កាលពីថ្ងៃទី 18 ខែតុលានេះ ក្រុមហ៊ុនបច្ចេកវិទ្យាយក្ស Samsung Electronics បានប្រកាសថា ខ្លួនចាប់ផ្តើមធ្វើការផលិតទៅលើបន្ទះឈីបដែលប្រើប្រាស់នូវដំណើរការនៃបច្ចេកវិទ្យា 7-Nanometer Low Power Plus ជាមួយនឹងការបំពាក់នូវបច្ចេកវិទ្យា EUV (extreme ultraviolet lithography) ជាលើកដំបូងបំផុត នៅក្នុងឧស្សាហកម្មរបស់ខ្លួន។
ក្រុមហ៊ុន Samsung បានបញ្ជាក់ថា “ការដំណើរការនូវការផលិតចុងក្រោយបំផុតនៃ Node របស់ខ្លួន បច្ចេកវិទ្យា 7LPP នឹងបំពាក់នូវសមត្ថភាពពេញលេញសម្រាប់ប្រើប្រាស់នៅលើផលិតផលជាច្រើនដែលជម្រុញនូវដែនកំណត់នៃកម្មវិធីកាន់តែវិសេសវិសាលជាមួយនឹងបច្ចេកវិទ្យា 5G, AI មជ្ឈមណ្ឌលទិន្នន័យខ្នាតធំ និងសហគ្រាស បច្ចេកវិទ្យា IoT វិស័យរថយន្ត និងបណ្តាញ Network ថែមទៀតផង។”
ក្រុមហ៊ុន Samsung បានបន្ថែមថា “ការណែនាំអំពីបច្ចេកវិទ្យា 7LPP គឺជាការបង្ហាញយ៉ាងច្បាស់លាស់ អំពីការវិវត្តន៍នៃផ្លូវផែនទីនៃបច្ចេកវិទ្យារបស់ក្រុមហ៊ុន Samsung Foundry និងការផ្តល់អោយអតិថិជនជាច្រើន នូវការប្រើប្រាស់ពេញលេញនូវដំណើរការនៃបច្ចេកវិទ្យានៃការផលិតចុងក្រោយនេះ។” បើធៀបជាមួយនឹងដំណើរការនៃ 10nm នោះ ក្រុមហ៊ុន Samsung និយាយថា បច្ចេកវិទ្យាថ្មីនេះ នឹងផ្តល់នូវការបង្កើនល្បឿនខ្លាំងក្លាជាងមុនដល់ទៅ 40% និងការកាត់បន្ថយការប្រើប្រាស់ថាម ពលដល់ទៅ 50%។
ក្រុមហ៊ុន Samsung បាននិយាយទៀតថា បច្ចេកវិទ្យា EUV នឹងដើរតួយ៉ាងសំខាន់នៅក្នុងដំណើរការនៃបច្ចេកវិទ្យាកម្រិតខ្ពស់ ប៉ុន្តែទាមទារអោយមានឧបករណ៍ផលិតថ្មីៗ ពេញលេញនៅក្នុងរោងចក្រជាច្រើនរបស់ខ្លួន។ ក្រុមហ៊ុននេះ បានបញ្ជាក់បន្ថែមថា ខ្លួនបានធ្វើការសិក្សាយ៉ាងស៊ីជម្រៅទៅលើបច្ចេកវិទ្យានៃដំណើរការនេះតាំងពីដើមឆ្នាំ 2000 មកម្ល៉េះ។
ក្រុមហ៊ុននេះបន្ថែមថា “ការចាប់ផ្តើមការផលិតនៃបច្ចេកវិទ្យា EUV នេះ គឺនឹងចាប់ផ្តើមនៅក្នុងរោងចក្រ S3 Fab របស់ Samsung នៅក្នុងតំបន់ Hwaseong ប្រទេសកូរ៉េខាងត្បូង។ ក្រុមហ៊ុន Samsung រំពឹងថា នៅត្រឹមឆ្នាំ 2020 ក្រុមហ៊ុន នឹងមានសមត្ថភាពពេញលេញនៅក្នុងការផលិតនូវដំណើរការនៃបច្ចេកវិទ្យា EUV នេះ សម្រាប់បំពេញតម្រូវការរបស់អតិថិជនដែលត្រូវការបន្ទះឈីបជំនាន់ក្រោយនេះ៕”