បន្ទាប់ពីមានការបែកធ្លាយនៃរូបភាព Teasers និងព័ត៌មានបែកធ្លាយជាច្រើនទៀតនោះ នៅពេលនេះ ក្រុមហ៊ុន vivo បានធ្វើការបង្ហាញជាផ្លូវការហើយនូវស្មាតហ្វូនស៊េរីថ្មី vivo Z3 ដែលពិធីនេះ ប្រារព្ធឡើងនៅក្នុងមជ្ឈមណ្ឌលសិល្បៈ Lanjing នៅក្នុងទីក្រុងប៉េកាំង (Beijing Lanjing Art Center) នៅក្នុងប្រទេសចិន។
ស្មាតហ្វូនស៊េរីថ្មីនេះគឺមានលក្ខណៈសម្បត្តិដូចគ្នាបេះបិទទៅនឹងស្មាតហ្វូន Vivo Z3i ប៉ុន្តែវាក៏មានលក្ខណៈកែប្រែតិចតួចផងដែរ។ ស្មាតហ្វូនស៊េរីថ្មី vivo Z3 នេះមានអេក្រង់ទំហំ 6.3-inch full HD+ Super AMOLED 19:9 display ជាមួយនឹងកម្រិតសមាមាត្រ 90.3% នៃអេក្រង់បើធៀបទៅនឹងតួខ្លួនរបស់វា ការប្រើប្រាស់នូវ Notch ដែលមានរូបរាងដំណក់ទឹកភ្លៀង និងការប្រើប្រាស់នូវពណ៌ថ្មីដ៏ស្រស់ស្អាតគឺ Starry Night Black, Dream Powder, Aurora Blue ជាដើម។ ស្មាតហ្វូននេះប្រើប្រាស់នូវប្រព័ន្ធកាមេរ៉ាភ្លោះបញ្ឈរ និងប្រព័ន្ធស្កេនក្រយ៉ៅដៃនៅផ្នែកខាងក្រោយ ខណៈពេលដែលនៅលើ Notch នេះគឺមានភ្ជាប់ជាមួយនឹងកាមេរ៉ាមួយគ្រាប់ដែលប្រើប្រាស់នូវបច្ចេកវិទ្យា infra-red face unlock ផងដែរ។
ស្មាតហ្វូនស៊េរីថ្មី vivo Z3 ប្រើប្រាស់នូវបន្ទះឈីប Qualcomm Snapdragon 710 ជាមួយនឹងម៉េមូរីទំហំ 6GB+64GB និង 6GB+128GB ស្របពេលដែលវាក៏មាន Version មួយទៀតដែលមានទំហំ 4GB+64GB ប៉ុន្តែវាប្រើប្រាស់នូវបន្ទះឈីប Snapdragon 670 SoC នោះទេ។ ការប្រើប្រាស់នូវបន្ទះឈីប Qualcomm Snapdragon 710 នេះ ត្រូវបានភ្ជាប់ជាមួយនឹងក្រាហ្វិកកាត Adreno 616 GPU និង multi-core AI Engine ដែលពង្រឹងសមត្ថភាពនៃក្រាហ្វិកកាតខ្លាំងក្លាជាងមុនដល់ទៅ 35% ថែមទៀតផង។ អ្វីដែលសំខាន់ជាងនេះទៀតនោះ ស្មាតហ្វូន vivo Z3 ក៏នឹងប្រើប្រាស់នូវបច្ចេកវិទ្យា Dual-Turbo twin-turbo engine របស់ក្រុមហ៊ុន Vivo ដែលមានការពង្រឹងកាន់តែប្រសើរឡើងទៅលើប្រព័ន្ធ System និងការពង្រឹងទៅលើបទពិសោធន៍នៃការលេងហ្គេមកាន់តែអស្ចារ្យនៅលើស្មាតហ្វូននេះ។
នៅក្នុងផ្នែកថតរូបភាពនោះ ស្មាតហ្វូន vivo ថ្មីនេះ ប្រើប្រាស់នូវប្រព័ន្ធកាមេរ៉ាភ្លោះទំហំ 16MP+2MP ស្របពេលដែល Notch របស់ស្មាតហ្វូននេះ មានកាមេរ៉ាខាងមុខទំហំ 12MP។ ស្មាតហ្វូននេះ មានថាមពលថ្មទំហំ 3315mAh ជាមួយនឹងបច្ចេកវិទ្យា dual-engine flash charging technology ដំណើរការនៅលើប្រព័ន្ធប្រតិបត្តិការ Android 8 ជាមួយនឹងការទ្រទ្រង់ទៅលើបច្ចេកវិទ្យា 4G VoLTE, GPS, Wi-Fi និង Bluetooth 5.0។ ស្មាតហ្វូនស៊េរីថ្មីនេះ ត្រូវគេរំពឹងថា នឹងដាក់លក់នៅថ្ងៃទី 1 ខែវិច្ឆិកានេះ៕
