ក្រុមហ៊ុន Mazda ទើបតែបានប្រកាសថា ខ្លួននឹងបន្ថែមនូវមុខងារថ្មីមួយទៀតក្នុងការពង្រឹងនូវសមត្ថភាពរបស់រថយន្តខ្លួនដែលមុខនេះហៅថា G-Vectoring Control Plus (GVC Plus)។ មុខងារថ្មីនេះ នឹងធ្វើការអាប់ដេតដំបូងបំផុតសម្រាប់រថយន្តប្រភេទ CX-5 នៅក្នុងប្រទេសជប៉ុន។ សម្រាប់ការកម្ម៉ង់ទិញមុនទៅលើរថយន្ត CX-5 ដែលអាប់ដេតនេះ នឹងធ្វើឡើងនៅពេលនេះតែម្តង។ ក្រុមហ៊ុន Mazda បាននិយាយថា ប្រព័ន្ធ G-Vectoring Control គឺជាប្រព័ន្ធគ្រប់គ្រងដំបូងបំផុតនៅក្នុងពិភពលោក ដែលមានការពង្រឹងទៅលើកម្លាំងបង្វិលម៉ាស៊ីនដែលប្រែប្រួលទៅតាមដៃចង្កូត។
ក្រុមហ៊ុននេះ បានបន្ថែមថា មុខងារនេះ សម្រាប់ធ្វើការគ្រប់គ្រងទៅលើកម្លាំង និងការបង្កើនល្បឿនទៅលើកង់របស់រថយន្តអោយកាន់តែមានប្រសិទ្ធិភាពជាមួយនឹងចលនាកាន់តែរលូនបំផុត។ សម្រាប់ប្រព័ន្ធ GVC Plus ថ្មីរបស់ក្រុមហ៊ុន Mazda នេះ ប្រើប្រាស់នូវហ្វ្រាំងក្នុងការគ្រប់គ្រងទៅលើចលនាផងដែរ។ ក្រុមហ៊ុន Mazda បានប្រើប្រាស់នូវប្រព័ន្ធហ្វ្រាំងនេះ នៅក្នុងការពង្រឹងទៅលើប្រសិទ្ធិភាពនៃរថយន្តនេះ។ នៅពេលដែលអ្នកបើកបររុញកង់រថយន្តទៅកាន់ចំណុចកណ្តាលនេះ ប្រព័ន្ធ GVC Plus នេះ បានធ្វើការរក្សានូវលំនឹងរបស់រថយន្ត។ ក្រុមហ៊ុន Mazda បាននិយាយថា ប្រព័ន្ធថ្មីនេះ អាចធ្វើការផ្លាស់ប្តូរទៅលើកង់រថយន្តអោយមានសភាពកាន់តែរលូនបំផុត។
ក្រុមហ៊ុនជប៉ុននេះ បានបញ្ជាក់ទៀតថា ប្រព័ន្ធ GVC Plus អាចធ្វើការគ្រប់គ្រងទៅលើប្រព័ន្ធបន្ទាន់សម្រាប់ជៀសវាងគ្រោះថ្នាក់ និងការពង្រងទៅលើការគ្រប់គ្រងនៅពេលដែលធ្វើការផ្លាស់ប្តូរគន្លងធ្វើដំណើរនៅលើដងផ្លូវនោះ។ ក្រុមហ៊ុន Mazda និយាយថា ប្រព័ន្ធគ្រប់គ្រងនេះធ្វើការពង្រឹងនៅក្នុងលក្ខខណ្ឌដែលស្ថាន ភាពផ្លូវមិនល្អដូចជាធ្លាក់ព្រិល ឬទឹកកកនោះ។ ប៉ុន្តែសំរាប់បច្ចេកវិទ្យានេះ នៅមិនដឹងនោះទេថា តើពេលណាដែលមុខនេះមកដល់សហរដ្ឋអាមេរិក ឬតំបន់ផ្សេងទៀតនោះទេ។ ថ្មីៗនេះ ក្រុមហ៊ុន Mazda ក៏បានបង្ហាញនូវរថយន្តស៊េរីថ្មី CX-9 2019 ក៏ប្រើប្រាស់នូវកៅអីខ្យល់ថ្មី ប្រព័ន្ធ Apple CarPlay និង Android Auto នៅក្នុងសហរដ្ឋអាមេរិកផងដែរ៕