អស់រយៈពេលជាយូរមកហើយ Samsung ត្រូវបានគេដឹងថា គឺជាក្រុមហ៊ុនបច្ចេកវិទ្យាមួយនៅក្នុងចំណោមក្រុមហ៊ុនបច្ចេកវិទ្យាជាច្រើន ដែលនៅមិនទាន់ផ្លាស់ប្តូរសម្រាប់និន្នាការនៃការប្រើប្រាស់ Notch នៅលើអេក្រង់នោះទេ។ នៅក្នុងពេលថ្មីៗនេះ ក៏មានការទម្លាយចេញផងដែរថា ក្រុមហ៊ុននេះ បោះបង់ចោលនូវការរចនា Notch នេះជាមួយនឹងការប្រើប្រាស់នូវប្រហោងក្រោមអេក្រង់តែម្តង។
នៅក្នុងថ្ងៃនេះ គឺមានការផ្លាស់ប្តូរថ្មីមួយ ដែលមិនគួរអោយជឿ គឺថា ក្រុមហ៊ុនបច្ចេកវិទ្យាយក្សរបស់ប្រទេសកូរ៉េខាងត្បូងនេះ បានបញ្ចេញនូវអេក្រង់ Notch ដ៏ស្រស់ស្អាតនៅក្នុងពេលឆាប់ៗនេះ។ Samsung បានដាក់ឈ្មោះអេក្រង់ស្មាតហ្វូននេះថា Infinity-V និង Infinity-U។ អេក្រង់ថ្មីទាំងពីរនេះ គឺពិតជាស្រស់ស្អាតមែនទែន ជាមួយនឹងការប្រើប្រាស់នូវ Waterdrop Notches តូចមួយស្ថិតនៅផ្នែកខាងលើនៃអេក្រង់ ដូចបណ្តាស្មាតហ្វូនចិនមួយចំនួនដែរ ភាពខុសគ្នានៃអេក្រង់ទាំងពីនេះ គឺទំហំធំតូចប៉ុណ្ណោះ។ ដូចអ្វីដែលបានបញ្ជាក់តាមរយៈការប្រើប្រាស់ឈ្មោះ Infinity-U នឹងមាន Notch រាងអក្សរ U ស្របពេលដែលអេក្រង់ Infinity-V នឹងមាន Notch រាងជាអក្សរ V។
អេក្រង់ទាំងពីរនេះ គឺត្រូវបានគេមើលឃើញថា គឺមានរាងដូចគ្នាបេះបិទ ដែលមានន័យថា គឺមានជ្រុងកោងជាមួយនឹងគែមព័ទ្ធអេក្រង់ស្តើងថែមទៀតផង។ Samsung នៅមិនទាន់បញ្ជាក់ថា នៅពេលណា អេក្រង់ទាំងពីរនេះ នឹងបង្ហាញខ្លួនចូលទៅក្នុងទីផ្សារនោះទេ ប៉ុន្តែក្រុមហ៊ុននេះ ធ្លាប់បានប្រកាសថា ពូកគេនឹងប្រើប្រាស់អេក្រង់ទាំងពីរនេះ នៅលើស្មាតហ្វូនរបស់ខ្លួន។ ហើយអេក្រង់មួយផ្សេងទៀត អាចនឹងប្រើប្រាស់នៅលើស្មាតហ្វូន Galaxy S10 នៅឆ្នាំក្រោយនេះ ដែលនឹងមានឈ្មោះថា Infinity-O។ សម្រាប់អេក្រង់នេះ នឹងមានប្រហោងមូលមួយនៅផ្នែកខាងឆ្វេងនៃអេក្រង់ដែលជាកន្លែងសម្រាប់ដាក់កាមេរ៉ាខាងមុខ។
ក្រុមហ៊ុនបច្ចេកវិទ្យាយក្សរបស់ប្រទេសកូរ៉េខាងត្បូងនេះ ក៏បានបញ្ចេញនូវអេក្រង់ Infinity Flex Display ដែលនឹងប្រើប្រាស់សម្រាប់ស្មាតហ្វូនដែលអាចបត់បានស៊េរីថ្មីរបស់ខ្លួន។ អ្វីដែលគួរអោយកត់សម្គាល់ទៀតនោះ អេក្រង់នេះ នឹងប្រើប្រាស់ជាមួយនឹង One UI ថ្មីរបស់ក្រុមហ៊ុន Samsung ផងដែរ៕