យោងតាមការស្រាវជា្រវមួយ ដែលបានចេញផ្យាយនៅលើគេហទំព័រ theinvestor របស់ប្រទេសកូរ៉េ នៅថ្ងៃទី 4 ខែតុលានេះ បានបញ្ជាក់ ក្រុមហ៊ុន Samsung Electronics ត្រូវប៉ាន់ស្មានថា មានតម្លៃដល់ទៅ 59.9 ពាន់លានដុល្លារអាមេរិក ស្របពេលដែលទីផ្សារពិភពលោល មានការប្រកួតប្រជែងខ្លាំងផ្នែកស្មាតហ្វូន សម្ភារៈប្រើប្រាស់នៅក្នុងផ្ទះ និងបន្ទះឈីប។ គួរបញ្ជាក់ថា នៅក្នុងការស្រាវជ្រាវដែលធ្វើឡើងដោយក្រុមហ៊ុន Interbrand បានបង្ហញថា Samsung ស្ថិតនៅក្នុងចំណាត់ថ្នាក់ទី 6 នៃម៉ាកយីហោកំពូលទាំង 100 នៅលើពិភពលោកនេះ។ តួលេខនៅក្នុងឆ្នាំនេះ គឺមានការកើនឡើង 6.5% ចេញពីទឹកប្រាក់ 56.2 ពាន់លានដុល្លារអាមេរិកនៅក្នុងឆ្នាំ 2017 ។
ក្រុមហ៊ុន Samsung បាននិយាយទៀតថា ក្រុមហ៊ុន Interbrand ទទួលស្គាល់នូវកិច្ចខិតខំប្រឹងប្រែងរបស់ក្រុមហ៊ុនដែលហៅថា “human-driven innovations,” ដូចជាស្មាតហ្វូនស៊េរីថ្មី Galaxy Note9 ម៉ាស៊ីនបោកខោអាវ Quick Drive និងទូរទស្សន៍អេក្រង់ធំ TV The Wall ជាដើម។ នៅក្នុងការដកស្រង់ចេញពី Interbrand ក្រុមហ៊ុននេះ បាននិយាយថា “សក្តានុពលនៃកំណើនប្រកបដោយនិរន្តរភាព គឺផ្អែកទៅលើបច្ចេកវិទ្យាថ្មីៗជាច្រើនរួមមាន 5G, AI, IoT និងអាជីវកម្មផ្នែករថយន្តស្វ័យប្រវត្តិគឺជាភាពខ្លាំងរបស់ក្រុមហ៊ុន Samsung។ អាជីវកម្ម semiconductor របស់ក្រុមហ៊ុន Samsung ពង្រឹងភាពដឹកនាំនៅលើទីផ្សាររបស់ខ្លួននៅក្នុងឆ្នាំនេះ ដែលបង្ហាញអំពីកំណើនមិនធម្មតានោះទេ។
ក្រុមហ៊ុន បានបន្ថែមថា “អាជីវកម្មស្មាតហ្វូនក៏បន្តជម្រុញទៅលើស្មាតហ្វូនជាច្រើនស៊េរីសម្រាប់អ្នកប្រើប្រាស់ដែលរួមមានម៉ូដែល Galaxy S9, Galaxy Note 9 និងនាឡិកា Galaxy Watch ផងដែរ។” ក្រុមហ៊ុន Apple ឈរនៅចំណាត់ថ្នាក់លេខមួយជាមួយនឹងតម្លៃ 214.4 ពាន់លានដុល្លារតាមពីក្រោយដោយក្រុមហ៊ុន Google ដែលមានតម្លៃ 155.5 ពាន់លានដុល្លារ។ ក្រុមហ៊ុន Amazon ឈរនៅចំណាត់ថ្នាក់លេខ 3 ជាមួយនឹងតម្លៃ 176 ពាន់លានដុល្លារ ខណៈពេលដែលក្រុមហ៊ុន Microsoft និង Coca-Cola ឈរនៅចំណាត់ថ្នាក់លេខ4 និងលេខ 5 ។ ក្រុមហ៊ុន Hyundai Motors និងក្រុមហ៊ុន Kia Motor ឈរនៅចំណាត់ថ្នាក់ទី 36 និង 71៕