យោងតាមប្រភពពីឧស្សាហកម្មប្រទេសកូរ៉េខាងត្បូង បានបញ្ជាក់នៅថ្ងៃទី 16 ខែធ្នូនេះថា ចំណែកទីផ្សាររបស់ក្រុមហ៊ុនផលិតរថយន្ត Hyundai Motor សម្រាប់រថយន្ត SUVs នៅក្នុងសហរដ្ឋអាមេរិក គឺមានការកើនឡើងរហូតដល់ទៅ 3.7% នៅក្នុងខែវិច្ឆិកានេះ ចាប់តាំងពីក្រុមហ៊ុននេះ បានចូលប្រកួតប្រជែងនៅក្នុងទីផ្សារនៅឆ្នាំ 2000 មក។ ក្រុមហ៊ុនផលិតរថយន្តរបស់ប្រទេសកូរ៉េខាងត្បូងនេះ បានលក់រថយន្ត SUVs បានចំនួន 271,377 គ្រឿងនៅក្នុងអំឡុងខែមករាដល់ខែវិច្ឆិកាដែលមានការកើនឡើង 14.1% បើធៀបទៅនឹងរយៈពេលដូចគ្នាកាលពីឆ្នាំមុននេះ។
គួរបញ្ជាក់ថា កាលពីប៉ុន្មានឆ្នាំមុននេះ ចំណែកទីផ្សារ SUV របស់ក្រុមហ៊ុន Hyundai ធ្លាប់មានការធ្លាក់ចុះផងដែរ បន្ទាប់ពីខ្លួនឈានដល់ 3.6% នៅក្នុងឆ្នាំ 2009 សម្រាប់តួរលេខធ្លាក់ខ្លាំងបំផុតគឺនៅត្រឹម 2.7% នៅក្នុងឆ្នាំ 2015 និងកើនឡើងវិញ 3.1% នៅក្នុងឆ្នាំ 2016 និង 3.3% កាលពីឆ្នាំមុននេះ។ Hyundai SUVs ចំនួនពីរម៉ូដែលគឺ Tucson និង Kona គឺមានការកើនឡើងខ្លាំងនៅលើទីផ្សារដែលលកបានរហូតដល់ទៅ 126,916 គ្រឿង និង 38,771 គ្រឿងរៀងគ្នានេះបើតាមការបញ្ជាក់របស់ទិន្នន័យនេះ។
ទីផ្សាររបស់ក្រុមហ៊ុនផលិតរថយន្តរបស់សហរដ្ឋអាមេរិកនេះក៏បង្ហាញអំពីសញ្ញានៃការកើនឡើងយឺតរបស់ខ្លួនផងដែរ ប៉ុន្តែសម្រាប់វិស័យនៃរថយន្ត SUV គឺមានការកើនឡើងលឿនមែនទែន។ ឆ្នាំមុននេះវាមានការលក់បានដល់ទៅ 7.43 លានគ្រឿងដែលមានការកើនឡើង 2.5 ដងបើធៀបជាមួយនឹងឆ្នាំ 2009 គឺលក់បានត្រឹមតែ 2.91 លានគ្រឿងប៉ុណ្ណោះ។ សម្រាប់កំណើនរថយន្ត SUV នៅខ្សោយរបស់ក្រុមហ៊ុន Hyundai នេះគឺមានការស្តីបន្ទោសទៅលើប្រតិបត្តិការដែលនៅមានលក្ខណៈទន់ខ្សោយ ប៉ុន្តែក្រុមហ៊ុននេះក៏មានគម្រោងក្នុងការវាយលុកទីផ្សារជាមួយនឹងរថយន្ត The Palisadeដែលជាប្រភេទរថយន្ត SUV ខ្នាតធំទើបតែបង្ហាញខ្លួនកាលពីខែមុននេះផងដែរ។ សម្រាប់ការនាំចេញរថយន្ត The Palisade ដំបូងបំផុតទៅកាន់សហរដ្ឋអាមេរិកគឺនៅក្នុងរដូវក្តៅឆ្នាំ 2019 នេះ៕
