កាលពីថ្ងៃទី 10 ខែវិច្ឆិកា ឆ្នាំ 2018 នាឡិកាកាស្យូ G-Shock ដែលមានឈ្មោះបោះសម្លេងទូទាំងពិភពលោក បានរៀបចំការប្រគុំតន្ត្រីទ្រង់ទ្រាយធំ នៅមជ្ឈមណ្ឌលកោះពេជ្រ ដើម្បីអបអរសាទរខួប 35 ឆ្នាំរបស់ខ្លួន។ កម្មវិធីប្រគុំតន្ត្រីអបអរខួប៣៥ឆ្នាំរបស់នាឡិកាG –Shock នៅកោះពេជ្រ គឺមានការចូលរួមពីតារាចម្រៀងល្បីៗប្រចាំព្រះរាជាណាចក្រកម្ពុជាដូចជា៖ កញ្ញា មាស សុខសោភា ឯកអគ្គរដ្ឋទូតសុច្ឆន្ទៈរបស់G-Shock, លោក ជី ដេវីត ,កូនប្រុសលោក ព្រាបសុវត្ថិ លោក សុវត្ថិ មុនី្នវណ្ណ និង សុវត្ថិ មុន្នីនាថ, សុភ័ក្រ កុសុម៉ា, ក្រុមរាំ OMG ក្រុមរាំ និនចា ថប់ ជាដើម។ ក្នុងនោះ ក៏មានការចាប់រង្វាន់នាឡិកា G-Shock ចំនួនរាប់រយរង្វាន់និងប្រឡងជិះកង់យករង្វាន់ផងដែរ។
ព្រឹត្តិការណ៍គម្រប់ខួប 35 ឆ្នាំនៃនាឡិកា G-Shock នេះ គឺមានអញ្ជើញរួមមានពីសំណាក់ លោក អាត់ស៊ូស៊ី យ៉ាម៉ាអូកា ប្រធានគ្រប់គ្រងទូទៅក្រុមហ៊ុន Casio ជប៉ុន លោកស្រី លី គាវ អគ្គនាយិកាក្រុមហ៊ុន LDI Enterprise LTE និង លោក ហ៊ីតូមី សាកាគីបារ៉ា ប្រធានផ្នែកលក់ក្រុមហ៊ុនកាស្យូ។
តាមប្រសាសន៍របស់ លោក អាត់ស៊ូស៊ី យ៉ាម៉ាអូកា ប្រធានគ្រប់គ្រងទូទៅក្រុមហ៊ុន Casio ជប៉ុន បានថ្លែងថា៖នាឡិកាដៃម៉ាក G-Shock Casio មានដើមកំណើតនៅឆ្នាំ 1983 និងមកដល់ឆ្នាំ 2018 នេះ មានរយៈពេល 35 ឆ្នាំហើយ លោកបានបញ្ជាក់ថា នៅតាមបណ្តាប្រទេស ដែលជាតំណាងចែកចាយផ្តាច់មុខ G-Shock ទាំងអស់បានប្រារព្ធខួប 35 ឆ្នាំផងដែរ រួមទាំងប្រទេសកម្ពុជា។
លោក គាំង សុង ប្រធានគ្រប់គ្រងទូទៅក្រុមហ៊ុនLDI Enterprise បានមានប្រសាសន៍ថា ក្រុមហ៊ុន បានបង្កើតឡើងដំបូងដោយលោក គួច ទាងងួន នាថ្ងៃ 8 ខែសីហា ឆ្នាំ 1993។ រហូតដល់បច្ចុប្បន្ន មានអាយុ 25 ឆ្នាំហើយនិង ទទួលបាននូវទំនុកចិត្តពីអតិថិជនចំពោះផលិតផល ដែលក្រុមហ៊ុនធ្វើចរាចរណ៍ និងបានត្រូវទទួលស្គាល់ថាជាផលិតផលពិត 100%។ បណ្តាក្រុមហ៊ុនម៉ាកនាឡិកាដៃល្បីៗ លើពិភពលោក បានមកទំនាក់ទំនងផ្តាច់មុខដូចជាក្រុមហ៊ុនធំ Casio Computer របស់ប្រទេសជប៉ុនជាដើម បានផ្តល់សិទ្ធិផ្តាច់មុខនាឡិកាម៉ាក Casio តាំងពីខែមេសាឆ្នាំ 2014។ នៅក្នុងរយៈកាល 4 ឆ្នាំកន្លងមកនេះ ក្រុមហ៊ុនបានបើកសាខាចំនួន 11 នៅរាជធានីភ្នំពេញ និងខេត្តសៀមរាប ហើយនៅពេលខាងមុខនឹងបើកនៅខេត្តព្រះសីហនុទៀត។
នាឡិកាដៃម៉ាក G-Shock Casio ត្រូវបានផលិតឡើងនៅក្នុងប្រទេសជប៉ុននាឆ្នាំ 1983 មកទល់ពេលនេះមានអាយុកាល 35 ឆ្នាំនិងមានឈ្មោះល្បីល្បាញ និងពេញនិយមទូទាំងពិភពលោក។ ក្រុមហ៊ុនធានាអះអាងថាៈរាល់ផលិតផលនាឡិកាដៃដែលបាន ដាក់តាំងលក់ក្នុងហាង Casio គឺជានាឡិកាផលិតនៅក្នុងប្រទេសជប៉ុនពិត 100 ភាគរយ ឥតក្លែងបន្លំ និងធានាលក្ខណៈអន្តរជាតិរយៈពេល 1 ឆ្នាំ៕
