ក្រុមហ៊ុនបច្ចេកវិទ្យាយក្ស Samsung Electronics ទំនងជានឹងបង្ហាញនូវស្មាតហ្វូនដែលអាចបត់បាននៅក្នុងព្រឹត្តិការណ៍ជំនួបអ្នកអភិវឌ្ឍកម្មវិធី Samsung Developer Conference ដែលនឹងធ្វើឡើងនៅក្នុងទីក្រុង San Francisco នៅថ្ងៃទី 7-8 ខែវិច្ឆិកាខាងមុខនេះ។ ថ្មីៗនេះ មានពាក្យចចាមអារ៉ាមនៅលើទីផ្សារ បានបង្ហាញថា ស្មាតហ្វូនដែលជារបកគំហើញច្នៃប្រឌិតថ្មីនេះ នឹងផ្សព្វផ្សាយជាសាធារណៈនៅក្នុងពេលឆាប់ៗនេះ ដោយសារតែក្រុមហ៊ុន Samsung ចង់បង្ហាញថា ខ្លួននឹងទទួលបានឈ្មោះជាអ្នកបង្កើតនូវស្មាតហ្វូន ដែលអាចបត់បានមុនគេបំផុតក្នុងពិភពលោកនោះ។
បុគ្គលិកម្នាក់ប្រាប់ទៅកាន់សារព័ត៌មាន Chosun Ilbo នៅថ្ងៃទី 10 ខែកញ្ញានេះថា “មុនពេលដែលស្មាតហ្វូនបត់បាននេះដាក់លក់នៅដើមឆ្នាំក្រោយនេះ ក្រុមហ៊ុន Samsung ត្រូវបានគេរំពឹងថា នឹងបង្ហាញនូវលក្ខណៈសម្បត្តិលម្អិតនៃ Hardware ការរចនារូបរាង UI និងបទពិសោធន៍ថ្មីសម្រាប់អ្នកប្រើប្រាស់នៅក្នុងព្រឹត្តិការណ៍សន្និសីទកាសែតនេះ។” គម្រោងនូវក្នុងការប្រកាសចេញនេះ នឹងជួយអោយសន្នីសីទរបស់ក្រុមហ៊ុនបច្ចេកវិទ្យា Samsung អាចក្លាយជាព្រឹត្តិការណ៍មួយដូចគ្នាទៅនឹង Apple’s WWDC និង Google I/O អញ្ចឹងដែរ ដោយមានការចាប់អារម្មណ៍បន្ថែមទៀតសម្រាប់អ្នកអភិវឌ្ឍក្នុងការពង្រីកនូវប្រព័ន្ធ Mobile Ecosystems។ ក្រុមហ៊ុន Apple និង Google បានបង្ហាញនូវផលិតផលថ្មីៗ និងដំណោះស្រាយជាច្រើននៅក្នុងព្រឹត្តិការណ៍សន្នីសីទសម្រាប់អ្នកអភិវឌ្ឍកម្មវិធីជារៀងរាល់ឆ្នាំ ហើយវាក៏មានការយកចិត្តទុកដាក់ពីអ្នកសារព័ត៌មាន និងអ្នកប្រើប្រាស់ផងដែរ។
ជាមួយនឹងការបង្ហាញវត្តមានរបស់ស្មាតហ្វូនដែលអាចបត់បាននេះ ក្រុមអ្នកអភិវឌ្ឍកម្មវិធី អាចទទួលបាននូវគំនិតថ្មីៗអំពីអ្វីដែលស្មាតហ្វូនមានអេក្រង់បត់បានរបស់ក្រុមហ៊ុន Samsung មានលក្ខណៈពិសេសយ៉ាងណាខ្លះ។ ស្របពេលដែលក្រុមហ៊ុនផលិតស្មាតហ្វូនរបស់ចិន Huawei បាននឹងកំពុងតែធ្វើការត្រួតពិនិត្យទៅលើសមិទ្ធិផលថ្មីរបស់ខ្លួនផងដែរ ព្រោះថា ក្រុមហ៊ុននេះ ក៏មានគម្រោងក្នុងការបង្ហាញនូវស្មាតហ្វូន ដែលអាចបត់បានរបស់ខ្លួននៅក្នុងខែដូចគ្នា។
លោក Koh Dong-jin ដែលជានាយកប្រតិបត្តិផ្នែកអាជីវកម្មស្មាតហ្វូនរបស់ក្រុមហ៊ុន Samsung បាននិយាយនៅក្នុងព្រឹត្តិការណ៍សន្នីសីទមួយ កាលពីខែសីហាថា ក្រុមហ៊ុនបច្ចេកវិទ្យាយក្ស Samsung មិនចង់បាត់បង់ចំណាត់ថ្នាក់ដំបូងបំផុតក្នុងពិភពលោកនោះទេ។ តាមការបញ្ជាក់របស់ប្រភពជាច្រើននោះ ស្មាតហ្វូនដែលអាចបត់បានដំបូងបំផុត របស់ក្រុមហ៊ុន Samsung នឹងមានអេក្រង់ទំហំ 7.3 អ៊ីងប្រភេទ OLED ដែលអាចបត់បានជាមួយនឹងភាពកោង 1.5មម និងមានការបន្ថែមនូវអេក្រង់ទំហំ 4.6 អ៊ីងប្រភេទ OLED ស្ថិតនៅផ្នែកម្ខាងទៀតរបស់ស្មាតហ្វូននេះផងដែរ។ ជាមួយគ្នានេះ ក៏ការប្រកាសបង្ហាញនូវដំណោះស្រាយជាច្រើនសម្រាប់ស្មាតហ្វូនដូចជាបច្ចេកវិទ្យា AI Speakers ដែលទំនងជាបង្ហាញខ្លួនជាមួយនឹងស្មាតហ្វូននេះនៅក្នុងព្រឹត្តិការណ៍នេះផងដែរ។