ក្រុមហ៊ុន Apple បានប្រកាសថា ខ្លួននឹងបង្កើតទីស្នាក់ការថ្មី នៅអូស្ទីន ជាមួយនឹងការវិនិយោគចំនួន 1 ពាន់លានដុល្លារ។ ក្រុមហ៊ុននេះ ក៏បានប្រកាសពីផែនការបង្កើតទីតាំងថ្មីនៅទីក្រុង Seattle, San Diego និងទីក្រុង Culver និងពង្រីកទៅកាន់ទីក្រុង នៅទូទាំងសហរដ្ឋអាមេរិក រួមមាន Pittsburgh, New York និង Boulder រដ្ឋ Colorado ក្នុងរយៈពេល 3 ឆ្នាំខាងមុខ។ ក្រុមហ៊ុន Apple បានបន្ថែមការងារចំនួន 6,000 ដល់កម្លាំងពលកម្មអាមេរិករបស់ខ្លួន នៅឆ្នាំ 2018 ហើយឥឡូវនេះ មានបុគ្គលិកចំនួន 90,000 នាក់ នៅក្នុងរដ្ឋចំនួន 50។
ដូចដែលបានប្រកាសនៅខែមករា ក្រុមហ៊ុននេះ នឹងបង្កើតការងារ 20,000 កន្លែង នៅក្នុងសហរដ្ឋអាមេរិក នៅត្រឹមឆ្នាំ 2023 ។ អគារថ្មីបំផុតរបស់ក្រុមហ៊ុន Apple នឹងស្ថិតនៅតិចជាង 1 ម៉ាយ ពីកន្លែងដែលមានស្រាប់។ ទីស្នាក់ការទំហំ 133 ហិកតានេះ នឹងមានបុគ្គលិកបន្ថែមចំនួន 5000 នាក់ ដែលមានសមត្ថភាពអាចរីកចម្រើនរហូតដល់ 15000 ហើយត្រូវបានគេរំពឹងថា នឹងធ្វើឱ្យក្រុមហ៊ុន Apple ក្លាយជានិយោជិកឯកជនធំជាងគេនៅអូស្ទីន។
ការងារដែលបង្កើតឡើង នៅបរិវេណអគារថ្មីនេះ នឹងរួមបញ្ចូលនូវមុខងារជាច្រើន ដូចជាវិស្វកម្ម ការស្រាវជ្រាវ និងការប្រតិបត្តិការហិរញ្ញវត្ថុ ការលក់ និងផ្នែកបំម្រើអតិថិជន។ បរិវេណថ្មីនេះ នឹងរួមបញ្ចូលទំហំផ្ទៃក្រឡាចំនួន 50 ហិចតា ដែលបានបម្រុងទុក ហើយដូចកន្លែងធ្វើការទាំងអស់ របស់ក្រុមហ៊ុន Apple ទូទាំងពិភពលោក កន្លែងធ្វើការរបស់ក្រុមហ៊ុននេះ នឹងត្រូវបានបំពាក់ដោយថាមពលកកើតឡើងវិញ 100 ភាគរយ។ ក្រុមហ៊ុន Apple មានគម្រោងវិនិយោគទឹកប្រាក់ចំនួន 10 ពាន់លានដុល្លារអាមេរិក នៅក្នុងមជ្ឈមណ្ឌលទិន្នន័យអាមេរិក ក្នុងរយៈពេលប្រាំឆ្នាំខាងមុខ ដែលរាប់បញ្ចូលទាំងទឹកប្រាក់ចំនួន 4,5 ពាន់លានដុល្លារ នៅឆ្នាំនេះ និងឆ្នាំក្រោយ។
លោក Tim Cook អគ្គនាយកក្រុមហ៊ុន Apple បានមានប្រសាសន៍ថា ក្រុមហ៊ុន Apple មានមោទនភាពក្នុងការនាំយកការវិនិយោគការងារ និងឱកាសថ្មីៗ ទៅកាន់ទីក្រុងនានា នៅទូទាំងសហរដ្ឋអាមេរិក និងធ្វើអោយកាន់តែស៊ីជម្រៅ នូវភាពជាដៃគូជិតស្និទ្ធរបស់យើង ជាមួយទីក្រុង និងមនុស្សនៅទីក្រុងអូស្ទីន។ ទេពកោសល្យគំនិតច្នៃប្រឌិត និងគំនិតបង្កើតថ្ងៃស្អែក មិនត្រូវបានកំណត់ដោយតំបន់ ឬលេខកូដតំបន់ទេ ហើយជាមួយនឹងការរីកចម្រើនថ្មីនេះ យើងកំពុងបង្កើនការប្តេជ្ញាចិត្តរបស់យើង ក្នុងការដាំដុះវិស័យបច្ចេកវិទ្យា និងកម្លាំងពលកម្មទូទាំងប្រទេស៕