របាយការណ៍ថ្មី ៖ Nokia 9 PureView អាចជាឈ្មោះស្មាតហ្វូនស៊េរីថ្មីរបស់ក្រុមហ៊ន Nokia

តើអ្នកនៅចាំស្មាតហ្វូន Nokia 808 PureView និងកាមេរ៉ាទំហំ 41MP របស់វានោះទេ? យោងតាមរបាយការណ៍ចុងក្រោយបំផុតមួយដែលបានចេញផ្សាយកាលពីពេលថ្មីៗនេះ បានបញ្ជាក់ថា ក្រុមហ៊ុន HMD Global នឹងនាំយកនូវមុខងារមួយរបស់ស្មាតហ្វូន Nokia 808 សម្រាប់ស្មាតហ្វូនជំនាន់បន្ទាប់នោះគឺ Nokia 9 ប៉ុន្តែមិនមែនជាសេនស័រកាមេរ៉ា 41MP នោះទេ។ ហើយក៏មិនទាន់មានព័ត៌មានដែលបញ្ជាក់អំពីទំហំភិចសែលសម្រាប់កាមេរ៉ានៅលើស្មាតហ្វូន Nokia 9 ផងដែរ។ ប៉ុន្តែគេនិយាយថា នេះពិតជាមានឈ្មោះហៅថា PureView។ 

យោងតាមការបញ្ជាក់របស់លោក Roland Quandt បាននិយាយដែរថា ស្មាតហ្វូន Nokia 9 គឺនឹងមានឈ្មោះជាផ្លូវការហៅថា Nokia 9 PureView។ កាលពីខែសីហាកន្លងទៅនេះមានការប្រកាសថា ក្រុមហ៊ុន HMD Global បានក្លាយជាម្ចាស់យីហោម៉ាក PureView ហើយ ដោយមានផ្ទេរពីការិយាល័យកម្មសិទ្ធិបញ្ញាសហភាពអ៊ឺរ៉ុប។ ម៉ាកយីហោនេះ កាលពីមុនត្រូវគ្រប់គ្រងដោយក្រុមហ៊ុន Microsoft ដែលប្រើប្រាស់វានៅលើស្មាតហ្វូន Lumia 920, Lumia 1020, Lumia 1520 និង Lumia 950 ។ ក្រុមហ៊ុន HMD Global ក៏ធ្វើការគ្រប់គ្រងទៅលើម៉ាកយីហោសម្រាប់ Asha និង Xpress-On ផងដែរ។ 

ពេលនេះ ម៉ាកយីហោ PureView គឺវិលត្រឡប់មកវិញហើយ ប៉ុន្តែវាមានពាក្យចចាមអារ៉ាមជាច្រើន បានបញ្ជាក់ថា ស្មាតហ្វូន Nokia 9 នឹងបំពាក់នូវកាមេរ៉ាដល់ទៅ 5 គ្រាប់។ នេះគឺជាចំនួនកាមេរ៉ាច្រើនបំផុត ស្របពេលដែលបច្ចុប្បន្ននេះ មានតែការប្រើប្រាស់កាមេរ៉ា 3 គ្រាប់ប៉ុណ្ណោះ។ ស្មាតហ្វូន Nokia 9 PureView នៅមិនទាន់បញ្ជាក់អំពីកាលបរិច្ឆេទនៃការដាក់លក់នៅឡើយទេ ហើយក៏នៅមិនទាន់បង្ហាញខ្លួននៅឡើយដែរ អាចប្រហែលជាបង្ហាញខ្លួននៅឆ្នាំក្រោយនេះមើលទៅ៕