vivo NEX ត្រូវបានគេដឹងថា គឺជាស្មាតហ្វូនដែលប្រើប្រាស់នូវកាមេរ៉ា Pop-up នៅផ្នែកខាងមុខ ដែលមានការប្រើប្រាស់អេក្រង់ពេញលេញ។ កន្លងមកមានស្មាត ហ្វូនជាច្រើន ដែលធ្វើការចម្លងនូវការរចនានេះដែរ ជាក់ស្តែងដូចជាពេលនេះអញ្ចឹង មានព័ត៌មានបែកធ្លាយនៅថ្ងៃនេះបានទម្លាយថា ស្មាតហ្វូន Xiaomi ក៏មានបំណងផ្តោតទៅលើរឿងនេះជាមួយនឹងការបញ្ចេញនូវរូបភាពជាច្រើននៃគំរូនេះដែរ។
អ្នកនាំពាក្យរបស់ក្រុមហ៊ុន Xiaomi លោក Donovan Sung បានទម្លាយលម្អិតអំពីការអភិវឌ្ឍទៅលើស្មាតហ្វូនត្រកូល Mi MIX series នេះ ហើយស្មាតហ្វូនស៊េរីថ្មី Mi MIX 3 ត្រៀមបង្ហាញនៅថ្ងៃទី 25 ខែតុលាខាងមុខនេះហើយ។ នៅក្នុងសារដែលបង្ហោះនៅថ្ងៃនេះ លោកបានបញ្ជាក់ថា ក្រុមហ៊ុន Xiaomi ធ្លាប់បានស្នើនូវប៉ាតង់មួយសម្រាប់កាមេរ៉ា Pop-up កាលពីឆ្នាំ 2015។ កំឡុងពេលនេះ ពួកគេក៏ធ្វើគំរូជាច្រើន ហើយក៏បាបចែករំលែករូបភាពនេះផងដែរ។ ដូចអ្វីដែលអ្នកមើលឃើញនៅក្នុងរូបភាពទាំងនេះ ស្មាតហ្វូននេះ មានកាមេរ៉ា Pop-up ស្រដៀងគ្នាទៅនឹងស្មាតហ្វូន vivo NEX អញ្ចឹង។
មានការលើកឡើងថា ស្មាតហ្វូននេះ ក៏មានលក្ខណៈខុសប្លែកមួយចំនួនផងដែរ។ កាមេរ៉ា Pop-up នៅលើស្មាតហ្វូន vivo NEX គឺស្ថិតនៅផ្នែកគែមខាងលើ ស្របពេលដែលគំរូរបស់ស្មាតហ្វូន Xiaomi គឺស្ថិតនៅជិតចំណុចកណ្តាល។ ក្នុងនោះ ក៏មានរូបភាពមួយទៀតនៃផ្នែកខាងក្រោយរបស់ស្មាតហ្វូននេះផងដែរ។ រូបភាពនេះ គឺមិនមានកាមេរ៉ានៅខាងក្រោយនោះទេ ដោយសារតែនេះគឺជាគំរូតែប៉ុណ្ណោះ។ ប្រសិនបើអ្នកក្រឡេកមើលអោយកាន់តែជិតទៅលើកាមេរ៉ា Pop-up នេះ អ្នកអាចមើលឃើញនូវជ័រកៅស៊ូសម្រាប់ការពារវាទៅនឹងធូលី និងទឹកផងដែរ។ ស្មាតហ្វូននេះ អាចនឹងមានថាមពលថ្ម 3,400mAh ដូចគ្នាទៅនឹងស្មាតហ្វូន Mi MIX 2 និង Mi MIX 2S ផងដែរ៕
