ក្រុមហ៊ុនបិតាបច្ចេកវិទ្យាអាមេរិកបានបើកហាង Apple Store នៅក្នុងបណ្តាប្រទេសជាច្រើននៅទូទាំងសកលលោកដែលបានទាក់ទាញអតិថិជនប្រមាណខ្ទង់ 1 លាននាក់ក្នុងមួយឆ្នាំៗ ព្រមទាំងទទួលបានអតិថិជនចូលទៅទស្សនាផលិតផល Apple ផ្ទាល់ដែលបានដាក់តាំងបង្ហាញក្នុងហាងសរុបប្រមាណជា 500 លាននាក់ជារៀងរាល់ឆ្នាំ។
ស្ថិតក្នុងព្រឹត្តិការណ៍ប្រកាសចេញផលិតទូរស័ព្ទ iPhone ជំនាន់ថ្មី និងនាឡិកាដៃ Apple Watch Series 4 ជំនាន់ថ្មីកាលពីរាត្រីថ្ងៃទី 12 កញ្ញា លោក Tim Cook ដែលជានាយកប្រតិបត្តិជាន់ខ្ពស់របស់ Apple បានឡើងប្រកាសបើកកម្មវិធី ដែលក្នុងកិច្ចចាប់ផ្តើមដំបូងលោកបានមានប្រសាសន៍អោយដឹងថា “មកទល់នឹងពេលនេះគឺមានឧបករណ៍ iOS ចំនួនជិត 2 ពាន់លានគ្រឿងកំពុងស្ថិតក្នុងដៃរបស់អ្នកប្រើប្រាស់នៅទូទាំងសកលលោក”។ ហើយឧបករណ៍ដែលទទួលបានការគាំទ្រខ្លាំងជាងគេបំផុតនោះគឺទូរស័ព្ទ iPhone បន្ទាប់មកឧបករណ៍ iPad និងបន្ទាប់មកទៀតគឺនាឡិកាដៃ Apple Watch។
សម្រាប់នាឡិកា Apple Watch ពេលនេះកំពុងឈរនៅលេខរៀងទីមួយក្នុងទីផ្សារ Smart Watch នៅទូទាំងពិភពលោក ខណៈដែលទីផ្សារ Smart Watch ដែលដើរដោយ Android Wear កំពុងតែប្រឹងប្រែងតស៊ូប្រយុទ្ធយ៉ាងខ្លាំងក្នុងការដណ្តើមចំនែកទីផ្សារនៃឧបករណ៍លម្អរដ៏វៃឆ្លាតមួយនេះ។ លោក Tim Cook បានរំពឹងទុកយ៉ាងខ្លាំងថាក្រោយការបង្ហាញចេញនូវទូរស័ព្ទ iPhone ជំនាន់ថ្មី (iPhone XS, XS Mar, XR) និងនាឡិកាឆ្លាតវៃជំនាន់ថ្មី Apple Watch Series 4 នឹងរឹតតែធ្វើអោយកំណើននៃការនាំចេញឧបករណ៍ iOS មានចំនួនកាន់តែកើនឡើងបន្ថែមទៀតក្នុងពេលអនាគត៕