យោងតាមប្រភពព័ត៌មានថ្មីមួយ ដែលចេញផ្សាយដោយ Nekei Review បានអោយដឹងថា នៅពេលនេះ ប្រទេសចិន ត្រូវគេរំពឹងថា នឹងវ៉ាដាច់ទីផ្សាររបស់ប្រទេសជប៉ុនលើវិស័យរថយន្តនៅក្នុងឆ្នាំនេះ ស្របពេលដែលក្រុមហ៊ុន Toyota Motor និងក្រុមហ៊ុនផលិតរថយន្តជាច្រើនទៀត គ្រោងនឹងពង្រីកនូវការផលិតរបស់ខ្លួននៅក្នុងប្រទេសនេះ។ ក្រុមហ៊ុនផលិតរថយន្តធំៗចំនួន 7 នៅក្នុងប្រទេសអាស៊ីមួយនេះ បានលក់រថយន្តស៊េរីថ្មីរបស់ខ្លួន បានចំនួន 2.65 លានគ្រឿង គិតចាប់ពីខែមករា ដល់ខែកក្កដា ដែលគេដឹងថា គឺមានការកើនឡើង 5% បើប្រៀប ធៀបទៅនឹងឆ្នាំមុន ស្របពេលដែលការលក់រយៈពេលមួយឆ្នាំ គឺមានចំនួនប្រហែលជា 5 លានគ្រឿង។ រីឯការលក់នៅក្នុងប្រទេសជប៉ុន គឺមានប្រហែលជា 4.9 លានគ្រឿង ប៉ុណ្ណោះ។
គួរបញ្ជាក់ថា ប្រទេសចិន បានក្លាយជាទីផ្សារបន្ថែមសម្រាប់ក្រុមហ៊ុនផលិតរថយន្តរបស់ជប៉ុន តាំងពីដើមឆ្នាំ 2010 មកម្លេះ។ ប៉ុន្តែនៅក្នុងរយៈពេល 5 ឆ្នាំនេះ គឺមានការផ្លាស់ប្តូរច្រើន ដោយការលក់នៅក្នុងប្រទេសចិន គឺមានការកើនឡើងដល់ទៅ 60%។ ប្រទេសចិនត្រូវបានជាប់ចំណាត់ថ្នាក់ថាជាទីផ្សាររថយន្តធំបំផុត នៅក្នុងពិភពលោក ដែលមានគម្រោងក្នុងការលក់រថយន្តដល់ទៅ 30 លានគ្រឿងនៅក្នុងឆ្នាំនេះ ស្របពេលដែលការលក់រថយន្តនៅក្នុងសហរដ្ឋអាមេរិក គឺមានចំនួនត្រឹមតែ 17.5 លានគ្រឿងប៉ុណ្ណោះ។ ទីក្រុងប៉េកាំង ក៏មានបំណងចង់អោយប្រទេសរបស់ខ្លួនជាទីផ្សារ បើកចំហរសម្រាប់ក្រុមហ៊ុនបរទេសធ្វើការវិនិយោគសម្រាប់ទីផ្សារបើកចំហរនេះផងដែរ។
នៅក្នុងសង្រ្គាមពាណិជ្ជកម្មដ៏តានតឹងរវាងសហរដ្ឋអាមេរិក និងប្រទេសចិននោះ ក្រុមហ៊ុនផលិតរថយន្តជាច្រើន នៅតែកំពុងត្រៀមខ្លួនក្នុងការផលិតរថយន្តកាន់តែច្រើនសម្រាប់ទីផ្សារមួយនោះ ប៉ុន្តែក្រុមហ៊ុនទាំងនេះ ក៏ប្រយុទ្ធប្រឆាំងទៅនឹងការយកពន្ធខ្ពស់ផងដែរ។ ក្រុមហ៊ុន Toyota ធ្វើការវិនិយោគទឹកប្រាក់ 100 billion yen ($900 million) សម្រាប់ការផលិតរបស់ខ្លួននៅក្នុងប្រទេសចិន ដែលបច្ចុប្បន្នមានរថយន្តចំនួន 1.16 លានគ្រឿងប្រហែលជា 20%។ ក្នុងនោះ ក៏មានគម្រោងក្នុងការផលិតបន្ថែមចំនួន 120,000 គ្រឿងទៀត នៅក្នុងរោងចក្រនៅ Tianjin ដែលធ្វើការសហការជាមួយនឹងក្រុមហ៊ុន FAW Group នឹងការបង្កើនការផលិតនៅក្នុងរោងចក្រ Guangzhou ជាមួយនឹងក្រុមហ៊ុន Guangzhou Automobile Group ។ សម្រាប់ការពង្រីកបន្ថែមគឺផ្តោតទៅលើរថយន្តអគ្គិសនី និងរថយន្ត plug-in hybrids ។ ប្រទេសចិននឹងតម្រូវអោយក្រុមហ៊ុនផលិតរថយន្តអគ្គសីទាំងអស់ចាប់ផ្តើមធ្វើការផលិតរថយន្តនេះនៅឆ្នាំក្រោយនេះ។
