ក្រុមហ៊ុន vivoបានប្រកាសចេញទូរស័ព្ទស្មាតហ្វូនស៊េរីថ្មីៗរបស់ខ្លួនជាច្រើនស៊េរីជាបន្តបន្ទាប់ ដើម្បីបំពេញសេចក្តីត្រូវការ ក៏ដូចជាជម្រើសច្រើនសម្រាប់អ្នកប្រើប្រាស់។ តួរយ៉ាងកាលពីដើមខែកញ្ញាកន្លងទៅ vivo បានប្រកាសចេញស្មាតហ្វូនម៉ូដែល V11 នៅក្នុងទីផ្សារប្រទេសចិន និង V11 Pro ក្នុងទីផ្សារប្រទេសឥណ្ឌា ហើយក្រោយមកទៀតក្រុមហ៊ុនចិនមួយនេះ ក៏បានបញ្ចេញ V11i ដែលមានតម្លៃធូរថ្លៃជាងគេទៅកាន់បណ្តាទីផ្សារច្រើនបន្ថែមទៀត។ បន្ទាប់មកគឺ vivo Z3i ដែលបំពាក់បន្ទះឈីប Helio P60 មួយម៉ូដែលទៀតនៅក្នុងទីផ្សារប្រទេសចិន។
នៅពេលនេះក្រុមហ៊ុន vivo ក៏បានប្រកាសចេញស្មាតហ្វូនស៊េរីថ្មីមួយទៀតរបស់ខ្លួន គឺម៉ូដែល vivoZ3 ដែលមានការរចនាដូចគ្នាទៅនឹងម៉ូដែល Z3i ដែរ ប៉ុន្តែស្មាតហ្វូនថ្មីមួយនេះ ត្រូវបានក្រុមហ៊ុនបញ្ចេញមកមានចំនួនពីរម៉ូដែលផ្សេងគ្នាគឺមួយប្រើបន្ទះឈីប Snapdragon 670 និងមួយផ្សេងទៀតប្រើបន្ទះឈីប Snapdragon 710។ vivo Z3 ដែលប្រើបន្ទះឈីប Snapdragon 670 គឺមានលេខកូដម៉ូដែល V1813BA ហើយកំលាំងម៉ាស៊ីនរបស់វាអូសដោយអង្គគណនាប្រភេទ Kryo 360 ចំនួន 8-core ដោយ 2-core មានល្បឿន 2.0GHz និង 6-core ផ្សេងទៀតមានល្បឿន 1.7GHz មានជំនួយល្បឿនពីរ៉េមទំហំ 4GB ជាមួយអង្គផ្ទុកទិន្នន័យ 64GB និងអាចដាក់បន្ថែមម៉េមូរីក្រៅបានដល់ 256GB។
សម្រាប់ម៉ូដែលដែលប្រើបន្ទះឈីប Snapdragon 710 វិញ គឺមានអង្គគណនាប្រភេទ Kryo 360 ចំនួន 8-core ដូចគ្នា ប៉ុន្តែមានល្បឿនខ្លាំងជាងគឺលោតដល់ 2.2GHz ជាមួយរ៉េមទំហំ 6GB និងមានទំហំផ្ទុកពីរជម្រើសគឺ 64GB និង 128GB។ សម្រាប់កាមេរ៉ាថតរូបវិញ vivo បានទម្លាក់ចំនួនមេហ្គាភិចសម្រាប់កាមេរ៉ាសែលហ្វីគឺពី 25MP មកនៅត្រឹម 12MP ជាមួយបច្ចេកវិទ្យា Dual-Pixel Sensor រីកាមេរ៉ាក្រោយជាប្រព័ន្ធកាមេរ៉ាភ្លោះទំហំ 16MP+2.0MP។ vivo Z3 បំពាក់អេក្រង់ឆកដំណក់ទឹក (Water-drop notch screen) ទំហំ 6.3” ប្រភេទបន្ទះបង្ហាញ IPS LCD កម្រិតបង្ហាញ Full-HD+។ សម្រាប់ថ្មរបស់វាវិញ គឺមានទំហំ 3,315mAh និងប្រើរន្ធសាកបញ្ចូលប្រភេទ microUSB2.0។ ស្មាតហ្វូនស៊េរីថ្មីនេះ មានជម្រើសបីពណ៌គឺ Starry Night, Aurora Blue និង Dream Powder។
និយាយពីតម្លៃវិញ សម្រាប់ម៉ូដែល Snapdragon 670 រ៉េមទំហំ 4GB និងអង្គផ្ទុកទិន្នន័យ 64GB មានតម្លៃប្រមាណ CNY1,598 យ័នប្រហែល $230 ដុល្លាអាមេរិច រីឯម៉ូដែល Snapdragon 710 រ៉េមទំហំ 6GB អង្គផ្ទុកទិន្នន័យ 64GB គឺមានតម្លៃប្រមាណ CNY 1,898 យ័នប្រហែលជា $275 ដុល្លាអាអាមេរិច និងម៉ូដែលអង្គផ្ទុកទិន្នន័យទំហំ 128GB មានតម្លៃប្រមាណ CNY2,298 យ័នប្រហែល $330 ដុល្លាអាមេរិច។ vivo Z3 គឺមានដាក់លក់ផ្លូវការណ៍ហើយនៅលើបណ្តាញលក់អនឡាញរបស់ក្រុមហ៊ុនផ្ទាល់តែម្តង (vivo’s Online Store)៕
