កំពូលស្មាតហ្វូន OnePlus 6T បានចូលខ្លួនមកជំនូសដំណែង OnePlus 6 កាលពីចុងខែកញ្ញាកន្លងទៅ។ ជាមួយស្មាតហ្វូនជំនាន់ថ្មីនេះក្រុមហ៊ុន OnePlus បានប្រារព្ធនូវព្រឹត្តិការណ៍ក្នុងការបង្ហាញចេញនៅតាមតំបន់មួយចំនួនដូចជានៅទីក្រុង New York និង United States ជាដើម។ ហើយនៅទីផ្សារសហរដ្ឋអាមេរិកក្រុមហ៊ុនបានប្រកាសធ្វើកិច្ចសហការជាមួយក្រុមហ៊ុនបណ្តាញចែកចាយដ៏ធំមួយរបស់អាមេរិកគឺ T-Mobile ដោយក្រុមហ៊ុននេះចេញលក់ OnePlus 6T ទាំងម៉ូដែលទ្រទ្រង់បណ្តាញសេវា CDMA និង GSM។ ជាមួយគ្នាដែរស្មាតហ្វូនជំនាន់ថ្មីនេះគឺទ្រទ្រង់នៅប្រព័ន្ធ Band 13 ដែលជាអាជ្ញាប័ណ្ឌសម្រាប់ប្រើជាមួយបណ្តាញ Verizon Wireless ផងដែរ។
អ្វីដែលជាការភ្ញាក់ផ្អើលខ្លាំងបំផុត និងជោគជ័យបំផុតសម្រាប់ក្រុមហ៊ុន OnePlus គឺការចេញលក់ថ្ងៃដំបូងរបស់ OnePlus 6T គឺមានចំនួនកើនឡើងប្រមាណជា 86 ភាគរយបើធៀបនឹងការចេញលក់ OnePlus 6 ដែលជាជំនាន់មុនរបស់វា។ ព័ត៌មាននេះត្រូវបានរាយការណ៍ជាលើកដំបូងដោយក្រុមហ៊ុន XDA Developer ដែលបានបញ្ជាក់ថា OnePlus អាចលក់បាន 1 លានគ្រឿងក្នុងរយៈពេលបីសប្តាហ៍ចុងក្រោយ ហើយជាមួយនឹងចរន្តនៃការលក់ដ៏វិជ្ជមាននៃកំពូលស្មាតហ្វូនជំនាន់ថ្មី OnePus 6T បានធ្វើអោយកំពូលស្មាតហ្វូនជំនាន់ថ្មីនេះនឹងក្លាយផលិតស្មាតហ្វូនដែលមានទីផ្សារលក់ដ៏ល្អបំផុតរបស់ក្រុមហ៊ុន។
ចំពោះតម្លៃវិញ OnePlus 6T ដែលមានពណ៌ខ្មៅ (Mirror Black) មានរ៉េមទំហំ 6GB និងអង្គផ្ទុកទិន្នន័យ 128GB មានតម្លៃខ្ទង់ $549 អាមេរិក ដោយឡែកសម្រាប់ម៉ូដែលមានពណ៌ខ្មៅ (Midnight Black) មានរ៉េមទំហំ 8GB ជាមួយអង្គផ្ទុកទិន្នន័យ 256GB មានតម្លៃខ្ទង់ $629 អាមេរិក ប៉ុន្តែសម្រាប់ក្រុមហ៊ុន T-Mobile វិញបានផ្តល់ជូននូវបង់រំលស់ប្រចាំខែសម្រាប់អតិថិជនរបស់ខ្លួនជាមួយតម្លៃឥណទានដ៏ល្អបំផុតទៅលើ កំពូលស្មាតហ្វូន OnePlus 6T នេះ៕