ក្រុមហ៊ុន Samsung Display បានបញ្ជាក់នៅថ្ងៃទី 12 ខែវិច្ឆិកានេះថា ខ្លួនបានចាប់ផ្តើមធ្វើការផលិតទ្រង់ទ្រាយធំទៅលើទូទស្សន៍កម្រិតខ្ពស់ UHD video walls ដើម្បីបំពេញតម្រូវការដែលកំពុងតែមានការកើនឡើងខ្លាំងសម្រាប់អេក្រង់ដែលមានគុណភាពរូបភាពកម្រិតខ្ពស់ពីឧស្សាហកម្មឌីជីថលពិភពលោកនេះ។ ក្រុមហ៊ុនបុត្រសម្ព័ន្ធដែលគ្រប់គ្រងដោយក្រុមហ៊ុន Samsung Electronics បានបញ្ជាក់ថា ខ្លួនបានចាប់ផ្តើមធ្វើការផលិតកាលពីខែតុលាកន្លងទៅនេះ ដើម្បីផ្តល់នូវអេក្រង់ថ្មីជាច្រើន ដែលមានកម្រិតភាពច្បាស់ល្អជាងមុនដល់ទៅ 4 ដង បើធៀបជាមួយនឹងផលិតផល Full HD ហើយការរចនារបស់ទូរទស្សន៍ថ្មីនេះ គឺគែមពេញថែមទៀត។
ក្រុមហ៊ុន Samsung Display បាននិយាយថា សព្វថ្ងៃនេះ ស្របពេលដែលអេក្រង់ជាច្រើនមានការពង្រឹងទៅលើកម្រិតភាពច្បាស់ជាមួយនឹងគែមកាន់តែស្តើងនោះ ដំណោះស្រាយថ្មីៗជាច្រើនរបស់ក្រុមហ៊ុននេះត្រូវគេហៅឈ្មោះថា “ultra-narrow bezel” ដែលមានកម្រាស់ត្រឹមតែ 3.7 millimeters ប៉ុណ្ណោះ។ ក្រុមហ៊ុននេះ បាននិយាយថា ដំណោះស្រាយថ្មីនេះ គឺពិតជាមានសារៈសំខាន់ខ្លាំងមែនទែនសម្រាប់អតិថិជនជាច្រើនដែលអាចធ្វើការតភ្ជាប់ទៅកាន់អេក្រង់ Displays ជាច្រើនក្នុងការបង្កើតនូវទស្សនីយភាពបានច្រើនជ្រុងកម្រិតគុណភាព UHD នេះ។
សម្រាប់ការតភ្ជាប់នៅលើទូរទស្សន៍ 65-inch UHD video walls នេះ មាន 4 ដែលនឹងបង្កើតនូវទំហំដូចគ្នាទៅនឹងការប្រើប្រាស់នូវអេក្រង់ 46-inch panels ដល់ទៅ 9 ផ្ទាំងនោះ។ ក្រុមហ៊ុននេះ រំពឹងថា អេក្រង់នេះ គឺពិតជាមានតម្រូវការខ្ពស់សម្រាប់ទូរទស្សន៍ Video Walls ជាមួយនឹងការបង្កើនទៅលើកម្រិតភាពច្បាស់ដូចអ្វីដែលទីផ្សារទូរទស្សន៍ពិភពលោកបានធ្វើ។ ក្រុមហ៊ុននេះ បានអះអាងបន្ថែមថា ការផលិតទូរទស្សន៍ 65-inch នេះ នឹងនាំមុខគេនៅលើទីផ្សារសម្រាប់ទូរទស្សន៍ឌីជីថលកម្រិតខ្ពស់នៅពេលដ៏ខ្លី៕
