នារយៈពេលចុងក្រោយនេះ ការប្រកួតប្រជែងទៅលើស្មាតហ្វូនថ្នាក់កណ្តាលនៅក្នុងប្រទេសឥណ្ឌា គឺមានការកើនឡើងកំដៅយ៉ាងខ្លាំងពីមួយថ្ងៃទៅមួយថ្ងៃដោយសារតែក្រុមហ៊ុនបច្ចេកវិទ្យាជាច្រើន បានព្យាយាមបញ្ចេញនូវស្មាតហ្វូនថ្នាក់កណ្តាលដែលមានសមត្ថភាពកាន់តែខ្លាំងក្លានៅក្នុងប្រទេសនេះ។ កាលពីដំបូង Xiaomi បន្ទាប់មក Honor រួចមក Realme ហើយពេលនេះគឺក្រុមហ៊ុន vivo វិញម្តង។
យោងតាមព័ត៌មានចុងក្រោយបំផុតនេះ បានបង្ហាញថា ក្រុមហ៊ុន vivo បាននៅត្រៀមខ្លួនក្នុងការដាក់លក់ស្មាតហ្វូនស៊េរីថ្មីរបស់ខ្លួនផ្តាច់មុខនៅលើអនឡាញក្នុងការប្រកួតប្រជែងជាមួយនឹងស្មាតហ្វូន Oppo’s Realme។ ស្មាតហ្វូនស៊េរីថ្មីទាំងនេះត្រូវបាន គេរំពឹងថាជាស្មាតហ្វូន Z series ដែលមានតម្លៃសមរម្យក្នុងការប្រើប្រាស់។ គួរបញ្ជាក់ថា Oppo គឺជាគូប្រកួតប្រជែងផ្ទាល់របស់ក្រុមហ៊ុន Vivo ហើយក្រុមហ៊ុន vivo ក៏បោះជំហានក្នុងការលក់អនឡាញជាមួយនឹងស្មាតហ្វូនជាច្រើនស៊េរី។
ស្មាតហ្វូន Z series ថ្មីនេះ គឺស្ថិតនៅក្នុងចន្លោះស្មាតហ្វូន X series និងស្មាតហ្វូន Y series ដែលមាននឹងដាក់លក់នៅលើអនឡាញនាពេលខាងមុខ ស្មាតហ្វូននេះនឹងមានឈ្មោះថា vivo Z1i ដែលនឹងបង្ហាញខ្លួននៅក្នុងប្រទេសចិនផងដែរ។ ស្មាតហ្វូន Z series នេះ នឹងផ្តោតទៅលើទីផ្សារអនឡាញ។ ហ្វូនស៊េរីថ្មី Vivo Z1i អាចនឹងមានអេក្រង់ទំហំ 6.26-inch full HD+Display និងមានភ្ជាប់ជាមួយ Notch បន្ទះឈីប Snapdragon 636 SoC រ៉េមទំហំ 4GB និងម៉េមូរីក្នុងម៉ាស៊ីនទំហំ 128GB។ ស្មាតហ្វូននេះ ប្រើប្រាស់ប្រព័ន្ធកាមេរ៉ាភ្លោះទំហំ 13MP+2MP និងកាមេរ៉ាខាងមុខទំហំ 16MP ដំណើរការនូវ Funtouch OS 4.0 និងថាមពលថ្ម 3,260mAh៕
