រហូតមកដល់ពេលនេះ នៅមិនទាន់មានព័ត៌មានដែលបញ្ជាក់អំពីស្មាតហ្វូន Galaxy S ជំនាន់ថ្មី របស់ក្រុមហ៊ុន Samsung នៅឡើយទេ។ នៅក្នុងព័ត៌មានបែកធ្លាយថ្មីៗនេះ បានបញ្ជាក់ថា ប្រហោងរន្ធនៅលើស្មាតហ្វូន Galaxy S10 និងខុសប្លែកពីស្មាតហ្វូន Galaxy S10 Plus។
ការបែកធ្លាយនេះ គឺជារូបភាពផ្នែកខាងមុខរបស់ស្មាតហ្វូនស៊េរីថ្មី Galaxy S10 Plus ដែលមានការបង្ហាញថា អេក្រង់នេះ នឹងមិនមែនមានរន្ធមួយនៅលើអេក្រង់នោះទេ ប៉ុន្តែមានរន្ធពីរដែលមានរូបរាងដូចជាថ្នាំនៅលើអេក្រង់។ ប្រហោងរន្ធទាំងពីរនេះ គឺជាកន្លែងសម្រាប់ដាក់កាមេរ៉ា ដែលមានន័យថា ស្មាតហ្វូន Galaxy S10 Plus នេះ នឹងមានកាមេរ៉ាភ្លោះ។ សម្រាប់រន្ធប្រហោងដែលមានរូបរាងដូចជាថ្នាំនេះ គឺស្ថិតនៅផ្នែកខាងស្តាំរបស់អេក្រង់។
ប្រភពព័ត៌មានខាងលើនេះបានបន្ថែមថា ស្មាតហ្វូននេះ មានគែមព័ទ្ធអេក្រង់ស្តើង ហើយវាក៏មានរន្ធសម្រាប់ Speaker នៅផ្នែកខាងមុខផងដែរ យោងតាមការបង្ហាញពីរូបភាព Render របស់ស្មាតហ្វូននេះផងដែរ។ កន្លងមក មានរូបភាពនៃគំនិតនៃការរចនាទៅលើស្មាតហ្វូន Galaxy S10 និងGalaxy S10 Plus ជាច្រើនត្រូវបានគេបង្ហាញនៅលើអនឡាញ ដោយរូបភាពជាច្រើនទាំងនោះ គឺខុសៗគ្នា។ សម្រាប់រូបភាពជាច្រើនសន្លឹក ដែលធ្វើការចែករំលែកនៅលើ Twitter តាមរយៈ @UniverseIce នោះ បានបញ្ជាក់ថា ស្មាតហ្វូនជាច្រើននៅក្នុងឆ្នាំ 2019 នេះ នឹងមានការផ្លាស់ប្តូររូបរាងថ្មី ដូចអ្វីដែលធ្លាប់ បានផ្លាស់ប្តូរនៅលើ Notch ដូចស្មាតហ្វូន iPhone X នោះ៕
