កាលពីថ្ងៃទី 12 កញ្ញានេះ Apple ទើបតែបង្ហាញនូវស្មាតហ្វូនស៊េរីថ្មីរបស់ខ្លួន បានធ្វើអោយគូរប្រកួតប្រជែងជាច្រើន បាននិងកំពុងតែចង់ឈ្នះ iPhone ហើយក៏កំពុងតែស្វែងរកនូវចន្លោះប្រហោងនៃកំហុសឆ្គងរបស់យុទ្ធសាស្រ្តរបស់ Apple នៅក្នុងឆ្នាំនេះផងដែរ។ អ្វីដែលគួរអោយភ្ញាក់ផ្អើលនោះ Samsung មិននិយាយអ្វីនោះទេ ប៉ុន្តែ Huawei ដែលជាអ្នកដណ្តើមបានចំណាត់ថ្នាក់លេខ 2 ពិភពលោកពី Apple នោះ មិននៅស្ងៀមនោះទេ។
ក្រុមហ៊ុន Huawei ធ្លាប់បានធ្វើបែបនេះ បន្ទាប់ពីការបង្ហាញនូវវត្តមានរបស់ស្មាតហ្វូន Galaxy Note 9 ផងដែរ ហើយនៅពេលនេះ ក្រុមហ៊ុនរបស់ប្រទេសចិននេះ ក៏ធ្វើការសើចចំអកទៅលើ Apple ជាមួយនឹងការផ្សព្វផ្សាយថ្មីរបស់ខ្លួនក្នុងការជម្រុញនូវវត្តមានរបស់ស្មាតហ្វូនស៊េរីថ្មី Mate 20 នៅខែក្រោយនេះ។ អ្វីដែលជាក់ស្តែងនេះ សម្រាប់ iPhone ស៊េរីថ្មី ដែលបង្ហាញខ្លួននៅក្នុងឆ្នាំនេះ គឺប្រើប្រាស់នូវបន្ទះឈីបចាស់ៗ ដែលប្រើប្រាស់នៅលើស្មាតហ្វូន iPhone X មើលទៅពិតជាដូចគ្នាបេះបិទ ដោយគ្រាន់តែខុសគ្នាតែទំហំ និងកាមេរ៉ាប៉ុណ្ណោះ។
ក្រុមហ៊ុន Huawei បានហៅការរចនាសម្រាប់ស្មាតហ្វូនស៊េរីថ្មីថា មានលក្ខណៈដូចគ្នាទៅនឹង iPhones X ដែលបង្ហាញខ្លួនកាលពីឆ្នាំមុននេះ គ្មានអ្វីថ្មីនោះទេ ហើយ Huawei ថែមទាំងអរគុណ Apple សម្រាប់ការរក្សានូវអ្វីគ្រប់យ៉ាងជាច្រើនដូចគ្នាដដែល ស្របពេលដែលខ្លួន មានឱកាសក្លាយជាឧបករណ៍ដ៏អស្ចារ្យពិតៗសម្រាប់ឆ្នាំនេះ។ សូមជំរាបថា កន្លងមក Huawei ក៏ធ្លាប់ហៅ Samsung ថា មិនបានស្វែងរកនូវរបកគំហើញថ្មី ដូចគ្នាទៅនឹងអ្វីដែលខ្លួនហៅសម្រាប់ក្រុមហ៊ុន Apple នៅពេលនេះដែរ។ Huawei បាននិយាយទៀតថា ស្មាតហ្វូន Mate 20 នឹងប្រើប្រាស់នូវរបកគំហើញថ្មីដែលខុសប្លែកពីស្មាតហ្វូនជំនាន់មុនៗរបស់ខ្លួន៕