកប្រើប្រាស់អាចធ្វើការពង្រីកនូវទំហំសម្រាប់ប្រើប្រាស់ផងដែរ។ សម្រាប់ការថតរូបភាពវិញនោះ ស្មាតហ្វូននេះប្រើប្រាស់នូវប្រព័ន្ធកាមេរ៉ាភ្លោះទំហំ 16-megapixel primary sensor ជាមួយនឹង f/2.0 aperture និងកាមេរ៉ាមួយទៀតទំហំ 5-megapixel secondary camera sensor ដែលមាន f/2.4 aperture ។សម្រាប់កាមេរ៉ាខាងមុខរបស់វាមានទំហំ 16-megapixel ភ្ជាប់ជាមួយនឹងមុខងារ f/2.0 aperture សម្រាប់ថតរូប Selfies និងវីដេអូផងដែរ។ សម្រាប់ការតភ្ជាប់នៅលើស្មាតហ្វូននេះ នឹងប្រើប្រាស់នូវប្រព័ន្ធ 4G VoLTE, WiFi 802.11 ac (2.4GHz + 5GHz), Bluetooth 5, GPS / GLONASS និង USB Type-C ។ ស្មាតហ្វូននេះប្រើប្រាស់នូវប្រព័ន្ធប្រតិបត្តិការ Android 8.1 Oreo operating system ថាមពលថ្ម 3,060mAh និងការទ្រទ្រង់នូវបច្ចេកវិទ្យា Quick Charge 3.0 fast charging ផងដែរ៕