នៅថ្ងៃទី 12 ខែវិច្ឆិកានេះ មានសេចក្តីរាយការណ៍មួយដែលបញ្ជាក់ពីប្រភពខាងក្នុងឧស្សាហកម្មបច្ចេកវិទ្យា បាននិយាយថា ក្រុមហ៊ុន Samsung Electronics មានគម្រោងក្នុងការដាក់លក់នូវស្មាតហ្វូនដែលអាចបត់បានរបស់ខ្លួននៅក្នុងខែមីនាខាងមុខនេះហើយ ជាមួយនឹងការបង្ហាញវត្តមានរបស់ស្មាតហ្វូន Galaxy S10 ដែលទ្រទ្រង់នូវបច្ចេកវិទ្យា 5G ។
តាមរយៈប្រភពខាងលើនេះ ក្រុមហ៊ុនបច្ចេកវិទ្យាយក្សរបស់ប្រទេសកូរ៉េនេះ មានគម្រោងក្នុងការប្រកាសចេញនូវស្មាតហ្វូនស៊េរីថ្មី Galaxy S10 នៅក្នុងខែកុម្ភៈខាងមុខនេះ ជាមួយនឹងស្មាតហ្វូនដែលអាចបត់បាន Galaxy F និងជំនាន់ថ្មីមួយទៀតរបស់ស្មាតហ្វូន Galaxy S10 ដែលដំណើរនូវប្រព័ន្ធ 5G Network នៅក្នុងខែមីនានៅមួយខែបន្ទាប់។ លោក DJ Koh ដែលជាអគ្គនាយករបស់ក្រុមហ៊ុន Samsung Electronics ដែលជាប្រធានផ្នែកអាជីវកម្មស្មាតហ្វូន បានបញ្ជាក់កាលពីសប្តាហ៍មុននេះ ថា ក្រុមហ៊ុននឹងបញ្ចេញនូវស្មាតហ្វូន ដែលអាចបត់បានរបស់ខ្លួននៅក្នុងឆមាសទី 1 ឆ្នាំ 2019 នេះ។ គាត់បញ្ជាក់ថា ចំនួននៃការនាំចេញស្មាតហ្វូន ដែលអាចបត់បាននេះ គឺមានចំនួនយ៉ាងតិចបំផុតគឺ 1 លានគ្រឿង។
អ្នកឃ្លាំមើលឧស្សាហកម្មនេះ បានចេញមកនិយាយថា ក្រុមហ៊ុន Samsung ត្រូវបានគេរំពឹងថា នឹងបង្ហាញនូវស្មាតហ្វូនដែលអាចបត់បានរបស់ខ្លួននៅក្នុងព្រឹត្តិការណ៍ Mobile World Congress នោខែកុម្ភៈ នៅមុនការបង្ហាញខ្លួនជាផ្លូវការ ដែលនឹងកើតឡើងនៅក្នុងរយៈពេលប៉ុន្មានខែខាងមុខនេះ។ សម្រាប់ស្មាតហ្វូនដែលអាចបត់បានដែលអតិថិជនមានការរង់ចាំជាយូរមកហើយនោះ នឹងមិនទ្រទ្រង់នូវបច្ចេកវិទ្យា 5G Network នោះទេ។
ជាមួយគ្នានេះ ស្របពេលដែលតម្លៃរបស់ស្មាតហ្វូនដែលអាចបត់បាននេះ នៅមិនទាន់ទម្លាយនោះ អ្នកឃ្លាំមើលឧស្សាហកម្មនានា បាននិយាយថា ស្មាតហ្វូននេះ នឹងមានតម្លៃប្រហែលជា 2 លានវ៉ុន (US$1,770)។ ហើយសម្រាប់តម្លៃដែលខ្ពស់នេះ ក៏ត្រូវបានគេរំពឹងដែរថា នឹងធ្វើការផលិតនៅក្នុងចំនួនកំណត់តែប៉ុណ្ណោះ។ ក្រុមហ៊ុន Samsung បានបញ្ជាក់ថា ស្មាតហ្វូនដែលអាចបត់បានរបស់ខ្លួននឹងមានអេក្រង់ទំហំ 7.4-inch scree ហើយនៅពេលដែលស្មាតហ្វូននេះបត់នោះគឺមានអេក្រង់ទំហំ 4.6-inch display ដូចគ្នាទៅនឹងទំហំអេក្រង់ធម្មតាផងដែរ៕