ស្របពេលដែលក្រុមហ៊ុនផលិតរថយន្ត BMW បង្កព្យុះភ្លៀងនៅក្នុងព្រឹត្តិការណ៍តាំងពិពរណ៍ 2018 Paris Motor Show ជាមួយនឹងម៉ូដែលស៊េរីថ្មី 3 Series នោះ ក្រុមហ៊ុនផលិតរថយន្ត Lexus ក៏បង្ហាញនូវ Version ថ្មីរបស់រថយន្ត RC Coupe របស់ខ្លួនផងដែរ។ ក្រុមហ៊ុន Lexus ធ្វើការរចនារូបរាងរថយន្ត RC កាន់តែមានភាពលេចធ្លោសម្រាប់ម៉ូដែលឆ្នាំ 2019 នេះដើម្បីធ្វើការប្រកួតប្រជែងជាមួយនឹងម៉ូដែលថ្មីរបស់ក្រុមហ៊ុន Audi និង Mercedes រួមទាំងរថយន្តជំនាន់ចុងក្រោយ BMW 4 Series ផងដែរ។
អ្នកគាំទ្ររបស់ក្រុមហ៊ុន Lexus អាចធ្វើការសម្គាល់បានថា ផ្នែកខាងមុខរបស់រថយន្តស៊េរីថ្មីនេះ គឺមានការប្រើប្រាស់នូវភ្លើងចង្កៀងថ្មីប្រភេទ LED DRLs។ រថយន្តស៊េរីថ្មី RC នេះ ប្រើប្រាស់នូវកង់រថយន្តទំហំ 19-inch ដែលមាន 10 ពណ៌សម្រាប់ធ្វើការជ្រើសរើសដែលក្នុងនោះពណ៌ថ្មីមានឈ្មោះហៅថា Blue Vortex Metallic ។ ជាមួយនឹងការផ្លាស់ប្តូរលក្ខណៈខាងក្រៅជាច្រើននោះ ក្រុមហ៊ុន Lexus ក៏ធ្វើការផ្លាស់ប្តូរច្រើនទៅលើផ្នែកខាងក្នុងរបស់វាផងដែរ។
រថយន្តស៊េរីថ្មី RC 300 (ប្រភេទមូលដ្ឋាន Base ) នេះ ប្រើប្រាស់នូវម៉ាស៊ីនទំហំ 2.0-liter Turbocharged 4 ស៊ីឡាំងដែលមានកម្លាំងម៉ាស៊ីនដល់ទៅ 241 សេះ និងកម្លាំងរមួល 258 lb-ft ។ ជាមួយនឹងការបន្ថែមនូវ All-Wheel-Drive ដែលបានធ្វើការផ្លាស់ប្តូរទៅលើម៉ាស៊ីនទៅជា 3.5-liter V6 ជាមួយនឹងកម្លាំងម៉ាស៊ីន 260 សេះ និងកម្លាំងរមួល 236 lb-ft ។ ជាចុងក្រោយ រថយន្ត RC 350 ភ្ជាប់ជាមួយនឹងម៉ាស៊ីន V6 ដែលមានកម្លាំង 311 សេះ និងកម្លាំងរមួល 280 lb-ft។ រថយន្ត AWD RC 300 ប្រើប្រាស់ចង្កឹះលេខអូតូ 6 វគ្គ ខណៈពេលដែលម៉ូដែលផ្សេងទៀតមាន 8 វគ្គ៕