នៅថ្ងៃនេះ ក្រុមហ៊ុន Samsung បានធ្វើការបង្ហាញចេញជាផ្លូវការនូវ Galaxy Book 2។ ថ្លេបប្លេត ប្រភេទ 2-in-1 គឺជាអ្នកស្នងតំណែង Galaxy Book ដែលត្រូវបានដាក់បង្ហាញកាលពីខែកុម្ភៈ ឆ្នាំ 2017 កន្លងទៅ។ ឧបករណ៍ថ្មីរបស់ក្រុមហ៊ុនកូរ៉េមួយនេះ គឺជាគូប្រកួតប្រជែងជាមួយនឹង Surface Pro របស់ Microsoft, ដោយសារ តែវាមានចំណុចពិសេសមួយ ដោយត្រូវបានបំពាក់ដោយ Qualcomm SoC មិនដូចមុនរបស់ខ្លួន ដែលបាន ជ្រើសរើសយក Intel Core M3 នោះទេ។ Snapdragon 850 គឺជាបេះដូងនៃ Galaxy Book 2 នេះ។
Galaxy Book 2 មានអេក្រង់ទំហំ 1260x1440 Super AMOLED មាន RAM ទំហំ 4GB និងមានអង្គផ្ទុកទិន្នន័យទំហំ 128GB។ ជាមួយនឹងការបំពាក់នូវម៉ឌឹមម៉ូដែល X20 រួមបញ្ចូលប្រភេទ Cat.18 LTE 5CA និង MIMO រហូតដល់ទៅ 4X4 សម្រាប់ល្បឿន Gigabit ដែលអាចដំណើរការទៅបាន យ៉ាងរលូនតែម្តង។ Galaxy Book 2 មានកាមេរ៉ាខាងក្រោយទំហំ 8 មេហ្គាភិចសែល និងកាមេរ៉ាមុខទំហំ 5 មេហ្គាភិចសែល អូប៉ាល័រពីរ ដែលត្រូវបានបំពាក់ដោយ AKG ជាមួយ Dolby Atmos មានផត USB ពីរ ដែលមានរន្ធដោត microSD មានរន្ធដោតកាស 3.5 មីលីម៉ែត្រ Wi-Fi 802.11ac ហើយវាត្រូវបានបំពាក់ថ្ម ដែលមានថាមពលដំណើរការបាន រយៈពេល 20 ម៉ោង (Adaptive Fast charging)។
ថេបប្លេតថ្មីនេះ ដំណើរការដោយប្រព័ន្ធប្រតិបត្តិការ Windows 10 នៅក្នុង S Mode និងភ្ជាប់មកជាមួយក្តារចុច រួមបញ្ចូលនឹង S Pen stylus ។ គួរបញ្ជាក់ថា ថេបប្លេតថ្មីនេះ នឹងអាចរកទិញបាននៅលើទីផ្សារអនឡាញ ពី AT&T, Microsoft Store និង Samsung.com ក្នុងតម្លៃ 999,99 ដុល្លារ ចាប់ពីថ្ងៃទី 2 ខែវិច្ឆិកានេះ។ ហើយនៅខែក្រោយ អ្នកនឹងអាចរកទិញវាបាន នៅក្នុងហាង Sprint, Verizon និង AT & T ផងដែរ៕