ប្រទេសឥណ្ឌា គឹជាទីផ្សារលក់ស្មាតហ្វូនដ៏ធំលំដាប់ទីពីរ នៅក្នុងពិភពលោកបន្ទាប់ពីប្រទេសចិន ម៉្លោះហើយមានក្រុមហ៊ុនផលិតស្មាតហ្វូនធំៗនៅជុំវិញពិភពលោក បាននំាគ្នាសម្រុកនាំយកស្មាតហ្វូនរបស់ខ្លួនទៅកាន់ទីផ្សារប្រទេសមួយនេះ។ យោងតាមរបាយការណ៍របស់ក្រុមហ៊ុន IDC បានបង្ហាញអោយដឹងថាក្នុងត្រីមាសទីពីរឆ្នាំ 2018 នេះ ការនាំចូលទូរស័ព្ទស្មាតហ្វូនពីបណ្តាក្រុមហ៊ុននានាចូលទៅចរាចរលក់ក្នុងទីផ្សារប្រទេសឥណ្ឌាមានចំនួន 44 លានគ្រឿងឯណោះដែលបានកើនឡើងប្រមាណ 29% បើធៀបនឹងត្រីមាសដូចគ្នាកាលពីឆ្នាំ 2017។
នៅក្នុងរបាយការណ៍របស់ IDC បានបង្ហាញទៀតថា ក្រុមហ៊ុនដែលនាំស្មាតហ្វូនចូលទៅចរាចរលក់ក្នុងទីផ្សារប្រទេសឥណ្ឌា បានច្រើនជាងគេ កាលពីត្រីមាសទីពីរគឺក្រុមហ៊ុន Xiaomi របស់ចិនដោយបាននាំមុខក្រុមហ៊ុនយក្សរបស់កូរ៉េខាងត្បូង Samsung។ នៅក្នុងទិន្នន័យរបស់ IDC បានបង្ហាញថា Xiaomi បានកាន់កាប់ចំនែកទីផ្សារលក់សរុប 29.7% ជាមួយការចេញលក់ស្មាតហ្វូន បានចំនួន 10 លានគ្រឿង រីឯ Samsung វិញបានកាន់កាប់ចំនែកទីផ្សារ 23.9% ជាមួយការចេញលក់ស្មាតហ្វូនបានចំនួនត្រឹមតែ 8 លានគ្រឿងប៉ុណ្ណោះ។
ស្មាតហ្វូនដែលធ្វើអោយ Xiaomi អាចឈរជើងរឹងមាំខ្លាំងលើទីផ្សារប្រទេសឥណ្ឌា គឺមានម៉ូដែល Redmi 5, Redmi 5A, Redmi Note 5 និង Redmi Note 5 Pro ចំនែកស្មាតហ្វូនរបស់ Samsung ដែលទទួលបានប្រជាប្រិយភាពខ្លាំងសម្រាប់ប្រជាជនឥណ្ឌាមានដូចជាម៉ូដែល Galaxy J6, J7 Nxt និង Galaxy J2 (2018)។ ក្រុមហ៊ុនដែលរត់ពីក្រោយ Xiaomi និង Samsung គឺមាន ViVo, Oppo, Transsion (Tecno) ដែលមានចំនែកទីផ្សារ 12.7%, 7,6% និង 5.0% ហើយក្រុមហ៊ុន Huawei ត្រូវបានខ្ទាតចេញពីចំណាត់ថ្នាក់លេខ 5 ក្នុងតារាងដោយសារតែក្រុមហ៊ុន Transsion ក្នុងត្រីមាសទីឆ្នាំនេះ។ IDC បានបញ្ជាក់បន្ថែមថា ក្រុមហ៊ុន OnePlus បាននាំមុខ Samsung និង Apple ក្នុងទីផ្សារស្មាតហ្វូនថ្នាក់ខ្ពស់ (Premium Phone Market) ដែលមានតម្លៃចាប់ពី $500 ឡើងទៅ៕