កាលពីថ្ងៃទី 17 ខែតុលានេះ ប្រភពឧស្សាហកម្មនៅក្នុងប្រទេសកូរ៉េខាងត្បួង បានបញ្ជាក់ថា ក្រុមហ៊ុន LG Display និង Lenovo ដែលជាក្រុមហ៊ុនផលិតកុំព្យូទ័រធំបំផុតរបស់ពិភពលោក បានធ្វើការចាប់ដៃគ្នា ដើម្បីបង្កើតនូវថេប្លេត PC ដែលអាចបត់បានត្រៀមបញ្ចេញនៅឆ្នាំក្រោយនេះ។ ក្រុមហ៊ុនផលិតអេក្រង់នេះ ត្រូវបានគេរំពឹងថា នឹងធ្វើការផ្គត់ផ្គង់ទៅលើអេក្រង់ 13-inch OLED សម្រាប់ក្រុមហ៊ុន Lenovo។
ប្រភពឧស្សាហកម្មខាងលើនេះ បានបញ្ជាក់ទៅកាន់ ET News ថា “ថ្មីៗនេះ ក្រុមហ៊ុនទាំងពីរនេះ ធ្វើការចុះកិច្ចព្រមព្រៀងជាសម្ងាត់មួយ។ ពួកគេចាប់ផ្តើមនូវគម្រោងមួយជាផ្លូវការក្នុងការអភិវឌ្ឍនូវឧបករណ៍មួយដែលត្រៀមបង្ហាញខ្លួននៅឆ្នាំក្រោយនេះ។” នេះគឺជាលើកទីមួយដែលក្រុមហ៊ុន LG Display ត្រូវបានគេរាយការណ៍ថាកំពុងតែធ្វើការនៅលើអេក្រង់ដែលអាចបត់បានហើយអេក្រង់នេះ គឺមានទំហំធំជាងអេក្រង់ដែលអាចបត់បានរបស់ក្រុមហ៊ុនបច្ចេកវិទ្យាផ្សេងទៀតផងដែរ។
គិតត្រឹមថ្ងៃនេះ Samsung Display ត្រូវបានគេចាត់ទុកថា គឺជាក្រុមហ៊ុនផលិតអេក្រង់ធំបំផុតរបស់ពិភពលោកដែលធ្វើការគ្រប់គ្រងទីផ្សារ OLED ច្រើនជាង 95% និងធ្វើការអភិវឌ្ឍនូវអេក្រង់ដែលអាចបត់បានទំហំត្រឹមតែ 7.3-inch ប៉ុណ្ណោះសម្រាប់ស្មាតហ្វូនដែលអាចបត់បាន ដំបូងបំផុតរបស់ Samsung Electronics ស្របពេលដែលក្រុមហ៊ុន BOE និង Huawei របស់ចិន ក៏កំពុងតែធ្វើការនៅលើស្មាតហ្វូនបត់បានអេក្រង់ទំហំ 8-inch ផងដែរ។
ប្រភពជាច្រើននិយាយថា ក្រុមហ៊ុន LG Display កំពុងតែប្រើប្រាស់នូវយុទ្ធសាស្រ្តថ្មី ដែលរំពឹងថា អេក្រង់ដែលអាចបត់បាននេះ នឹងធ្វើការប្រកួតប្រជែងសារជាថ្មីនៅក្នុងទីផ្សារថេប្លេត PC ជាជាងការប្រកួតប្រជែងនៅក្នុងទីផ្សារស្មាតហ្វូន។ ស្មាតហ្វូនដែលអាចបត់បាន ដែលមានអេក្រង់តូចនេះ ត្រូវគេរំពឹងថា នឹងមានបញ្ហាមួយចំនួននៅពេលដែលវាបត់ ស្របពេលដែលថេប្លេត PC ដែលមានអេក្រង់ធំជាងនឹងមានលក្ខណៈប្រសើរជាងក្នុងការប្រើប្រាស់។
បញ្ហាមួយទៀតរបស់ស្មាតហ្វូន ដែលអាចបត់បាន គឺភាពធន់របស់វាដោយសារតែអេក្រង់នេះ អាចរក្សានូវរូបរាងបែបនេះបន្ទាប់ពីការប្រើប្រាស់ដដែលៗ។ អេក្រង់ដែលអាចបត់បាននេះ ហាក់ដូចជាសក្តិសមក្នុងការប្រើប្រាស់នៅលើថេប្លេត PC ជាជាងការប្រើប្រាស់នៅលើស្មាតហ្វូន។ ប្រភពមួយទៀតបញ្ជាក់ថា “ក្រុមហ៊ុន LG Display ប្រហែលជាគិតអំពីកត្តាផ្សេងៗជាច្រើនទៀតដូជជាប្រសិទ្ធិភាព និងការធ្វើទីផ្សារជាដើម នៅពេលដែលពួកគេសម្រេចចិត្តផលិតនូវអេក្រង់ដែលអាចបត់បានទំហំ 13-inch នេះ៕”