ក្រុមហ៊ុន Toyota រំពឹងថា ការលក់នៅក្នុងប្រទេសចិននឹងមានការកើនឡើង 9% នៅក្នុងឆ្នាំនេះ ដែលមានការលក់រថយន្តដល់ទៅ 1.4 លានគ្រឿង។ ក្រុមហ៊ុនផលិតរថយន្តនេះក៏មានគម្រោងក្នុងការបង្កើតនូវរថយន្តអគ្គិសនីម៉ាក Toyota នៅក្នុងប្រទេសចិននៅក្នុងឆ្នាំ 2020 ផងដែរ។ សម្រាប់អង្គភាពថ្មីនេះនឹងចាប់ផ្តើមប្រតិបត្តិការរបស់ខ្លួននៅដើមឆ្នាំ 2020 ហើយក្រុមហ៊ុន Toyota នឹងធ្វើការប្រកួតប្រជែងជាមួយនឹងក្រុមហ៊ុន Volkswagen និង General Motors ដែលកំពុងតែនាំមុខនៅក្នុងទីផ្សារនៃប្រទេសចិននេះ។ ក្រុមហ៊ុនផលិតរថយន្តនេះ មានក្តីសង្ឃឹមក្នុងការបង្កើតនូវបច្ចេកវិទ្យាអេឡិចត្រូនិកនេះនៅក្នុងប្រទេសចិន។
លោក Kazuhiro Kobayashi ប្រធានគ្រប់គ្រងជាន់ខ្ពស់គ្រប់គ្រងប្រតិបត្តិការនៅក្នុងប្រទេសចិននិយាយថា “យើងកំពុងតែធ្វើការនៅលើរថយន្តអគ្គិសនីនៅទីនេះមុនគេ។” ក្រុមហ៊ុន Toyota ចាត់ទុកអាមេរិកខាងជើងជាអាជីវកម្មសំខាន់របស់ខ្លួនផងដែរ។ ក្រុមហ៊ុននេះ មានរោងចក្រចំនួន 8 នៅក្នុងអាមេរិកខាងជើងជាមួយនឹងការផលិតរថយន្តចំនួន 2.02 លានគ្រឿង ហើយវាមានការលក់នៅក្នុងតំបន់កើនឡើងដល់ទៅ 2.76 លានគ្រឿងកាលពីឆ្នាំមុននេះ។
ក្រុមហ៊ុន Toyota មិនមែនបង្កើនការផលិតរបស់ខ្លួននៅក្នុងប្រទេសចិននោះទេ។ ក្រុមហ៊ុន Honda Motor ក៏ត្រៀមបញ្ចេញនូវរថយន្តអគ្គិសនីរបស់ខ្លួនសម្រាប់ប្រទេសចិននៅឆ្នាំនេះ ផងដែរ ហើយក្រុមហ៊ុនមានគម្រោងក្នុងការបញ្ចេញរថយន្តអេឡិចត្រូនិកចំនួន 20 ម៉ូដែលនៅត្រឹមឆ្នាំ 2025 នេះ។ ក្រុមហ៊ុន Nissan Motor ក៏ចូលរួមជាមួយនឹងក្រុមហ៊ុន Dongfeng Motor Group ក្នុងការចំណាយទឹកប្រាក់ 60 billion yuan ($8.71 billion) នៅក្នុងការពង្រឹក និងអភិវឌ្ឍរថយន្តអេឡិចត្រូនិកនៅត្រឹមឆ្នាំ 2022 នេះ។ ថ្មីៗនេះ ការលក់រថយន្តនៅក្នុងសហរដ្ឋអាមេរិកក៏មានការធ្លាក់ចុះផងដែរដោយសារតែការជួញដូរពាណិជ្ជកម្មរបស់ទីក្រុងវ៉ាស៊ីនតោននោះ៕