Nokia 9 PureView គឺជាស្មាតហ្វូនស៊េរីថ្មីដែលមនុស្សជាច្រើន កំពុងតែរង់ចាំវត្តមានស្មាតហ្វូននេះ ពីក្រុមហ៊ុន HMD Global ។ ស្មាតហ្វូននេះ ស្ថិតនៅក្នុងការអភិវឌ្ឍអស់មួយរយៈពេលហើយ ប៉ុន្តែពេលនេះ វានៅមិនទាន់មានការបញ្ជាក់ជាផ្លូវការអំពីកាលបរិច្ឆេទនៃការសម្ពោធស្មាតហ្វូននេះនៅឡើយទេ។ ឥឡូវនេះ មានព័ត៌មានលម្អិតជាច្រើនរបស់ស្មាតហ្វូននេះ បានបែកធ្លាយហើយ! ព័ត៌មានថ្មីរបស់ស្មាតហ្វូននេះ គឺត្រូវបានគេប្រទះឃើញនៅលើ Server របស់ FIH Mobile ដែលជាបុត្រសម្ព័ន្ធរបស់ក្រុមហ៊ុន Foxconn ដែលបញ្ជាក់ថា ក្រុមហ៊ុននេះ គឺទទួលខុសត្រូវទៅលើការផលិតស្មាតហ្វូននេះ។ ព័ត៌មានមួយចំនួនរបស់ស្មាតហ្វូននេះក៏ត្រូវបានទម្លាយជាមួយនឹងឈ្មោះកូដ និងកម្មវិធី Software Version របស់ស្មាតហ្វូននេះ។
តាមការបញ្ជាក់របស់ MySmartPrice បានអោយដឹងថា ស្មាតហ្វូន Nokia 9 PureView នឹងប្រើប្រាស់់នូវកូដដែលមានឈ្មោះថា “Olympic”។ សម្រាប់ឈ្មោះនេះ នឹងប្រើប្រាស់នៅលើស្មាតហ្វូនដែលមានកាមេរ៉ាដល់ទៅ 5 គ្រាប់ព្រោះថា Olympic Games គឺមានកងរង្វង់ចំនួន 5។ សម្រាប់ Server នេះ ក៏បានទម្លាយផងដែរថា ស្មាតហ្វូននេះ កំពុងតែដំណើរការនូវប្រព័ន្ធប្រតិបត្តិការ Android 9 Pie ជាមួយនឹង Patch សុវត្ថិភាពសម្រាប់ខែវិច្ឆិកា និងការប្រើប្រាស់នូវលេខ 00CN_4_030។ ស្មាតហ្វូន Nokia 9 PureView ត្រូវបានគេរំពឹងថា នឹងផ្លាស់ប្តូរទៅលើវិធីដែលស្មាតហ្វូនជាច្រើនថតរូបភាព។ នៅក្នុងការប្រើប្រាស់នូវកាមេរ៉ាដល់ទៅ 5 គ្រាប់នេះ យើងនឹងមានការខកចិត្តប្រសិនបើសមត្ថភាពកាមេរ៉ានេះ មិនអស្ចារ្យដូចអ្វីដែលយើងចង់បាននោះ។
សមត្ថភាពរបស់កាមេរ៉ានៃស្មាតហ្វូន Nokia ជាច្រើន ដែលបានបញ្ចេញដោយក្រុមហ៊ុន HMD Global នៅមិនទាន់ទាក់ទាញខ្លាំងនោះទេ។ ដូចនេះ មនុស្សជាច្រើនរង់ចាំមើលថា តើកាមេរ៉ារបស់ស្មាតហ្វូន Nokia 9 PureView អស្ចារ្យកម្រិតណាទៅ? ក្រៅពីការប្រើប្រាស់នូវកាមេរ៉ាច្រើនដល់ទៅ 5 គ្រាប់នេះ ស្មាតហ្វូននេះ ត្រូវបានគេរំពឹងថា នឹងប្រើប្រាស់នូវបច្ចេកវិទ្យា Wireless Charging ផងដែរ។ កាលពីសប្តាហ៍មុននេះ ឆ្នាំងសាក wireless chargers ម៉ាក Nokia ចំនួន 2 ទើបតែទទួលស្គាល់បញ្ជាក់គុណភាពដោយ Wireless Power Consortium។ សម្រាប់ Chargers មួយក្នុងចំណោមទាំងពីរនេះ ក៏មានរន្ធសម្រាប់ដោត USB ផងដែរ៕