F9 គឺជាស្មាតហ្វូនស៊េរីទំនើបចុងក្រោយបំផុតរបស់ Oppo ដែលវាត្រូវបានក្រុមហ៊ុនធ្វើការសម្រិតសម្រាំងផលិតឡើងយ៉ាងពិសេសដើម្បីប្រគូតប្រជែងទីផ្សារស្មាតហ្វូនធុនកណ្តាល និងបំពេញចិត្តអតិថិជនដែលគាំទ្រស្មាតហ្វូនរបស់ខ្លួន។ ស្មាតហ្វូនជំនាន់ថ្មីនេះត្រូវបានធ្វើការរចនាឡើងថ្មីមានភាពស៊ីវិល័យទាក់ភ្នែកជាមួយបន្ទះអេក្រង់បង្ហាញកម្រិត 19.5:9 aspect ratio ជាអេក្រង់លាតពេញផ្ទៃទំហំ 6.3” Full-HD LTPS IPS LCD រំលេចរចនាបថដោយគែម notch តូចរាងអក្សរ “V” ដែល Oppo ហៅថា “Waterdrop Screen”។
អេក្រង់របស់ស្មាតហ្វូន ទ្រទ្រង់ការបង្ហាញចេញបានក្នុងកម្រិត Full-HD+ ទំហំ 1080x2340px នៅលើផ្ទៃបង្ហាញសរុបដល់ទៅ 90.8% និងមានកម្រិតដង់ស៊ីតេភាពច្បាស់លើផ្ទៃអេក្រង់ 409ppi។ បន្ថែមពីនេះអេក្រង់ F9 ត្រូវបានស្រោបការពារដោយកញ្ចក់ Corning Gorilla Glass 6 ដែលជាជំនាន់ចុងក្រោយបំផុតរបស់ក្រុមហ៊ុន Corning ដែលទើបប្រកាសចេញថ្មីៗនេះថែមទៀតផង ហើយ F9 ក៏ជាស្មាតហ្វូនដំបូងគេបង្អស់ដែលមានវាសនាប្រើប្រាស់កញ្ចក់ការពារអេក្រង់ដ៏ធន់រឹងមាំនេះ។
បន្ទាប់ពីមានអេក្រង់ដ៏ស្រស់ស្អាតទំនើបទៅហើយចំនុចកាមេរ៉ាថតរូបក៏ជាចំនុចខ្លាំងរបស់ស្មាតហ្វូន F Series ជំនាន់ថ្មីនេះផងដែរដោយវាមានកាមេរ៉ាខាងក្រោយជាលែនកាមេរ៉ាភ្លោះដែលកាមេរ៉ាគោលមានទំហំ 16MP មាន aperture f/1.8 និងមួយគ្រាប់ទៀតជាកាមេរ៉ាជំនួយក្នុងការថតរូបព្រាលផ្ទៃ (bokeh effect) មានទំហំ 2.0MP។ ចំពោះកាមេរ៉ាថតសែលហ្វីវិញគឺមានទំហំដល់ទៅ 25MP មានទំហំ aperture f/2.0 ដែលរំលេចនៅក្នុង V-notch ទ្រទ្រង់នូវមុខងារ HDR និង AI។
Oppo F9 ប្រើប្រាស់បន្ទះឈីប MediaTek Helio P60 ទ្រទ្រង់នូវបច្ចេកវិទ្យា AI រត់ដោយអង្គគណនា 8-core មានល្បឿន 2.0GHz និងប្រើអង្គក្រាហ្វិចស៊េរី Mali-G72 MP3។ ស្មាតហ្វូននេះមានម៉ាស៊ីនពីរជម្រើសគឺ 4GB & 6GB RAM ជាមួយទំហំផ្ទុកក្នុងម៉ាស៊ីនស្រាប់ 64GB និងអាចដាក់បន្ថែមទំហំម៉េមូរីក្រៅបានដល់ 256GB ត្រង់ជើងស៊ីមកាតទីពីរ។ Oppo បានដាក់អោយ F9 ប្រតិបត្តិការលើ ColorOS 5.2 ដែលទ្រទ្រង់ដោយ Android 8.1 Oreo ចេញពីប្រអប់។
ស្មាតហ្វូននេះមានថ្មប្រភេទ Li-Po កំលាំង 3,500mAh ទ្រទ្រង់នូវបច្ចេកវិទ្យាសាកបញ្ចូលថាមពលថ្មល្បឿនលឿនបំផុត VOOC Flash Charge ដែលទ្រទ្រង់ចរន្តកម្រិត 5V/4A 20W ដោយសាក 5 នាទីអាចកំដរការនិយាយទូរស័ព្ទបានដល់ទៅ 2 ម៉ោងឯណោះ។ រាងសោកស្តាយបន្តិចដោយសារតែ F9 នៅតែបន្តប្រើរន្ធដោតប្រភេទ micro USB2.0 មិនលោតដល់ប្រភេទ USB-C។ Oppo បានបើកអោយធ្វើការបញ្ជាទិញមុនសម្រាប់ស្មាតហ្វូន Oppo F9 រីឯការដឹកជញ្ជូននឹងចាប់ផ្តើមនៅថ្ងៃទី 24 ខែសីហាសប្តាហ៍ក្រោយនេះ។
ចំពោះតម្លៃខ្លួនរបស់វានៅក្នុងទីផ្សារប្រទេសវៀតណាមគឺ 7,690,000 ដុងឬប្រហែល 330 ដុល្លារ ឬ 290 អឺរ៉ូសម្រាប់ម៉ូដែល 4GB RAM ជាមួយពណ៌បីជម្រើសគឺក្រហម (Sunrise Red), ខៀវ (Twilight Blue) និងស្វាយ (Starry Purple)៕
