Honor ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Huawei បានទម្លាយថា ខ្លួននឹងប្រកាសចេញនូវស្មាតហ្វូនស៊េរីថ្មីរបនស់ខ្លួននៅពាក់កណ្តាលខែមករា ឆ្នាំ 2019 នេះ ជាមួយនឹងការបង្ហើបអំពីលក្ខណៈសម្បត្តិមួយចំនួនរបស់ស្មាតហ្វូននេះផងដែរ ដែលពិតជាទាក់ទាញចិត្តអ្នកប្រើប្រាស់មែនទែន។ នៅក្នុងរូបភាព Teaser ដែលទើបតែបញ្ចេញនៅក្នុងពេលថ្មីៗនេះ បង្ហាញថា ក្រុមហ៊ុន Honor ទំនងជាបានច្បិចយកនូវគំនិតរបស់ Samsung ហើយក្រុមហ៊ុននេះ ក៏បានត្រៀមបញ្ចេញនូវស្មាតហ្វូនដែលមានរន្ធនៅលើអេក្រង់ដំបូងបំផុតនៅលើពិភពលោកផងដែរ។
កន្លងមកក្រុមហ៊ុន Samsung ក៏បានទម្លាយអំពីគម្រោងរបស់ខ្លួនក្នុងការបោះបង់ចោលនូវការរចនា Notch ជាមួយនឹងការបញ្ចេញនូវការរចនារូបរាងថ្មីនៅលើអេក្រង់តែម្តង ហើយអេក្រង់ថ្មីទាំងនេះ នឹងបង្ហាញខ្លួននៅឆ្នាំក្រោយនេះ សម្រាប់ប្រើប្រាស់នៅលើស្មាតហ្វូន Galaxy S10 និង S10+។ នៅក្នុងការដាក់ឈ្មោះថា HIAA (Hole In Active Area) ការរចនារូបរាងនេះនឹងអនុញ្ញាតឱ្យក្រុមហ៊ុន Samsung ធ្វើការរចនាអេក្រង់សម្រាប់ដាក់កាមេរ៉ានៅខាងមុខ ហើយកាមេរ៉ានេះ ស្ថិតនៅក្នុងប្រហោងនេះតែម្តង។ ជាក់ស្តែង កាមេរ៉ានេះ គឺប្រហែលជាស្ថិតនៅក្រោមអេក្រង់តែម្តងសម្រាប់ស្មាតហ្វូន Honor នោះ។
បន្ថែមពីនេះទៀតនោះ ក៏មានពាក្យមួយឃ្លា បាននិយាយថា “ការមើលឃើញនូវអ្វីដែលមិនទាន់ឃើញ” ដែលអាចសំដៅបានថា ក្រុមហ៊ុន Honor អាចនឹងបញ្ចេញនូវស្មាតហ្វូនស៊េរីថ្មីដ៏អស្ចារ្យរបស់ខ្លួន។ ស្មាតហ្វូន Galaxy S10 ត្រូវបានគេរំពឹងថា អាចនឹងបង្ហាញខ្លួននៅក្នុងពេលណាមួយនៅខែកុម្ភៈ ឆ្នាំ 2019 នេះមុនព្រឹត្តិការណ៍ MWC 2019 ហើយក្រុមហ៊ុន Huawei អាចនឹងក្លាយជាក្រុមហ៊ុនដំបូងបំផុត ដែលធ្វើការផ្លាស់ប្តូរបានលឿននៅក្នុងការចនារូបរាងស្មាតហ្វូនស៊េរីថ្មីនោះ។ ព្រឹត្តិការណ៍នេះនឹងធ្វើឡើងនៅថ្ងៃទី 22 ខែមករា ឆ្នាំ 2019 នេះ។