នៅថ្ងៃទី 6 ខែវិច្ឆិកានេះ ក្រុមហ៊ុនបច្ចេកវិទ្យាយក្ស Samsung Electronics បានបញ្ជាក់ថា ខ្លួននឹងខិតខំប្រឹងប្រែងក្នុងការពង្រីកនូវទីផ្សារនៃអាជីវកម្មម៉ាស៊ីនបោកគក់របស់ខ្លួន និងការបញ្ចេញនូវផលិតផលទំនើបៗ ជាច្រើនសម្រាប់អតិថិជនរបស់ខ្លួន។ ក្រុមហ៊ុនបច្ចេកវិទ្យាយក្សរបស់ប្រទេសកូរ៉េខាងត្បូងនេះ បាននិយាយថា ការសម្រេចចិត្តនេះ គឺសម្រាប់ទីផ្សារក្នុងតំបន់សម្រាប់ការធ្វើពាណិជ្ជកម្មទៅលើម៉ាស៊ីនបោកគក់ ដែលត្រូវបានគេរំពឹងថា នឹងមានកំណើនដល់ទៅ 50% ជារៀងរាល់ឆ្នាំនោះ។ បើតាមដឹង ធុរកិច្ចនៃពាណិជ្ជកម្មទៅលើម៉ាស៊ីនបោកគក់នេះ គឺសំដៅទៅលើផលិតផលជាច្រើនដែលដាក់លក់សម្រាប់អតិថិជនដូចជាការប្រើប្រាស់នៅកន្លែងបោកគក់ សណ្ឋាគារ រមណីយដ្ឋាន អន្តោវាសិកដ្ឋាន មន្ទីរពេទ្យ និងយោធា។
ស្របទៅតាមការផ្លាស់ប្តូរនេះ ក្រុមហ៊ុន Samsung ក៏បានប្រកាសចេញញនូវម៉ាស៊ីនបោកគក់ដំបូងបំផុតរបស់ខ្លួនដែលរចនាឡើងសម្រាប់អតិថិជននៅក្នុងផ្នែកអាជីវកម្មដែលអាចផ្ទុកបាន 17 គីឡូក្រាម ដែលអាចបញ្ចប់ការបោកគក់នៅក្នុងរយៈពេលត្រឹមតែ 38 នាទីប៉ុណ្ណោះ។ សម្រាប់ការបោកស្ងួត គឺអាចដាក់ដល់ទៅទម្ងន់ 11 គីឡូក្រាម ដែលអាចប្រើប្រាស់បានរួមគ្នាដែលចំណាយពេលដល់ទៅ 45 នាទី។ Samsung បានបញ្ជាក់ទៀត ផលិតផលជាច្រើននៃអាជីវកម្មរបស់ខ្លួនអាចធ្វើការតម្លើងជាមួយនឹងម៉ាស៊ីនដាក់កាក់ដែលអាចទទួលនូវការបង់ប្រាក់តាមរយៈការប្រើប្រាស់នូវ Credit Cards ឬការទូរទាត់តាមទូរស័ព្ទដៃ Samsung Pay។
ក្រុមហ៊ុននេះ ក៏បានផ្តល់នូវសេវាកម្មយ៉ាងទូលំទូលាយសម្រាប់អតិថិជនដែលទិញយកអាជីវកម្មនៃម៉ាស៊ីនបោកគក់នេះរួមមានការតម្លើង និងការថែទាំផងដែរ។ ក្រុមហ៊ុន Samsung បន្ថែមថា ក្រុមហ៊ុន មានគម្រោងក្នុងការចូលរួមជាមួយនឹងកងកម្លាំងមិនត្រឹមតែសម្រាប់អង្គភាពនៃការបោកគក់នោះទេ ប៉ុន្តែជាមួយនឹងហាងកាហ្វេ និងហាងជាច្រើនទៀតសម្រាប់បង្កើតនូវតម្រូវការថ្មី៕