បច្ចុប្បន្នក្រុមហ៊ុនបច្ចេកវិទ្យាឈានមុខគេរបស់ចិន Huawei ត្រូវបានគេដឹងថា កំពុងតែធ្វើការលើចង្វាក់ផលិតផលបច្ចេកវិទ្យាជាច្រើនដែលត្រៀមនឹងបញ្ចេញនាចុងឆ្នាំនេះ និងដើមឆ្នាំ 2019 ខាងមុខ។ រាល់ផលិតបច្ចេកវិទ្យាថ្មីៗទាំងនោះត្រូវបានគេដឹងទៀតថា មានដូចជាស្មាតហ្វូនជំនាន់ថ្មី Nova 4, បច្ចេកវិទ្យាសាកថ្មល្បឿនលឿនបំផុត 20W SuperCharge protocol ហើយនឹងស្មាតហ្វូន View20 របស់ក្រុមហ៊ុនបុត្រសម្ព័ន្ធ Honor ជាដើម។ បន្ថែបពីនេះ Huawei ក៏បានត្រៀមខ្លួនក្នុងការបញ្ចេញកំពូលស្មាតហ្វូនស្រឡាយ P-Series ផងដែរគឺ P30-Series។
ស្មាតហ្វូន P30 Series មានការបែបធ្លាយនូវរូបពង្រាង (render) ជាបន្តបន្ទាប់នៅលប្រព័ន្ធអ៊ីធើណិតហើយក្នុងនោះរូបរាងភាពនៃការរចនារបស់ P30 បានបង្ហាញថាស្មាតហ្វូនទាំងពីរនេះនឹងមានកាមេរ៉ាសែលហ្វីបង្កប់នៅក្នុងអេក្រង់ដូច Samsung បានធ្វើនៅលើ Galaxy A8s ដែរ។ ប៉ុន្តែយ៉ាងណាមិញថ្មីៗនេះមានការបង្ហាញចេញពីកញ្ចក់ការពារអេក្រង់ (screen protector) របស់ Huawei P30 Pro ចំនួនពីរដោយមួយមាន Notch រាងរង្វង់ (circular notch) និងមួយផ្សេងទៀតជាប្រភេទ teardrop screen ដែលវានឹងមានបង្កប់កាមេរ៉ាសែលហ្វីក្នុងនោះផងដែរ។
ជាងនេះទៅទៀតប្រភពដដែលក៏បង្ហាញនូវកញ្ចក់ការពាររបស់កំពូលស្មាតហ្វូន Samsung Galaxy S10 និង S10+ ដែលត្រៀមបង្ហាញខ្លួនក្នុងពេលឆាប់ៗនេះទៀតផង ដែលកញ្ចក់ការពាររបស់ S10 និង S10+ គឺលាតពេញតែម្តងមិនមាន Notch ឡើយ ដូច្នេះវាច្បាស់ហើយថាអេក្រង់របស់កំពូលស្មាតហ្វូន Samsung ទាំងពីរនេះនឹងមានបង្កប់កាមេរ៉ាសែលហ្វីតែម្តង។ ទោះជាយ៉ាងណាអេក្រង់ដែលមាន Notch ជារង្វង់ និង teardrop ឬ waterdrop មិនមែនជារឿងថ្មីនោះទេនាពេលបច្ចុប្បន្ន ព្រោះថាមានស្មាតហ្វូនជាច្រើនបាននឹងកំពុងប្រើប្រាស់អេក្រង់ប្រភេទនេះរួចទៅហើយ ប៉ុន្តែអ្វីដែលជារឿងថ្មី និងទទួលបានការចាប់អារម្មណ៍ខ្លាំងបំផុតក្នុងពេលនេះគឺអេក្រង់ black hole ជំនាន់ថ្មីរបស់ Samsung ទៅវិញទេ ហើយមានក្រុមហ៊ុនចិនជាច្រើនបាននឹងកំពុងគិតគួរក្នុងការប្រើប្រាស់អេក្រង់ប្រភេទថ្មីនេះនៅលើស្មាតហ្វូនរបស់ពួកគេផងដែរ។
ដូចនេះបើតាមការសន្និដ្ឋាន Huawei អាចនឹងលែងដៃក្រុមហ៊ុនផលិតបន្ទះអេក្រង់ OLED ដូចជា BOE និង LG Display ទៅចាប់ដៃជាមូយ Samsung ក្នុងការបំពាក់អេក្រង់ OLED ជំនាន់ថ្មីនៅលើកំពូលស្មាតហ្វូនជំនាន់ថ្មីរបស់ខ្លួន Huawei P30 Pro ថែមទៀតផង៕
