នាយកប្រតិបត្តិ LG Electronics បានប្រកាសថា ក្រុមហ៊ុននេះ ត្រូវការជ្រើសរើសអ្នកជំនាញផ្នែកព័ត៌មានវិទ្យាជាច្រើននៅក្នុងសហរដ្ឋអាមេរិក

នៅថ្ងៃទី 13 ខែវិច្ឆិកានេះ ក្រុមហ៊ុន LG Electronics បានបញ្ជាក់ថា នាយកប្រតិបត្តិរបស់ខ្លួន មានគម្រោងក្នុងការរៀបចំនូវកិច្ចប្រជុំមួយជាមួយនឹងអ្នកជំនាញផ្នែកព័ត៌មានវិទ្យានៅក្នុងសហរដ្ឋអាមេរិក នៅសប្តាហ៍នេះ ដែលជាផ្នែកមួយនៃកិច្ចខិតខំប្រឹតប្រែងរបស់ក្រុមហ៊ុនក្នុងការជ្រើសរើសអ្នកអ្នកជំនាញជាច្រើនពីបរទេសនោះ។

នាយកប្រតិបត្តិលោក Jo Seong-jin មានគម្រោងក្នុងការជួបជាមួយនឹងអ្នកជំនាញ ដែលមានបទពិសោធន៍ជាច្រើននៅក្នុងវិស័យឧស្សាហកម្មជាច្រើននៅក្នុង Silicon Valley ជាផ្នែកមនុស្សយន្ត Robots, Big Data, cloud computing, រថយន្តបើកបរដោយខ្លួនឯង និងបណ្តាញ Network ជំនាន់ទី 5 និងការចែករំលែកជាមួយនឹងពួកគេនូវចក្ខុវិស័យរបស់ក្រុមហ៊ុននៅក្នុងការលើកកម្ពស់បុគ្គលិកជាច្រើនសម្រាបន់ផ្នែកស្រាវជ្រាវ និងការអភិវឌ្ឍ។ ក្រុមហ៊ុន LG និយាយថា ដៃគូជាច្រើននៅក្នុងកិច្ចប្រជុំជាមួយនឹងគាត់នៅក្នុងអំឡុងពេលនៃដំណើរទស្សនកិច្ចអាជីវកម្មនោះ រួមមានសាស្រ្តាចារ្យជាច្រើន មកពីសាកលវិទ្យាល័យ Stanford University រួមទាំងអ្នកជំនាញផ្នែកបច្ចេកវិទ្យា AI ក្នុងការចែករំលែកនូវគំនិតជាច្រើន ទៅលើនិន្នាការនៃឧស្សាហកម្ម AI នេះ។

លោក Jo ប្តេជ្ញាក្នុងការនិយាយអំពីការផ្តោតសំខាន់របស់ក្រុមហ៊ុនទៅលើឧស្សាហកម្ម AI នៅក្នុងសេចក្តីថ្លែងសន្ទរកថារបស់លោកនៅក្នុងព្រឹត្តិការណ៍ IFA Berlin កាលពីខែសីហាកន្លងមក។ សេចក្តីថ្លែងការណ៍ផ្លូវការរបស់ក្រុមហ៊ុននិយាយថា “ចាប់តាំងពីឡើងដំណែងជានាយកប្រតិបត្តិរបស់ក្រុមហ៊ុននេះ នៅក្នុងឆ្នាំ 2016 នោះ លោក Jo ក្លាយជាផ្នែកមួយដ៏សំខាន់នៅក្នុងសន្និសីទ LG Techno Conference នៅក្នុងកិច្ចខិតខំប្រឹងប្រែងក្នុងការអញ្ជើញអ្នកជំនាញជាច្រើនសម្រាប់ផ្នែកស្រាវជ្រាវ និងការអភិវឌ្ឍ។

សន្និសីទនេះ គឺជាព្រឹត្តិការណ៍សាជីវកម្មមួយដែលមានបំណងក្នុងការជ្រើសរើសនូវអ្នកដែលមានសញ្ញាបត្រជាន់ខ្ពស់ផងដែរ។” លោក Jo បន្ថែមថា LG មានគម្រោងក្នុងការជួបជាមួយនឹងអ្នកដឹកនាំអាជីវកម្មជាច្រើននៅក្នុងវិស័យ IT ហិរញ្ញវត្ថុ និងអាជីវកម្មផ្នែកទំនិញ ដើម្បីពិភាក្សាគ្នាអំពីកិច្ចសហប្រតិបត្តិការនៅក្នុងដំណើរទស្សនកិច្ចទៅកាន់សហរដ្ឋអាមេរិកនេះផងដែរ៕