ក្រុមហ៊ុន Vertu ដែលជាក្រុមហ៊ុនផលិតទូរស័ព្ទប្រណីតដ៏ល្បីឈ្មោះ បានត្រឡប់មកវិញពីការស្លាប់ ដោយការដាក់បង្ហាញស្មាតហ្វូនទំនើបថ្មីរបស់ខ្លួនឈ្មោះថា Aster P បន្ទាប់ពីបិទទ្វារកាលពីឆ្នាំមុន ដោយសារតែមិនអាចបង់ថ្លៃវិក័យប័ត្ររបស់ខ្លួន។ ក្រុមហ៊ុន Vertu បានបើកអាជីវកម្មរបស់ខ្លួនម្តងទៀត តែពេលនេះ ក្រុមហ៊ុននេះ ហាក់ដូចជាផ្តោតទៅលើទីផ្សារចិនច្រើនជាង បណ្តាទីផ្សារអ៊ឺរ៉ុប និងអាមេរិក។
ក្នុងអំឡុងព្រឹត្តិការណ៍សម្ពោធ នៅទីក្រុងប៉េកាំង ប្រទេសចិន ក្រុមហ៊ុន Vertu បានបង្ហាញស្មាតហ្វូនថ្មី របស់ខ្លួន គឺ Aster P ហើយបាននិយាយថា ស្មាតហ្វូននេះ នឹងអាចរកទិញបាន ជាមួយនឹងតម្លៃ $4,200 សម្រាប់ម៉ូដែលថ្នាក់ទាបជាងគេ។ Aster P នឹងមានវត្តមាននៅលើទីផ្សារជាមួយនឹងជម្រើសប្រាំពីរយ៉ាង ជាមួយនឹងជម្រើស Baroque មានតម្លៃថោកជាងគេ ហើយនិងជម្រើសស៊េរី Gothic ដែលមានតម្លៃថ្លៃជាងគេ។
សម្រាប់ស្មាតហ្វូន Aster P ជម្រើស Barogue Series នឹងមានពណ៌ខ្មៅ Gentleman Blue, Caramel Brown និង Twilight Orange ហើយដូចដែលបានរៀបរាប់ខាងលើ វានឹងមានតម្លៃ 4200 ដុល្លារ។ ចំណែក Gothic Series ស្មាតហ្វូន Aster P នឹងដាក់លក់ជាមួយពណ៌ Black Jade និង White Moon ក្នុងតម្លៃ 5 100 ដុល្លារ ស្របម៉ូដែល Dazzling Gold មានតម្លៃមិនទាបជាង 14.000 ដុល្លារ។
សូមជំរាបថា Vertu Aster P ត្រូវបានផលិតឡើងនៅចក្រភពអង់គ្លេស។ ស្មាតហ្វូននេះបំពាក់ដោយបន្ទះឈីប Qualcomm Snapdragon 660 ជាមួយ RAM ទំហំ 6GB និងទំហំផ្ទុក 128GB ព្រមទាំងមានអេក្រង់ទំហំ 5 អ៊ីងជាមួយកំរិត Full-HD (1080p)។ សំរាប់ការថតរូប ស្មាតហ្វូន Aster P មានកាមេរ៉ាខាងក្រោយទំហំ 12 មេហ្គាភិចសែល និងកាមេរ៉ាមុខទំហំ 20 មេហ្គាភិចសែល ហើយនឹងមានថ្មទំហំ 3,300 mAh មានលក្ខណៈពិសេស មុខងារសាកថ្មឆាប់រហ័ស Quick Charge 3.0 សម្រាប់ការបញ្ចូលថ្ម បានលឿនជាងមុន ស្របពេលដែលការហៅទូរស័ព្ទ និងផ្ញើសារ ត្រូវបានការពារដោយបច្ចេកវិទ្យាអ៊ិនគ្រីប V Talk។ អ្វីដែលគួរឱ្យស្តាយនោះ គឺស្មាតហ្វូនតម្លៃថ្លៃកប់មួយនេះ នៅមិនទាន់ដំណើរដោយការប្រព័ន្ធប្រតិបត្តិការ Android 9 Pie ទេ៕