កាលពីដើមសប្តាហ៍នេះ ក្រុមហ៊ុន Samsung បានបង្ហាញនូវស្មាតហ្វូនស៊េរីថ្មី Galaxy A7 (2018) ដែលបំពាក់នូវប្រព័ន្ធកាមេរ៉ា 3 គ្រាប់ ហើយពេលនេះ ក្រុមហ៊ុនបច្ចេកវិទ្យានេះ ក៏ត្រៀមខ្លួនក្នុងការប្រកាសចេញនូវស្មាតហ្វូនដំបូបំផុតរបស់ខ្លួន ដែលមានកាមេរ៉ា 4 គ្រាប់ ផងដែរ។ ស្មាតហ្វូននេះ ទំនងប្រហែលជា Galaxy A9 Pro (2018) ហើយវាត្រូវគេរំពឹងថា នឹងបង្ហាញខ្លួននៅថ្ងៃទី 11 ខែតុលាខាងមុខនេះ។
កាលពីពេលមុននេះ ការសន្និដ្ឋានបានបង្ហាញថា ក្រុមហ៊ុន Samsung បានត្រៀមខ្លួនក្នុងការបង្ហាញនូវស្មាតហ្វូន ដែលមានតម្លៃថោកជាមួយនឹងប្រព័ន្ធកាមេរ៉ា 4 គ្រាប់ មានគោលបំណងក្នុងការតេស្ត៍សាកល្បងទៅលើទីផ្សារជាមុនសិន។ យោងតាមរបាយការណ៍មួយ បានបញ្ជាក់ថា ក្រុមហ៊ុន Samsung នឹងប្រើប្រាស់នូវកាមេរ៉ាទំហំ 24MP+8MP ជាមួយនឹង Super Wide-Angle Lens 120º។ បន្ថែមពីនេះទៀតនោះ ស្មាតហ្វូននេះ ប្រើប្រាស់នូវកាមេរ៉ា ZOOM Camera ដែលមានទំហំ 10MP+5MP ស្របពេលកាមេរ៉ាខាងមុខរបស់វាមានទំហំ 24MP ថែមទៀត។
ស្មាតហ្វូន Galaxy A9 Pro (2018) ត្រូវបានគេទម្លាយថា នឹងប្រើប្រាស់នូវបន្ទះឈីប Snapdragon 660 ស្របពេលដែលព័ត៌មានរបស់ស្មាតហ្វូននេះ កាលពីពេលមុន បានបញ្ជាក់ថា នឹងប្រើប្រាស់បន្ទះឈីប Snapdragon 710។ ស្មាតហ្វូននេះ នឹងមានអេក្រង់ទំហំ 6.28 អ៊ីង Full HD AMOLED មានរ៉េមទំហំ 4GB ឬ 6GB និងមានម៉េមូរីក្នុងម៉ាស៊ីនទំហំ 64GB ឬ 128GB និងអាចបន្ថែមនូវកាត microSD ផងដែរ។ ស្មាតហ្វូននេះ ប្រើប្រាស់នូវប្រព័ន្ធប្រតិបត្តិការ Android 8.1 Oreo និងថាមពលថ្ម 3720mAh។ នៅក្នុងរូបភាពដែលធ្វើការ Renders នេះ ស្មាតហ្វូន Galaxy A9 Pro ត្រូវបានគេរំពឹងថា មានរូបរាងស្រដៀងគ្នាទៅនឹងស្មាតហ្វូន A7 ដែរ៕
