នៅឆ្នាំក្រោយនេះ ក្រុមហ៊ុន Samsung មិនត្រឹមតែមានពាក្យចចាមអារ៉ាមអំពីការត្រៀមខ្លួនសម្រាប់ស្មាតហ្វូនចំនួន 3 ឬ 4 ម៉ូដែលរបស់ Galaxy S10 សម្រាប់ការបង្ហាញនោះទេ ប៉ុន្តែក្រុមហ៊ុននេះ ក៏បានត្រៀមបញ្ចេញនូវស្មាតហ្វូនស៊េរីថ្មីថ្នាក់កណ្តាលរបស់ខ្លួនគឺត្រកូល Galaxy M និង Galaxy A ផងដែរ។ ស្មាតហ្វូនស៊េរីថ្មី Galaxy M20 (លេខម៉ូដែល SM-M205) គឺមិនមែនជាផលិតផលដែលតូចតាចសម្រាប់ក្រុមហ៊ុនបច្ចេកវិទ្យានេះ ដែលនឹងបង្ហាញខ្លួននៅឆ្នាំក្រោយនោះទេ ដោយសារតែស្មាតហ្វូននេះគឺមានភ្ជាប់ជាមួយនឹង Waterdrop Notch (ដែលមានការរចនា Infinity-U Display) រួមជាមួយនឹងម៉េមូរីទំហំ 32GB និង 64GB ។
ស្មាតហ្វូននេះ នៅតែរក្សានូវប្រព័ន្ធស្កេនក្រយ៉ៅដៃនៅខាងក្រោយដដែល ហើយវាក៏មានកាមេរ៉ាបញ្ឈរភ្លោះថែមទៀតនៅផ្នែកខាងក្រោយរបស់ស្មាតហ្វូន Galaxy M20 នេះ។ វាក៏មានការបែកធ្លាយនៃសម្បកទូរស័ព្ទរបស់វាផងដែរ។ នៅក្នុងរូបភាពដែលបែកធ្លាយនេះបង្ហាញថាសម្បកទូរស័ព្ទការពារ Samsung Galaxy M20 នេះគឺជាការពិត។ រូបភាពនេះ បានបង្ហាញថា ស្មាតហ្វូននេះគឺទាបជាងម៉ូដែល Galaxy A7 (2018) ដែលមានកាមេរ៉ា 3 គ្រាប់ និងស្មាតហ្វូន Galaxy A9 (2018) ដែលមានកាមេរ៉ា 4 គ្រាប់។
នេះពិតជារឿងល្អដែលស្មាតហ្វូនស៊េរីថ្មីនេះ នៅតែរក្សាទុកនូវរន្ធដោតកាសស្តាប់ headphone jack ស្របពេលដែលស្មាតហ្វូន Galaxy A8s ដែលបង្ហាញខ្លួនជាផ្លូវការកាលពីប៉ុន្មានថ្ងៃមុននេះ គឺមិនមានភ្ជាប់ជាមួយនឹងរន្ធដោតកាសស្តាប់ 3.5mm នោះទេ។ សរុបមក ក្រុមហ៊ុន Samsung ហាក់ដូចជាកំពុងតែគិតនូវរឿងផ្សេងមួយទៀតសម្រាប់ស្មាតហ្វូនថ្នាក់កណ្តាលរបស់ខ្លួនដែលតម្លៃរបស់វាមិនត្រឹមតែទាក់ទាញខ្លាំងប៉ុណ្ណោះទេ ហើយវាក៏ភ្ជាប់ជាមួយនឹង Waterdrop Notch ថែមទៀត៕