LG Mobile បានទិញ Trademarks សម្រាប់ស្មាតហ្វូនជាច្រើន រួមមានដូចជា V50, V60, V70, V80 និង V90

មួយរយៈពេលចុងក្រោយនេះ ក្រុមហ៊ុន LG Mobile ហាក់បីដូចជាមានភាពស្ងប់ស្ងាត់បន្តិចនៅក្នុងប្រកួតប្រជែងទៅលើស្មាតហ្វូននៅលើទីផ្សារសកល ដោយសារតែស្មាតហ្វូនចិន ចេញច្រើន និងមានតម្លៃថោកៗ។ កាលពីពីរសប្តាហ៍មុននេះ ស្មាតហ្វូនស៊េរីថ្មី V40 ThinQ ទើបតែបង្ហាញខ្លួនជាផ្លូវការ ហើយស្មាតហ្វូននេះ ត្រូវបានក្រុមហ៊ុន LG Mobile រំពឹងថា នឹងទទួលបានជោគជ័យខ្លាំងនៅលើទីផ្សារ ប៉ុន្តែតម្លៃស្មាតហ្វូននេះ គឺខ្ពស់ណាស់ ដូច្នេះ ដើម្បីចូលមកប្រកួតប្រជែងសារជាថ្មី ក្រុមហ៊ុនបច្ចេកវិទ្យាយក្សរបស់ប្រទេសកូរ៉េខាងត្បូងនេះ បានទិញ Trademarks សម្រាប់ស្មាតហ្វូនជាច្រើនដូចជា មិនមែនមួយ មិនមែនពីរ ប៉ុន្តែគឺស្មាតហ្វូនចំនួន 5 នៃត្រកូល V-Series ឯណោះ។ 

តាមការបញ្ជាក់របស់គេហទំព័រហូឡង់ LetsGoDigital បានបញ្ជាក់ថា ក្រុមហ៊ុនបច្ចេកវិទ្យាយក្ស LG Mobile ទើបតែស្នើសុំនូវឈ្មោះ Trademarks នៃស្មាតហ្វូនជាច្រើនដូចជា LG V50, V60, V70, V80 និង V90 ជាមួយនឹងក្រុមហ៊ុន Canadian Intellectual Property Office (CIPO)។ សម្រាប់ Trademarks ទៅលើស្មាតហ្វូន V-Series ថ្មីនេះ នឹងត្រូវប្រើប្រាស់សម្រាប់ស្មាតហ្វូននាពេលអនាគត ដែលមានន័យថា ក្រុមហ៊ុន LG Mobile នឹងអាចធានាបានទៅលើឈ្មោះរបស់ស្មាតហ្វូនជំនាន់ក្រោយរបស់ខ្លួន។ 

គួរបញ្ជាក់ថា កន្លងមក ក្រុមហ៊ុនបច្ចេកវិទ្យាយក្ស LG Mobile ក៏បានទិញនូវឈ្មោះស្មាតហ្វូន G-Series រហូតដល់ឆ្នាំ 2020 ហើយឥលូវនេះ ក្រុមហ៊ុន LG Mobile បានទិញនូវ Trademarks សម្រាប់ស្មាតហ្វូនត្រកូល V-Series រហូតដល់ឆ្នាំ 2023 នេះ ហើយសម្រាប់ស្មាតហ្វូនទាំងនេះ ក៏អាចនឹងបង្ហាញខ្លួននៅក្នុងព្រឹត្តិការណ៍តាំងពិរណ៍ IFA ជារៀងរាល់ឆ្នាំផងដែរ៕