Honor Magic 2 គឺជាស្មាតហ្វូនដែលត្រៀមបង្ហាញខ្លួននៅចុងខែនេះ។ ក្រុមហ៊ុនបុត្រសម្ព័ន្ធរបស់ក្រុមហ៊ុន Huawei នេះបានបញ្ជាក់ថា ស្មាតហ្វូនស៊េរីថ្មីនេះ នឹងមានការរចនារូបរាងកាន់តែស្រស់ស្អាត និងប្រណិតបំផុតជាមួយនឹងកញ្ចក់អេក្រង់ដ៏រលើបរលោងអស្ចារ្យបំផុត។ ការរចនាផ្នែកខាងមុខរបស់ស្មាតហ្វូននេះ ក៏ត្រូវបានទម្លាយផងដែរ ប៉ុន្តែផ្នែកខាងក្រោយរបស់វា នៅតែជាអាថ៌កំបាំងដដែល។
សម្រាប់រូបភាព Render របស់ស្មាតហ្វូនស៊េរីថ្មី Honor Magic 2 នេះ គឺបានបង្ហាញខ្លួននៅលើបណ្តាញសង្គម Weibo ជាមួយនឹងការទម្លាយថា ស្មាតហ្វូន នឹងប្រើប្រាស់នូវកញ្ចក់ដ៏អស្ចារ្យមួយ។ បន្ថែមពីនេះទៀតនោះ ស្មាតហ្វូននេះនឹងប្រើប្រាស់នូវប្រព័ន្ធកាមេរ៉ាដល់ទៅ 4 គ្រាប់ថែមទៀត។ រូបភាពខាងលើនេះ គឺជាស្មាតហ្វូនស៊េរីថ្មី Honor Magic 2 ដែលមានភាពទាក់ទាញមែនទែន ប៉ុន្តែនេះ ប្រហែលជារឿងដែលមិនពិតផងដែរ។ សម្រាប់រូបភាព Render របស់ស្មាតហ្វូននេះ គឺមានពីរពណ៌។ ស្មាតហ្វូនដែលស្ថិតនៅក្រោមគេគឺមានពណ៌ខ្មៅ ស្របពេលដែលម៉ូដែលមួយទៀតរបស់ស្មាតហ្វូននេះ មានការបញ្ចូលគ្នានៃពណ៌ខៀវ និងពណ៌ស្វាយ។
កាលពីដើមឆ្នាំនេះ ស្មាតហ្វូន Huawei P20 Pro បានធ្វើការបង្ហាញខ្លួន ជាមួយនឹងការប្រើប្រាស់នូវប្រព័ន្ធកាមេរ៉ា 3 គ្រាប់បញ្ឈរយ៉ាងស្រស់ស្អាត។ តាមរយៈរូបភាព Render មួយនេះ ត្រូវបានគេសង្ស័យថា ស្មាតហ្វូន Honor Magic 2 នេះ គឺមានកាមេរ៉ាដល់ទៅ 4 គ្រាប់។ រហូតមកដល់ពេលនេះ ក្រុមហ៊ុន Honor នៅមិនទាន់បញ្ជាក់នៅឡើយទេថា ស្មាតហ្វូននេះ នឹងមានកាមេរ៉ា 3 គ្រាប់ ឬយ៉ាងណានោះទេ។ ដូចនេះ ការប្រើប្រាស់នូវប្រព័ន្ធកាមេរ៉ា 4 គ្រាប់ នៅលើស្មាតហ្វូន Magic 2 នេះ គឺជារឿងល្អប្រសិនបើនេះ គឺជាការពិតនោះ។
គួរបញ្ជាក់ថា ថ្មីៗនេះ ក្រុមហ៊ុន Samsung ទើបតែបង្ហាញនូវស្មាតហ្វូនស៊េរីថ្មី Galaxy A9 (2018) ដែលជាស្មាតហ្វូនដំបូងបំផុតនៅក្នុងពិភពលោកដែលមានកាមេរ៉ា 4 គ្រាប់។ នៅក្នុងរបាយការណ៍ថ្មីនេះ បានបញ្ជាក់ថា ស្មាតហ្វូន Honor Magic 2 នេះ នឹងមានអេក្រង់ AMOLED screen របស់ក្រុមហ៊ុន Samsung និងបច្ចេកវិទ្យាស្កេនក្រយ៉ៅដៃក្រោមអេក្រង់ផងដែរ។ ស្មាតហ្វូននេះ បំពាក់នូវបច្ចេកវិទ្យាស្កេនមុខ 3D facial scanner ផងដែរ។ ស្មាតហ្វូន Magic 2 នឹងភ្ជាប់ជាមួយនឹងបច្ចេកវិទ្យា 40W fast charging technology ដូច Mate 20 Series អញ្ចឹង។ ប្រភពខាងលើបន្តថា ស្មាតហ្វូន Honor Magic 2 អាចធ្វើការកម្មង់ទិញបាននៅលើវេបសាយ www.JD.com ៕
