ឆាប់ៗនេះ ក្រុមហ៊ុន Samsung នឹងបង្ហាញនូវបន្ទះឈីបស៊េរីថ្មីសម្រាប់ស្មាតហ្វូន Galaxy S10 ខាងមុខនេះ។ យោងតាម ការបញ្ជាក់តាមរយៈគណនីបណ្តាញសង្គមរបស់ក្រុមហ៊ុន Samsung បានបង្ហាញបន្ទះឈីប Exynos នេះជាផ្លូវការ ដែលនឹងត្រៀមបង្ហាញខ្លួននៅថ្ងៃទី 14 ខែវិច្ឆិកាខាងមុខនេះ។ បន្ទះឈីបនេះ គឺជាជំនាន់បន្ទាប់នៃបន្ទះឈីប Exynos 9810 ដែលប្រើប្រាស់នៅលើស្មាតហ្វូន Galaxy S9 និង Galaxy Note 9 កាលពីឆ្នាំមុន។ បន្ទះឈីបនេះ អាចនឹងមានឈ្មោះថា Exynos 9820 ។ ការប្រើប្រាស់ឈ្មោះបន្ទះឈីបនេះ គឺធ្លាប់បានឃើញនៅក្នុងពាក្យចចាមអារ៉ាម និងរបាយការណ៍ជាច្រើនផងដែរ។
បន្ទះឈីបរបស់ស្មាតហ្វូន Galaxy S10 នឹងក្លាយជាបន្ទះឈីប Exynos ដំបូងបំផុតរបស់ក្រុមហ៊ុន Samsung ដែលប្រើប្រាស់នូវដំណើរការនៃការផលិត 7nm LPP ផ្អែកទៅលើបច្ចេកវិទ្យា EUV lithography technology។ ដំណើរការនៃការពង្រឹងទៅលើបច្ចេកវិទ្យានេះ នឹងធ្វើការកាត់បន្ថយទៅលើការប្រើប្រាស់ថាមពលបានទាបជាងមុនដល់ទៅ 50% ហើយនិងមានកម្លាំងខ្លាំងក្លាជាងមុនដល់ទៅ 20% នេះបើតាមការបញ្ជាក់របស់ក្រុមហ៊ុន Samsung។
តាមការកំណត់ Samsung ត្រៀមនឹងបញ្ចេញនូវបន្ទះឈីប Exynos chip ជំនាន់បន្ទាប់ដែលមានមុខងារឆ្លាតវៃ។ សូមជំរាបថា កាលពីពេលមុននេះ ពាក្យចចាមអារ៉ាមនានា បានបញ្ជាក់ថា បន្ទះឈីបរបស់ស្មាតហ្វូន Galaxy S10 នេះ នឹងប្រើប្រាស់នូវប្រព័ន្ធឆ្លាតវៃ neural processing unit។ សម្រាប់បន្ទះឈីបនេះ ត្រូវបានគេរំពឹង ថានឹងជាប្រភេទ dual-core artificial intelligence chip ដែលនឹងអនុញ្ញាតឱ្យស្មាតហ្វូន Galaxy S10 ដំណើរការនូវបច្ចេកវិទ្យា AI ដែលមានកម្រិតស្មុគស្មាញខ្លាំង និងមុខងារ Machine Learning ផងដែរ។
សម្រាប់បន្ទះឈីប Exynos ថ្មីនេះ នឹងទ្រទ្រង់នូវម៉ូដឹម 5G modem។ Samsung កំពុងតែធ្វើការនៅលើម៉ូដឹម Exynos 5100 modem ដែលនាំយកនូវបច្ចេកវិទ្យា 5G នេះ។ សម្រាប់បន្ទះឈីបនេះ គឺត្រៀមប្រើប្រាស់នៅលើស្មាតហ្វូន Galaxy S10 ដែលដំណើរការនូវមុខងារ 5G ។ ក្រុមហ៊ុន Samsung នៅមិនទាន់ទម្លាយនូវព័ត៌មានច្រើនទៀតនោះទេ អំពីបន្ទះឈីប Exynos នេះ។ យើងប្រហែលជាមិនរង់ចាំយូរនោះទេ ដោយសារតែព្រឹត្តិការណ៍នៃការប្រកាសបង្ហាញជាផ្លូវការគឺនៅថ្ងៃទី 14 ខែវិច្ឆិកាឆ្នាំ 2018 នេះ៕