ជាថ្មីម្តងទៀតក្រុមហ៊ុន Caviar របស់ប្រទេសរុស្ស៊ីដែលជាក្រុមហ៊ុនល្បីឈ្មោះខាងការរចនាបន្ថែមទៅលើស្មាតហ្វូនអោយកាន់តែមានភាពប្រណិត ឬហៅថា Luxury Phone និងមានតម្លៃថ្លៃជាងតម្លៃដើមនោះ ឥលូវនេះបានបង្ហាញស្នាដៃក្នុងការច្នៃប្រឌិតជាថ្មីម្តងទៀតទៅលើកំពូល ស្មាតហ្វូន Samsung Galaxy Note 9 ដែលទើបនឹងត្រូវបានក្រុមហ៊ុនធ្វើការប្រកាសចេញកាលពីថ្ងៃទី 09 ខែសីហាកន្លងទៅថ្មីៗនេះ។
កំពូលស្មាតហ្វូននេះត្រូវបានបង្ហាញខ្លួនឡើងជាមួយការរចនាកាន់តែមានភាពប្រណិតងាយស្រួលប្រើជាងជំនាន់មុនដោយមានអេក្រង់ទំនើប Super AMOLED Infinity Display ទំហំ 6.3” និងមានផ្ទៃខាងក្រោយស្រោបដោយកញ្ចក់ការពារប្រភេទ Corning Gorilla Glass 5 ដែលមានជម្រើសបួនពណ៌។ សម្រាប់តម្លៃរបស់ Note 9 វិញត្រូវបានក្រុមហ៊ុនប្រកាសដាក់លក់ខ្ទង់ $1000 ឬក៏ទាបជាងនេះតាមទីផ្សារក្នុងប្រទេសមួយចំនួន។
ជាក់ស្តែងសម្រាប់ទីផ្សារក្នុងប្រទេសកម្ពុជាយើងវិញវាមានតម្លៃត្រឹមតែ $929 ជាមួយនឹងការបន្ថែមគ្រឿង accessories ជាច្រើនទៀតដែលមានតម្លៃជាង $200 ហើយតម្លៃនេះត្រូវបានគេមើលឃើញថាធូរថ្លៃជាងកំពូលស្មាតហ្វូនរបស់ក្រុមហ៊ុនដទៃទៀត។ ឥលូវសូមក្រលេកមកមើល Galaxy Note 9 Fine Gold Edition ដែលជាម៉ូដែលថ្មីត្រូវបានក្រុមហ៊ុន Caviar របស់រុស្ស៊ីយកទៅច្នៃប្រឌិតបន្ថែមវិញម្តងដោយបានស្រោបលើស៊ុមជុំវិញ និងផ្ទៃខាងក្រោយដោយមាសសុទ្ធដែលមានទំងន់ដល់ទៅ 1000 ក្រាម (1គីឡូក្រាម) ដែលធ្វើអោយកំពូលស្មាតហ្វូន Note ជំនាន់ថ្មីនេះកើនតម្លៃថ្លៃហួសពីការស្មាន។
យើងឃើញថាការរចនាលើផ្ទៃមាសខាងក្រោយរបស់វាគឺមានឆ្លាក់រំលេចដោយពាក្យ FINE GOLD 999.9 នៅខាងក្រោមទ្រនាប់ស្កែនក្រយ៉ៅម្រាមដៃ និងនៅជិតគែមខាងក្រោមមានពាក្យ NET WT 1000g ដែលបញ្ជាក់ពីទំងន់មាសដែលបានប្រើជាមួយឈ្មោះក្រុមហ៊ុន CAVIAR នៅពីក្រោម។ Galaxy Note 9 Fine Gold Edition ត្រូវបានក្រុមហ៊ុន Caviar ប្រកាសដាក់លក់ក្នុងតម្លៃខ្ទង់ RUB3,87 លាន (រូបិយប័ណ្ណរុស្ស៊ី) ឬជាង $60,000 អាមេរិក ឬប្រហែល €50,000 អឺរ៉ូសម្រាប់ម៉ូដែល 128GB ហើយបើចង់បានម៉ូដែល 256GB ត្រូវថែមលុយប្រមាណ $300 ឬ €250 បន្ថែមទៀត។ តម្លៃនេះពិតជាមិនធម្មតាឡើយគឺអាចទិញរថយន្តស៊េរីទំនើបមួយបានយ៉ាងធូរ៕