2019 គឺជាឆ្នាំមួយដ៏ល្អដែលក្រុមហ៊ុនបច្ចេកវិទ្យាជាច្រើនបញ្ចេញនូវស្មាតហ្វូនថ្នាក់ប្រណិតរបស់ខ្លួនរួមជាមួយនឹងស្មាតហ្វូនដែលមានអេក្រង់ដែលអាចបត់បានថែមទៀត។ ក្រុមហ៊ុនបច្ចេកវិទ្យាជាច្រើនក៏ត្រូវគេរំពឹងថានឹងចូលរួមប្រកួតប្រជែងទៅលើស្មាតហ្វូនដែលមានអេក្រង់បត់បានផងដែរ ប៉ុន្តែស្មាតហ្វូនដែលមានអេក្រង់ដ៏ប្រណិតរបស់ក្រុមហ៊ុន Samsung គឺមានការទន្ទឹងរង់ចាំជាច្រើនពីអ្នកប្រើប្រាស់។
ព័ត៌មានថ្មីបំផុតពេលនេះ បានបង្ហាញថា ក្រុមហ៊ុនបច្ចេកវិទ្យាយក្ស Samsung មានគោលដៅក្នុងការបញ្ចេញនូវស្មាតហ្វូននេះនៅដើមឆ្នាំ 2019 ដើម្បីធ្វើការប្រកួតប្រជែងជាមួយនឹងក្រុមហ៊ុនបច្ចេកវិទ្យា Huawei ដែលគ្រោងត្រៀមខ្លួនប្រកាសបង្ហាញស្មាតហ្វូនបត់បាននៅលើទីផ្សារឆាប់ៗនេះផងដែរ។
ប្រភពជាច្រើនដែលមានទំនាក់ទំនងជិតស្និទ្ធិជាមួយនឹងសារព័ត៌មាន Wall Street Journal បានទម្លាយថា ស្មាតហ្វូននេះនឹងមានអេក្រង់ទំហំ 7អ៊ីង។ ខណៈពេលដែលស្មាតហ្វូននេះនៅមិនទាន់មានព័ត៌មានទម្លាយច្រើននោះ វាប្រហែលជាមានកម្រិតសមាមាត្រ 4:3 ជាមួយនឹងការពង្រីកអេក្រង់កាន់តែធំសម្រាប់ស្មាតហ្វូននេះ។
ស្មាតហ្វូននេះនៅពេលដែលបត់ទៅគឺមានរូបរាងដូចជាកាបូបលុយ ហើយវាក៏មានអេក្រង់ទីពីរ secondary display តូចមួយនៅខាងក្រៅសម្រាប់ធ្វើការបង្ហាញម៉ោង ការជូនដំណឹង Notifications និងព័ត៌មានសំខាន់ជាច្រើនទៀត។ សម្រាប់កាមេរ៉ាខាងក្រោយរបស់ស្មាតហ្វូននេះនឹងស្ថិតនៅលើផ្នែកពាក់កណ្តាលទៀតរបស់វា។
ក្រុមហ៊ុន Samsung ត្រូវគេនិយាយថាកំពុងតែធ្វើការបង្កើតនូវស្មាតហ្វូនដែលមានអេក្រង់ដែលអាចបត់បានចាប់តាំងពីឆ្នាំ 2014 ដូចនេះ យើងមិនអាចរង់ចាំមើលថាតើស្មាតហ្វូនស៊េរីថ្មីនេះ នឹងមានលក្ខណៈពិសេសអ្វីខ្លះទៅបើធៀបជាមួយនឹងក្រុមហ៊ុនបច្ចេកវិទ្យាជាច្រើនទៀតនោះ? សម្រាប់ស្មាតហ្វូនដែលមានអេក្រង់ដែលអាចបត់បាននេះនឹងមានតម្លៃថ្លៃកប់មិនធម្មតានោះទេ៕