នៅថ្ងៃនេះ ក្រុមហ៊ុន Sony Mobile បានបង្ហាញនូវការចាប់ផ្តើមដាក់អោយមានការកម្មង់ទិញមុនរបស់ស្មាតហ្វូនស៊េរីថ្មី Xperia XZ3 ដែលមានគោលដៅផ្តោតទៅលើអ្នកដែលចូលចិត្តលេងហ្គេម។ សម្រាប់ការប្រកាសនេះ ក្រុមហ៊ុនបច្ចេកវិទ្យារបស់ជប៉ុននេះ បានសហការជាមួយនឹងក្រុមហ៊ុន Activision ដើម្បីផ្តល់អោយអតិថិជននៅក្នុងទ្វីបអ៊ឺរ៉ុប ដែលបានកម្ម៉ង់ទិញមុននូវស្មាតហ្វូនស៊េរីថ្មី Sony Xperia XZ3 នេះ នូវ Digital Game របស់ហ្គេម Call of Duty: Black Ops 4 ដោយឥតគិតថ្លៃផងដែរ។
Sony បានបញ្ជាក់ថា កិច្ចព្រមព្រៀងមួយនេះ ដំណើរការបានសម្រាប់ហាងលក់រាយមួយចំនួនប៉ុណ្ណោះ ដូចនេះអតិថិជនត្រូវតែឆែកមើលកន្លែងណាសិនមុនពេលចាប់ផ្តើមការបញ្ជាទិញមុន។ ដូចអ្វីដែលបានលើកឡើងកាលពីពេលមុនអញ្ចឹង ស្មាតហ្វូននេះ អាចរកទិញបាននៅក្នុងទ្វីបអ៊ឺរ៉ុបតែប៉ុណ្ណោះ ហើយនឹងមានគោលដៅសម្រាប់អ្នកដែលប្រើប្រាស់នូវ PlayStation 4 Console។ នៅពេលដែលអតិថិជន ទទួលបាននូវ digital game នេះអតិថិជនអាចធ្វើការដោនឡូតដោយផ្ទាល់ចេញពីម៉ាស៊ីនលេងហ្គេមរបស់អ្នកផ្ទាល់តែម្តង ហើយការផ្តល់ជូន គឺចាប់ពីថ្ងៃទី 28 ខែកញ្ញានេះតទៅ។
សូមជំរាបថា ហេ្គម Call of Duty: Black Ops 4 ត្រូវបានដាក់អោយដំណើរការនៅគ្រប់ Platforms ទាំងអស់នៅថ្ងៃទី 12 ខែតុលាខាងមុខនេះ ស្របពេលដែលស្មាតហ្វូនស៊េរីថ្មី Xperia XZ3 ត្រូវបានគេរំពឹងថា នឹងដាក់លក់នៅថ្ងៃទី 5 ខែតុលាខាងមុខនេះ គឺមួយសប្តាហ៍មុនការប្រកាសចេញហ្គេមនេះ។ ពេលនេះ ស្មាតហ្វូនស៊េរីថ្មី Sony Xperia XZ3 អាចធ្វើការកម្មង់ទិញបានមុនជាមួយនឹងពណ៌ខ្មៅ ពណ៌ទឹកប្រាក់ និងពណ៌ក្រហម Bordeaux Red ។ ស្មាតហ្វូននេះមានតម្លៃ £699 ឬ €799 នៅក្នុងទ្វីបអ៊ឺរ៉ុប៕